1 Corintios 11 - Bible

1Jayawe piko kërái che aiko Cristo jeko rupi wae rami.

Yaipɨuta ko jokua onoi mbaepuere yanderé wae wi

2Pe reta chembɨyerowia peï, echa’ä jekuaeño pemandúa peï cheré jare jekuaeño piko peï che pomboe yuapɨ ye wae rupi.

3Erëitu aipota pikuaa kawi waerä wi kua: YandeYa Cristo ime onoi mbaepuere kuimbae re. Jare kuimbae ime onoi mbaepuere kuña re. Jare yandeRu Tumpa ime onoi mbaepuere Cristo re.

4Jáeramo pe reta piyembatɨ peï yawe, jare pëti kuimbae uipota uyerure yawe Tumpa pe, tueki rani iyuwi iyakandɨo uechaka waerä uipɨu ko oï Cristo wi wae. Jae nunga wi tuyapo jae umɨmbeu oï yawe ñee Tumpa wi etei ko ou wae.

5Erëi jukuärai’ä ko kuña reta ndiwe. Echa’ä ime pëti kuña uyerure Tumpa pe oï yembatɨ pe yawe, ikawi ko uñeäkasoi waerä. Jae nunga wi tuñeäkasoi jae umɨmbeu yawe ñee Tumpa wi etei ko ou wae. Echa’ä pe reta pikuaa peï, pereko pe pëti kuña uipota’ä uñeäkasoi yawe ïru wae reta jowake, mbaetɨ ko uechaka oï uipɨu oï kuimbae wi wae. Jae uñemɨmaraka ma pëti kuña opaetei iñäka uñepëpi wae rami.

6Jayawe pëti kuña uipota’ä uñeäkasoi yawe, tuñeäpi pochɨño. Erëi jae uipota’ä uñemɨmaraka yawe, jayawe tuñeäkasoi.

7-8Erëi kuimbae reta awɨye tuñeäkasoi yembatɨ pe, echa’ä Tumpa uyapo kuimbae jae echa rami. Jare jae nunga wi kuimbae rupi yandepuere yaecha mbae ikawi wae Tumpa pewa, echa’ä Tumpa ko uyapo kuimbae. Erëi kuña reta ambɨe ye ko, echa’ä kuña Tumpa uyapo kuimbae wi. Jáeramo kuña rupi yandepuere yaecha mbae ikawi wae kuimbae pewa.

9Jae ramiño wi Tumpa mbaetɨ ko uyapo kuimbae kuña ïrurä. Tumpa uyapo kuña kuimbae ïrurä.

10Jáeramo jokua jeko pewa ikawi ko kuña reta uñeäkasoi waerä, jare jukuärái uechaka reta waerä uipɨu ko ñonoï kuimbae wi. Jokua re uyerowiata ñonoï wi araɨwa reta.

11Erëi yepe tëi kuimbae ime onoi mbaepuere kuña re, erëi mbaetɨ ikawi kuimbae wɨrɨ̈ro waerä kuña. Echa’ä yande kuimbaerä yaiko wae reta jare kuña reta pëti ramiño ko ñaï yandeYa Cristo re jare yayeko ñaï yandiyé.

12Echa’ä kuimbae wi ko Tumpa uyapo kuña tenondewaete, erëi joko wiwe kuimbae oa kuña wi. Jare mokui rewe ou Tumpa wi.

13Che aipota pe reta piyemɨngeta kawi waerä pepɨa pe kua rewa. ¿Ikawita ra pereko pe kuña reta uyerure waerä Tumpa pe uñeäkasoi mbae rewe yembatɨ pe?

14Yande reta yandepuere yayemboe kua rewa kërái mbaembae uyekuaa yandewe wae rupi. Echa’ä yaecha yawe pëti kuimbae iapuku oï wae, yae chupe pëti ñemɨmaraka ko.

15Erëi yaecha pëti kuña iapuku oï yawe, imaepöra oï yandewe. Añetete ko Tumpa etei umee kuña pe ía iñäkasoi waerä.

16Jukuärái ko che pumbɨarakuaa. Erëi ime yawe kía uipota uyeaka kua rewa wae, tuikuaa jokua ko jae ore reta orereko. Jare jukuärái wi ko opaete Cristo re wɨrowia wae reta jeko kerupi rupi uyembatɨ ñonoï wae rupi.

Uyemɨmandúa kawi’ä reta yandeYa imano re

17Jare añawe ime ye mbae re che imeta ko ambɨeta pewe wae. Jae ko kua: Pe reta piyembatɨ yawe, uyekuaa oï mbae kachiete wae ikawi wae wi.

18Echa’ä tenonde jeräkua chewe kërái pe reta piyembatɨ yawe pembutuicha waerä yandeYa jee, piyembɨyao tee tee peï peyuwi. Jare che arowia jokua añetete ko aipo uasa oï.

19Pe reta perowia chawaa peï imeta ko piyembɨyao tee tee peï peyuwi, jukuärái uyekuaa waerä kía nunga reta ra ko añetete umbɨyerowia ñonoï Tumpa wae.

20Jayawe pe reta piyembatɨ yawe piyemɨmandúa waerä yandeYa imano re, joko pe uyekuaa jokua yembɨyao jare mbaetɨ piyapo peï ikawi.

21Echa’ä amokue wae pe reta piyembɨtenonde peï ïru wae reta wi pekaru waerä. Jayawe ¿mbae ra uasa oï? Amokue wae pe reta pesawɨpo. Erëi ïru wae reta upɨta iyembaɨ.

22¡Kua ikawi’ä ko! Pipota jukuärái pekaruño yawe, jayawe pepɨta perëta peño. Ani aramoi pipotái pemɨmaraka peï ïru mbaetɨ etei mbae onoi wae reta. Aramoi mbae’ä ko pewe ïru kía kía Tumpa imaerä iko wae reta. ¿Mbae ra añawe chepuereta jae pewe? ¿Pipota ra jae pewe che ayerowia aï kua mbaembae piyapo wae re? ¡Mbaetɨ etei jukuärái!

Pablo oporomboe kërái yayemɨmandúa waerä yandeYa imano re

23Che chepuere’ä ayerowia kua mbaembae piyapo wae re, echa’ä mbaetɨ piyapo peï kërái che pomboe wae rupi. Jokua ko jae mbaembae yandeYa etei uikuaaka chewe wae. Jae ko kua: Jokua pɨare Judas umeeta iko yandeYa jowaicho reta pe yawe, yandeYa ukaru jemimboe reta ndiwe. Jare ukaru yureko reta rambuewe, yandeYa uipɨsɨ mbɨyape,

24jare umee yasurupái Tumpa pe jese. Joko wi upɨsäa mbɨyape jare jei jemimboe reta pe umbɨjaanga rewe: “Pipɨsɨ peu. Kua ko jae cherete ameeta aï peré wae. Añawe wiwe peuta kua piyemɨmandúa waerä cheré.” Jukuärái jei chupe reta.

25Jae ramiño wi opa ma ukaru reta yawe, yandeYa uipɨsɨ copa jare jei chupe reta: “Kua ko uyembɨjaanga oï Tumpa uyapota ma oï wae re. Echa’ä cheruwɨ uyepɨyereta wae rupi jae uyapo oï pëti yemɨngeta ipɨau wae jese wɨrowia wae reta pewarä. Peu kua. Jare kua wiwe opa wese rupi kua yemɨmandúa piyapo yawe, piyapota ko piyemɨmandúa rewe cheré.” Jukuärái Jesús jei chupe reta.

26Jayawe jukuärái opa wese piyembatɨ peu waerä yawe mbɨyape jare copa wi, yandeYa imano rewa ko pikuaaka peï. Jare jukuäraita ko oï yandeYa ou ye rewa.

27Jáeramo ime yawe kía mbɨyape jare copa wi jou wae, jare mbaetɨ ikawi oï ipɨa pe yandeYa kotɨ wae, jae oï teko pe. Echa’ä jae uyawɨ oï yandeYa jete jare juwɨ kotɨ etei.

28Jáeramo pëti pëti tumae kawi rani iyé etei. Jare ipɨayemɨngeta mbaetɨ yawe umbɨjeko mbae re awe, jayawe tou jokua mbɨyape jare tou copa wi. Kua ikawi yayapo waerä.

29Echa’ä ime yawe kía mbaetɨ ikawi rupi jou oï mbɨyape jare copa wi wae, ueru oï iyupe Tumpa uiporaraka chupe waerä. Echa’ä chupe waerä yandeYa jete jare juwɨ ikawi’ä maeräwe.

30Jukuärái uyapo ma jeta pepɨte pe ñonoï wae reta. Jare jokua jeko pewa ko jeta jae reta imbaerasɨ ñonoï, jare ikowe’ä ma, jare umano wi.

31Erëi yande pëti pëti wae imeta ko ñamae kawi rani yandiyé. Echa’ä jukuärái yayapo yawe, Tumpa ndarau uiporaraka yandewe.

32Erëi ime yawe mbae re Tumpa uiporarakata yandewe wae, awɨye mii yandepɨatɨtɨete jokua jeko pewa. Echa’ä yandeYa uiporaraka yandewe yawe, jokua jae uyapo yanderau rewe yanembɨarakuaa kawi waerä. Jukuärái uyapo yandeYa awɨye waerä uiporaraka yandewe jaeño mái pewa Cristo re wɨrowia mbae wae reta ndiwe.

33Jayawe hermano mii reta, opa wese piyembatɨ yawe piyemɨmandúa waerä yandeYa imano re, piñeraäro mii pekaru päwe rewe waerä.

34Jare ime yawe kía aramoi iyembaɨ oï wae, tukaru rani jëta pe, jukuärái awɨye waerä piyembatɨ pe uyembɨtenonde. Echa’ä pe reta jekuaeño piyembɨtenonde yawe ïru wae reta wi, Tumpa ipuere uiporaraka pewe jokua jeko pewa.

Jukuärái ko che pumbɨarakuaa kua mbaembae rewa. Erëi aramoi ime ambɨe mbaembae yemɨmandúa rewa yawe, che pumbɨarakuaata aï kuri a awäe pepɨ yawe.