Éxodo 16 - Bible

Tumpa umee chupe reta jembiurä ɨwɨtini wasu pe

1Joko wi opaete Israel iñemoñaa reta oë yuraa ɨwɨ Elim wi. Jayawe ɨwɨ Egipto wi oë reta wiwe mokui yasɨ seri ma uasa yawe, yuraa uwäe reta ɨwɨtini wasu Sin jee wae pe. Kua ɨwɨ oï ɨwɨ Elim jare ɨwɨtu wasu Sinaí jee wae ipäu pe.

2Joko pe ñonoï reta yawe, opaete wae umbɨpɨ ye iyengeta reta Moisés jare Aarón pe, jare jei chupe reta kuärái:

3“¡Ikawita tëi ko ndupɨtaño waerä ɨwɨ Egipto pe!” jei reta. “¡Ikawita tëi ko Tumpa upɨ̈ro waerä orerekowe ɨwɨ Egipto pe! Erëi pe reta orereru kua ɨwɨtini wasu pe orerowaruru numano waerä. Erëi ɨwɨ Egipto pe uata’ä etei iko orewe orerembiurä,” jei reta Moisés jare Aarón pe.

4Jáeramo Tumpa jei Moisés pe: “Mase, che ambouta pewe mbɨyape ara wi, roɨ oa ɨwɨ re wae rami,” jei. “Erëi opa ndimbowe rupi, opaete wae oë omonoo reta yawe iyupe, tomonoo jokua ara pewaräño. Jukuärái uyekuaata uyapota ra reta che jae aï wae rupi, ani uyapota’ä ra reta,” jei.

5“Ere chupe reta opaete semana owa ara pe tomonoo reta mokui ara pewarä,” jei Tumpa Moisés pe.

6Jayawe Moisés jare Aarón umbatɨ opaete Israel iñemoñaa reta uikuaaka waerä chupe reta Tumpa jei wae. Jare omoë iñee chupe reta kuärái: “Kua kaaru pechata Tumpa imbaepuere, jare pikuaata Tumpa ko jae pereru ɨwɨ Egipto wi wae,” jei reta.

7“Jare kuriye ndimbowe wi pechata uyekuaa pewe Tumpa imbaepuere jupi wae tembipe uwerasɨ wae rami. Jae uyandu oï piyengeta peï ikotɨ wae. Ore jaeño nduyapo noï Tumpa jei wae rupi. ¿Maera pa piyengetaete orekotɨ?” Jukuärái jei chupe reta.

8Moisés jei wi chupe reta: “Tumpa etei ko umeeta pewe soo peu waerä kaaru rupi. Jare ndimbowe rupi jae umeeta pewe jeta mbɨyape pepunga rewa. Echa’ä jae uyandu ma piyengeta ikotɨ wae. Añetete pe reta piyengeta orekotɨ yawe, Tumpa kotɨ etei ko piyengeta peï,” jei chupe reta.

9Jare Moisés jei Aarón pe: “Ere opaete Israel iñemoñaa reta pe uyembatɨ reta waerä Tumpa jowai, echa’ä jae uyandu ma iyengeta reta wae,” jei chupe.

10Jayawe Aarón uyemɨngeta iko opaete wae reta ndiwe rambuewe, uyerowa umae reta ɨwɨtini wasu kotɨ. Jare uecha reta aramoiño Tumpa imbaepuere jupi wae uyekuaa chupe reta tembipe uwerasɨ wae rami amapɨ̈tu re.

11Jare Tumpa jei Moisés pe:

12“Ayandu ma Israel iñemoñaa reta iyengeta chekotɨ wae,” jei. “Emɨmbeu chupe reta kuärái: ‘Kaaru yawe, pe reta peuta soo. Jare ndimbowe yawe, peuta jeta mbɨyape pepunga rewa. Jukuärái pikuaa kawita che ko jae peTumpa aikoño mái wae.’ Jukuärái emɨmbeu chupe reta,” jei Tumpa Moisés pe.

13Jayawe jokua kaaru woi yuweru jeta ye ye wɨra inambu echa wae reta, jare opa tɨnee ɨwɨ Israel iñemoñaa reta ñonoï wae rupi. Jare pɨarewe ndimbowe ɨsapi opa umbɨyasoi jokua ɨwɨ jae reta ñonoï wae iyɨpɨ rupi.

14Jare ɨsapi opa ma utini yawe, upɨta mbae tïi ipirëri roɨ oa wae rami, jare opa umbɨyasoi ɨwɨ.

15Jokua uecha yawe, Israel iñemoñaa reta uikuaa’ä, jare upɨrandu reta iyupe: “¿Mbae ra ko kua?” jei reta iyupe.

Jayawe Moisés jei chupe reta: “Kua ko jae mbɨyape Tumpa umee pewe perembiurä wae,” jei.

16“Tumpa jei chewe amɨmbeu waerä pewe kuärái: ‘Pemonoota ko peyupe uepitɨta pewe wae pëti ara pewaräño. Tëta iya reta tomonoo mokui kilo pëti pëti jëta pe oï wae pewarä.’ Jukuärái jei Tumpa amɨmbeu waerä pewe,” jei Moisés chupe reta.

17Jayawe jukuärái Israel iñemoñaa reta uyapo. Amokue omonoo jeta, jare ïru wae reta omonoo mbowɨño.

18Erëi umɨanga reta yawe, uepitɨ kawi opaete wae pe. Jeta omonoo iyupe wae jembɨre’ä, jare mbowɨño omonoo iyupe wae uata’ä wi. Pëti pëti wae pewarä uepitɨ kawi chupe pëti ara pe jou waerä.

19Jaɨkue rupi Moisés jei chupe reta: “Awɨye kiawe tumɨmbɨre pɨarewe pewarä,” jei chupe reta.

20Erëitu amokue wae uyapɨsaka’ä jese jare umɨmbɨre ïruwe ara pewarä. Erëi pɨarewe ndimbowe jokua umɨmbɨre wae opa jaso chuwi jare ine utimbo. Jare Moisés pochɨ chupe reta jokua re.

21Jayawe ramo opa ndimbowe rupi pëti pëti wae omonoo iyupe jokua ara pewaräño. Jare opaete mbɨyape jae reta ueya ɨwɨ re wae opa tɨkui warasɨ oë jare jaku ma yawe.

22Erëi owa ara pe ndimbowe yawe, pëti pëti Israel iñemoñaa reta omonoo iyupe irundɨ kilo mokui ara pewarä. Jare joko wi yuweru Israel iñemoñaa itenondewa reta umɨmbeu waerä Moisés pe jokua rewa.

23Jayawe Moisés jei chupe reta: “Tumpa jei yandewe kuärái: ‘Kuriye ko ara mbutuu jare uñeñono tee oï Tumpa pewarä. Jáeramo kua ndimbowe pemonoo mokui ara pewarä. Jare pemboyɨta wae pemboyɨ, jare pembupuputa wae pembupupu añawe woi. Jare opaete jembɨrekue peupi kuriye pewarä.’ Jukuärái Tumpa jei yandewe,” jei Moisés chupe reta.

24Jayawe uyapo reta kërái Moisés jei chupe reta wae rupi. Upi reta jembɨrekue pɨarewe pewarä. Jare pɨarewe pe ndimbowe yawe, uecha reta mbɨyape ine’ä chuwi reta jare jaso’ä wi.

25Jayawe Moisés jei chupe reta: “Kua ko jae perembiurä kua ara pewa, echa’ä kua ara ko jae ara mbutuu uñeñono tee Tumpa pewarä wae. Jáeramo kua ara mbaetɨta tembiu ɨwɨ re.

26Owa ara rupi imeta tembiu ɨwɨ re pemonoo waerä. Erëi chiu ara ko ara mbutuu, jare mbaetɨta tembiu jokua ara pemonoo waerä,” jei Moisés chupe reta.

27Erëitu amokue Israel iñemoñaa reta ipɨte wi oë oo omonoo waerä tëi ara chiu pe. Erëi uwäe’ä chupe mbae awe.

28Jayawe Tumpa jei Moisés pe: “Ere Israel iñemoñaa reta pe che jae chupe reta kuärái: ‘Pe reta jekuaeño piyapo’ä peï che jae pewe wae rupi.

29Amee ko pewe ara chiu peputuu waerä. Jáeramo amee aï pewe mokui wese ye tembiu pemonoo waerä ara owa pe. Jukuärái uepitɨta pewe mokui ara pewaräño. Ara chiu pe pepɨtata ko opaete perëta rupiño. Awɨye peë joko wi.’ Jukuärái jae aï chupe reta,” jei Tumpa Moisés pe umɨmbeu waerä Israel iñemoñaa reta pe.

30Jayawe joko wiwe Israel iñemoñaa reta uparawɨkɨ'ä ara chiu pe.

31Jare jokua tembiu omonoo reta wae umbɨjee reta maná. Temitɨ raɨ tïi wae rami iko. Jare ipiche jëe ngatu, mbɨyape ipirëri uyeyapo ei ndiwe wae rami.

32Jaɨkue rupi Moisés jei chupe reta: “Tumpa jei yandewe yaupi waerä maná mokui kilo yaechaka waerä ñaniñemoñaa reta pe kuri. Jukuärái jae reta uikuaata jokua tembiu Tumpa umee yandewe wae kua ɨwɨtini wasu pe, jae yandereru yawe ɨwɨ Egipto wi,” jei Moisés chupe reta.

33Jare Moisés jei Aarón pe: “Iñono maná mokui kilo uñemɨanga wae pëti mbaerɨru pe, jare eraa iñono jokua mbaerɨru Tumpa jowai. Jare tuyeupi ñaniñemoñaa reta uikuaa waerä,” jei chupe.

34Jayawe Aarón uyapo kërái Tumpa jei Moisés pe wae rupi. Jare taɨkue rupi Aarón oñono jokua mbaerɨru Tumpa arakae jei wae yemɨmandúa jɨru jowai upi waerä.

35Joko wiwe cuarenta año rupi maná iko Israel iñemoñaa reta jembiurä, yuraa uwäe reta ɨwɨ Canaán pe rewa. Joko pe ime iko mbaewɨye jae reta jou waerä.

36Mokui ñae raɨ uñemɨanga wae ko jae payandepoa re xuñemɨanga efa jee wae wi.