1 Samuel 16 - Bible

Tumpa oñono tee David iko waerä mburuwicha wasurä

1Pëti ara Tumpa jei Samuel pe: “Awɨye ma ndepɨatɨtɨ Saúl re,” jei. “Aipota’ä ma jae imeño iko waerä Israel pewa reta imburuwicha wasurä. Añawe emɨtɨnee olivo iaceite ndeɨasɨ pe jare ekua kuimbae Isaí jee wae jëta pe. Jae oï tëta wasu Belén pe. Che aiparawo ma pëti Isaí taɨ reta ipɨte wi mburuwicha wasurä,” jei chupe.

2Jare Samuel jei Tumpa pe: “Erëi che a yawe, jare mburuwicha wasu Saúl jokua uikuaa yawe, cheyukakata oï,” jei chupe.

Jayawe Tumpa jei chupe: “Eraa nde ndiwe pëti waka raɨ,” jei. “Ime kía upɨrandu ndewe yawe, ere chupe: ‘Ayu aï ayuka amee waerä Tumpa pe,’ ere chupe.

3Jare tëta wasu Belén pe ndeo newäe yawe, eparea jokua kuimbae Isaí pe too nde ndiwe piyuka pemee waerä mbaemɨmba chewe. Jayawe ramo aikuaakata ndewe mbae ndiyapota wae. Ndepɨyereta olivo iaceite jokua aikuaakata ndewe wae iñäka re niñono tee waerä chemaerä,” jei Tumpa Samuel pe.

4Jayawe Samuel uyapo woi Tumpa jei chupe wae rupi. Jare oo uwäe yawe tëta wasu Belén pe, jokua tëta wasu pewa itenondewa reta yuweru ukɨye rewe upɨrandu reta chupe: “¿Ndepɨakatu rewe pa ndeyu?” jei reta chupe.

5Jare Samuel jei chupe reta: “Chepɨakatu rewe ko ayu,” jei. “Ayu ayuka kua mbaemɨmba amee waerä Tumpa pe. Añawe pekua piyeyapɨkatu kawi, jare peyu che ndiwe yayuka mbaemɨmba ñamee waerä Tumpa pe,” jei chupe reta.

Joko wi Samuel oo uwäe Isaí jare taɨ reta ñonoï wae pe. Jare Samuel uparea chupe reta yuweru waerä jae ndiwe, jare jei chupe reta oo uyeyapɨkatu waerä. Joko wi Samuel jare ïru wae reta oë yuraa mbaerenda ita pewa oï wae pe.

6Jaɨkue miño rupi yuweru uwäe wi Isaí jare taɨ reta Samuel jare ïru wae reta ñonoï wae pe. Jare Samuel umae yawe Isaí taɨrɨpɨ Eliab jee wae re, jei iyupe: “Añetete kua ko aipo Tumpa uiparawo wae,” jei iyupe.

7Erëi Tumpa jei Samuel pe: “Awɨye emae imaepöra wae re ani ipuku wae re, echa’ä che arɨ̈ro ma Eliab. Che amae’ä ɨwɨ pewa reta umae wae rami. Opaete wae umae jae reta jowai oï wae reño, erëi che amae ipɨa re,” jei chupe.

8Jayawe Isaí ueni taɨ Abinadab jee wae uasa waerä Samuel jowai rupi. Erëi Samuel uecha Abinadab yawe, jei: “Jae’ä ko wi Tumpa uiparawo wae,” jei.

9Joko wi Isaí umbɨasa taɨ Sama jee wae Samuel jowai rupi. Erëi Samuel jei: “Jae’ä ko wi Tumpa uiparawo wae,” jei.

10Jare Isaí umbɨasa ma yawe chiu taɨ reta Samuel jowai rupi, Samuel jei Isaí pe: “Tumpa uiparawo wae mbaetɨ oï jae reta ipɨte pe,” jei chupe.

11Jare Samuel upɨrandu Isaí pe: “¿Jae reta pa opaete nderaɨ reta?” jei chupe.

Jayawe Isaí jei Samuel pe: “Uata oï pëti, cheraɨ taɨkuewaete. Erëi jae uyandareko oï owecha reta re,” jei chupe.

Jayawe Samuel jei Isaí pe: “Emondo eruruka woi, echa’ä yawapɨta’ä yakaru ndei jae uwäe mbowe,” jei chupe.

12Jawoi pewa Isaí omondo ueruruka taɨ taɨkuewa David jee wae. Jare taurusu wae ou uwäe yawe, Samuel uecha ipire pɨ̈tawe ko jare jesa maepöra. Pëti taurusu maepöraete wae ko. Jare Tumpa jei Samuel pe: “Epɨyere woi aceite iñäka re, echa’ä kua ko jae aiparawo wae,” jei chupe.

13Jayawe opaete David tɨkeɨ reta jowai, Samuel upɨyere iɨasɨ wi olivo iaceite David iñäka re. Jare jokua ara wiwe, Tumpa iEspíritu tuicha imbaepuere rewe oya David re jare usɨrɨ'ä etei chuwi. Joko wi Samuel uñatima ye oo tëta wasu Ramá pe.

14Erëi Tumpa iEspíritu usɨrɨ ma Saúl wi, jare umaeño pëti espíritu ikawi mbae wae re uiporaraka waerä chupe kɨye pe.