Jonás 1 - Bible

Jonás osi tëi Tumpa wi

1Ɨwɨ Israel pe ime iko pëti kuimbae Jonás jee wae. Tu ko jee Amitai. Pëti ara Tumpa jei Jonás pe kuärái:

2“Iyeyapɨkatu jare ekua tëta wasu tuichaete wae Nínive jee wae pe. Joko pe emɨmbeu chupe reta kuärái: ‘Tumpa ikoño mái wae uikuaa oï tuichaete ma ko ukuakuaa pereko kachi; jáeramo uiporarakata oï pewe.’ Jukuärái emɨmbeu chupe reta,” jei Tumpa Jonás pe.

3Erëi Jonás uyapo’ä Tumpa jei wae rupi. Jae uipota tëi osi Tumpa wi. Jayawe oo mar jembeɨ kotɨ tëta wasu raɨ Jope jee wae pe. Jare joko pe oo uwäe yawe, ime iko pëti chalana wasu oë pota oo oï ɨwɨ Tarsis kotɨ. Jayawe Jonás umbɨepɨ oo waerä jae reta ndiwe, jare uyupi chalana wasu pe oo waerä mbɨrɨ Nínive wi. Joko wi chalana wasu oë oo ɨwɨ Tarsis kotɨ.

4Erëi Tumpa ombou ɨwɨtu täta wae uipeyu waerä ɨ iáramo. Jokua ɨwɨtu uyapo ɨaparoaroa tuichaete wae. Jáeramo opa pota echa ikumewa chalana wasu chuwi reta.

5Jayawe chalana wasu uruwata wae reta ukɨyete reta, jare pëti pëti wae jäse rewe uyerure reta itumpa pe. Joko wi omombo reta ɨ pe opaete tewɨta chalana wasu pe iko wae umbɨwewi waerä chalana wasu.

Erëi jokua rambuewe Jonás mbaetɨ ma joko pe oï jae reta ndiwe, echa’ä uweyɨ ma chalana wasu japɨpe jare joko pe oke oï.

6Jayawe chalana wasu uruwata wae reta itenondewa oo umbɨsareko Jonás, jare iñeeäta rewe jei chupe: “¡Epüa! ¿Ndekueri’ä pa ndeke? Iyerure ndeTumpa pe. Aramoi jae yandepararekota awɨye waerä opa yandeputupa kua mar pe,” jei chupe.

7Joko wi chalana wasu uruwata wae reta jei iyupe reta: “Yambusuerte yaikuaa waerä kía jeko pewa ra ou yandewe kua mbaesusere tuichaete wae,” jei reta. Jare umbusuerte ma reta yawe, Jonás re oa teko.

8Jáeramo upɨrandu reta Jonás pe: “Embeu orewe añawe, ¿kía jeko pewa ra ou yandewe kua mbaesusere? ¿Mbae pa ndiyapo neï kua pe? ¿Kiawi pa ndeyu neï? ¿Kía pewa pa ko nde? ¿Kía pa jae nerëtáɨwa reta?” jei reta chupe.

9Jayawe Jonás jei chupe reta: “Hebreo ko che. Che ayeyokui Tumpa ikoño mái wae pe. Jae ko opaete mar jare opaete ɨwɨ utini wae iyapoa,” jei.

10“Jae chokui tëi mbae ayapo waerä, erëi che aipota’ä ayapo ramo, asi tëi aï chuwi,” jei chupe reta.

Jayawe chalana wasu uruwata wae reta ukɨyete ye, jare jei reta chupe: “¡Ikawi’ä etei ko kua ndiyapo neï wae!” jei reta chupe.

11Jokua rambuewe jeiete uyepeyu ɨwɨtu, jare ɨaparoaroa tuichaete ukuakuaa oï. Jayawe upɨrandu reta Jonás pe: “¿Mbae ra nduyapota kua ɨwɨtu uyemboɨ waerä?” jei reta chupe.

12Jayawe Jonás jei chupe reta: “Chereki chemombo chalana wasu wi ɨ pe, jare upɨtata ɨwɨtu. Echa’ä aikuaa chereko pewa ko kua mbaesusere ou pewe,” jei chupe reta.

13Erëi uipota’ä tëi uyapo reta jokua. Jáeramo uparawɨkɨ tätaete reta wɨraa waerä tëi chalana wasu ɨembeɨ kotɨ. Erëi jekuaeño jeiete uyepeyu ɨwɨtu, jare ɨaparoaroa tuichaete ye uyeyapo. Jáeramo ipuere’ä etei omboya reta ɨembeɨ re.

14Jayawe jäse rewe uyerure reta Tumpa ikoño mái wae pe jare jei reta: “Tumpa, awɨye mii iporaraka orewe kua kuimbae nduyuka noï ramo. Awɨye mii orembɨjeko kua kuimbae imano re, echa’ä nde ndiyapo neï nde ndere wae rupi,” jei reta Tumpa pe.

15Joko wi omombo reta Jonás ɨ pe chalana wasu wi. Jare jawoi pewa opa upɨta ɨwɨtu jare ɨaparoaroa.

16Jokua uecha reta yawe, chalana wasu uruwata wae reta uipɨuete Tumpa ikoño mái wae wi. Jayawe taɨkue rupi uyuka reta mbaemɨmba umee waerä chupe. Jare pëti pëti wae jei iyupe: “Kua wiwe che ayeyokuita aï Tumpa ikoño mái wae pe,” jei reta iyupe.

17Erëi Jonás oa yawe ɨ pe, iputupa’ä, echa’ä Tumpa ombou ma pëti pira wasu uepɨ waerä Jonás. Jokua pira wasu jupiwoi omokui Jonás jekowe rewe. Joko wi Jonás upɨta jekowe rewe mbapɨ ara jare mbapɨ pɨ̈tu rupi pira wasu jɨe pe.