Josué 1 - Bible

Mbaembae Tumpa jei Josué pe wae

1Moisés uyeyokui kawi Tumpa pe. Jare jae umano ma yawe, Tumpa jei Moisés imborɨa kuimbae Nun taɨ Josué jee wae pe kuärái:

2“Chewe uyeyokui wae Moisés umano ma,” jei. “Jáeramo añawe nde ndiyeyapɨkatuta ko. Echa’ä nde nderuasata ɨ wasu Jordán rupi opaete Israel iñemoñaa reta pike waerä jokua ɨwɨ ikawiete wae pe, che amee aï pewe peɨwɨrä wae pe,” jei.

3“Kërái che jae Moisés pe wae rami, añawe che jae aï ndewe wi. Opaete pe reta peo wae rupi ameeta aï pewe peɨwɨrä,” jei.

4“Ameeta aï pewe ɨwɨ ɨwɨtini wasu wi ɨwɨtu wasu reta Líbano jee wae rewa, jare ɨ wasu tuicha Éufrates jee wae wiwe Mar Mediterráneo jee wae rewa. Jokua jare opaete heteo reta iɨwɨ wi ikota pemaerä,” jei chupe.

5“Añawe wiwe nemano rewa, mbaetɨta kía ipuere nemɨamɨri wae,” jei. “Che aïta nde ndiwe Moisés ndiwe aiko wae rami. Nomborɨta aï jare ndarau ndueya,” jei chupe.

6“Jáeramo iñemɨmɨräta ndekɨye mbae rewe, echa’ä nde nderaata neï che aiparawo wae reta jokua ɨwɨ ikawiete wae pe,” jei. “Jokua ɨwɨ che etei jae nderamɨkue reta pe ameeta aiko jae reta iñemoñaa reta pe iɨwɨrä,” jei chupe.

7“Jayawe iñemɨmɨräta ndekɨye mbae rewe,” jei. “Jare iyapo kawiñoi opaete chiñee Moisés ueya ndewe wae. Jukuärái nemɨamɨrita opaete nderowaicho reta opaete kerupi ndeo wae rupi,” jei.

8“Jekuaeño iyemboe kawi chiñee uyekuatía oï wae re. Ara rupi jare pɨ̈tu rupi iyemɨngeta ndepɨa pe jesewa jekuaeño nemandúa ndiyapo kawi waerä opaete che jae wae rupi,” jei. “Jukuärái ndikokatuta jare ikawita ndiko opaete mbaembae ndiyapo wae rupi,” jei.

9“Jayawe che jae aï ndewe kuärái: ¡Iñemɨmɨräta ndekɨye mbae rewe! Iñemɨkɨrëɨ, echa’ä che, ndeTumpa aikoño mái wae, aïta nde ndiwe opaete kerupi ndeo wae rupi.” Jukuärái jei Tumpa Josué pe.

Josué umɨmbeu Israel iñemoñaa itenondewa reta pe oota iko reta ɨwɨ Canaán pe wae

10Jaɨkue rupi Josué umbatɨ Israel iñemoñaa itenondewa reta jare jei chupe reta kuärái:

11“Pekua pere perëtáɨwa reta pe uyapɨkatu reta waerä itapekerä,” jei. “Echa’ä kua wi mbapɨ ara pe, yata yasa ñaï ɨ wasu Jordán ñapɨ̈ro waerä Canaán pewa reta wi iɨwɨ. Jokua ɨwɨ ko jae yandeTumpa ikoño mái wae jei umeeta yandewe wae.” Jukuärái Josué jei chupe reta.