Efesios 6 - Bible

Pablo oporomboe kërái sambiaɨ reta jare tu reta iko waerä

1Añawe che jae wi sambiaɨ reta pe kuärái: Tuyapo opaete mbaembae tu jare ichɨ jei wae rupi. Echa’ä jokua ko jae yandeYa uipota wae, jare jupi ko uyapo reta waerä.

2-3Uyekuatía oï Tumpa iñeerɨru pe kuärái: “Pipɨu peru jare pesɨ wi, piko kawi waerä jare perekowe puku waerä kua ɨwɨ pe.”Éxodo 20.12 Jukuärái uyekuatía oï. Añetete opaete mbaembae Tumpa arakae jei Israel iñemoñaa reta pe wae wi, kua ko tenondewaete wae Tumpa jei umeeta chupe reta mbae ikawi wae jae reta uyapo yawe.

4Jare añawe che jae tu reta pe wi kuärái: Awɨye tombopochɨkaño isambiaɨ reta ipotawe mbaembae re. Erëi tomboe reta jupi wae re, jare tumbɨarakuaa kawi reta kërái yandeYa uipota wae rupi.

Pablo oporomboe kërái uyeyokui wae reta iko waerä

5Jare añawe che jae aï uyeyokui wae reta pe wi kuärái: Tuyapo uipɨu rewe ipatrón jei wae rupi. Tuyeyokui reta chupe ipɨakɨrëɨ rewe Cristo pe uyeyokui wae rami.

6Awɨye tuparawɨkɨ kawi reta ipatrón umae oï jese reta yaweño ipatrón umbɨyerowia waerä. Tuyeyokui kawiñoi reta chupe Tumpa umbɨyerowia waerä. Echa’ä kuimbae peño’ä ko uyeyokui ñonoï. Jae reta ko jae Cristo pe uyeyokui wae.

7Jayawe tuyeyokui reta ipatrón pe jatangätu rewe kërái yandeYa pe uparawɨkɨ ñonoï wae rami – mbaetɨ ko kuimbae pe.

8Jare timandúa reta kua re: Yayapo yawe mbaembae ikawi wae, yandeYa umɨñatimata oï yandewe ikawi wae jokua re. Jukuäraita ko kía pe uyeyokui wae jare uyeyokui mbae wae wi.

Pablo oporomboe kërái patrón reta iko waerä

9Jae nunga wi che jae patrón reta pe kuärái: Toyokui ipɨakawi rewe uyeyokui chupe wae reta. Awɨye tuñeengata chupe reta umɨngɨye waerä. Timandúa patrón jare uyeyokui chupe wae reta wi oyowakeño onoi pëtiño iYa – jae ko yandeYa ara pe oï wae. Jare jae oyowake etei umae patrón re jare uyeyokui wae re. Echa’ä jae uau’ä pëti waeño ïru wae wi.

Pablo oporomboe kërái yandepuere yayepɨtaso kawi waerä Añawasu pe

10Añawe hermano reta, kua jaeño ma jaeta aï pewe: Ndarau yandepuere yayeyokui yandei yandeYa pe. Jáeramo yayekota ko jae imbaepuere tuichaete wae re.

11Echa’ä Añawasu jekuaeño yanembowaicho oï yanembɨtawɨ waerä. Erëi Tumpa umee ma yandewe mbaembae yayerepɨ waerä chuwi. Kua yandepuere yambɨjaanga pëti sɨndaro jemimonde jare jembiporu ñeräro pewa re. Jayawe piporu kawi opaete mbaembae Tumpa umee ma yandewe wae piyepɨtaso kawi waerä Añawasu pe.

12Pemandúa ñañeräro’ä ko ñaï ɨwɨ pewa reta ndiwe. Yanderowaicho reta ko jae Añawasu jare aña reta. Jae reta ko jae ɨwɨ pewa pɨ̈tumimbi pe ñonoï reta wae echa iya. Jukuärái teko kachi tuicha ukuakuaa oo oï kua ɨwɨ pe.

13Jáeramo piporu kawi opaete temimonde jare tembiporu ñeräro pewa echa rami wae Tumpa umee yandewe wae. Jukuärái yanderowaicho reta yuweru pekotɨ yawe, pepuere piyepɨtaso kawi chupe reta awɨye peramɨri waerä. Jare jukuärái piyepɨtaso kawita chupe reta ñeräro opa rewa.

14Jayawe piyepɨtaso kawi piñeräro waerä. Jare piporu opaete temimonde jare tembiporu wae echa Tumpa umee yandewe wae. ¿Mbae ra ko jokua reta? Yaikuaa pëti sɨndaro uiporu jumbɨkuaa ikawi wae, jare ipɨtía yopiaka jiero pewa, jare ipɨpasa ikawi wae, jare iyeyopiaka ikawi wae, jare iñäka jɨru jiero pewa, jare ikɨsepuku wi. Jukuärái ko sɨndaro jemimonde jare jembiporu ñeräro pewa.

Jare jukuärái rami wi ko mbaembae Tumpa umee ma yandewe wae yayerepɨ kawi waerä. Jae ko kua reta: Yanderumbɨkuaarä Tumpa umee yandewe wae ko jae iñee añetete wae. Pipɨsɨ kawi jayawe jokua ñee awɨye waerä Añawasu pembɨtawɨ.

Jare pemandúa Cristo rupi ko yande ñaï Tumpa jowai yandereko mbae wae rami. Echa’ä jokua ko jae yandewe yandepɨtía yopiaka rami. Jukuärái Añawasu yanembɨjeko yawe, ndarau yayapɨsaka jese.

15Jare pe reta pikuaa kërái ñee ikawi wae pemɨmɨräta ma ko Tumpa re, echa’ä pembɨpɨakatu ma. Jáeramo piyekou jokua re, echa’ä jae ko yandepɨpasa ikawi wae rami.

16Jare yarowia yawe mbaembae Tumpa uikuaaka yandewe wae, jokua ko jae yandeyopiaka rami Tumpa umee yandewe wae. Echa’ä Añawasu jare aña reta yuweru yandekotɨ yawe, jae reta uipota urukachi jokua yarowia wae kía reta uipota ñaneñɨwo uɨ jendɨ rewe pɨpe wae rami. Jáeramo perowia pepɨa rewe Tumpa iñee re, jare jukuärái ikawita pewe pëti sɨndaro iyeyopiaka ikawi chupe wae rami. Echa’ä jokua uɨ reta opa owe wae rami oata’ä peré. Jáeramo perowaicho reta ndarau pemɨamɨri.

17Jare jekuaeño pemandúa Tumpa yanderepɨ ma ko teko yareko ikotɨ wae wi. Echa’ä jokua ko jae yanemaerä pëti äka jɨru jiero pewa rami. Jukuärái ndarau ñanemɨamɨri yandepɨayemɨngeta rupi.

Jare Tumpa umee wi yandewe Espíritu Santo rupi pëti kɨsepuku ñeräro pewa rami. Jokua ko jae Tumpa iñee etei piyerepɨ waerä pɨpe Añawasu wi.

18Jare Tumpa umee wi yandewe pëti tembiporu ye – jae ko yerure. Jayawe jekuaeño piyerure Tumpa pe. Pekañoi chupe pemborɨ waerä kërái Espíritu Santo uikuaaka oï pewe wae rupi. Jare awɨye peakɨ piyerure waerä chupe opaete kerupi ñonoï Cristo re wɨrowia wae reta re.

19-20Jare piyerure mii cheré wi Tumpa pe, echa’ä añawe che aï peresorɨru pe. Jare oñono reta wi cheré cadena, echa’ä Tumpa jee re che amɨmbeuñoi iñee ikawi wae jeko pewa. Jokua ñee tenonde yawe Tumpa uikuaaka mbae iko wae. Erëi uikuaaka ma chewe. Jáeramo yepe tëi peresorɨru pe aiporara aï, jesewe jekuaeño amɨmbeuta ko jokua ñee. Jayawe piyerure mii Tumpa pe cheré chepuere waerä jekuaeño amɨmbeu jokua ñee akɨye mbae rewe.

Pablo umbɨyapɨ itupapire

21-22Jukuärái ko che aipota aikuatía aiko pewe. Jare pepuere pikuaa waerä kërái aï kua peresorɨru pe wae, amondo aï pewe chemborɨa Tíquico jee wae. Tíquico ko jae yandehermano arowia katu jese wae. Jae wɨraa oï pewe kua tupapire aikuatía pewe wae, jare uikuaakata oï pewe che rewa, jare pemɨkɨrëɨta.

23Jayawe hermano reta, ayerure aï yandeRu Tumpa pe peré. Aeka aï chupe jare yandeYa Jesucristo pe pembɨpɨakatu waerä, jare pemborɨ piyerau päwe waerä, jare jekuaeño perowia kawi waerä jese wi.

24Tumpa tipɨakawi opaete yandeYa Jesucristo uauete wae reta pe. Jukuärái tuiko.