Levítico 16 - Bible

Tumpa jei opa año rupi pëti ara Aarón ipuere uike tupao joo jupiete ye wae japɨpe

1Aarón taɨ reta ipɨte wi umano woi mokui, echa’ä jae reta jei wae rupiño oya katu reta Tumpa re. Jáeramo Tumpa jei Moisés pe kuärái:

2“Ere nderɨkeɨ Aarón pe jaeño jokua ara che jae wae peño ipuere uike tupao joo jupiete ye wae japɨpe che jae wae yemɨmandúa jɨru oï wae pe,” jei. “Erëi ipotawe ara rupi jae uike yawe, umano woita, echa’ä che aïta amapɨ̈tu re jokua jɨru iyapeteka iáramo. Jare ndarau kiawe ipuere oya chembaepuere jupiete ye wae re, echa’ä umano woita,” jei.

3“Jayawe che aiparawo ma pëti ara opa año rupi Aarón uike waerä tupao joo jupiete ye wae japɨpe. Jare jokua ara uwäe yawe, tenonde Aarón uyuka ranita ko toro taurusu wae umee waerä chewe jae mbaembae uyawɨ chekotɨ wae re. Joko wi tuyuka jare tuapɨ owecha ani kapura kuimbae umee waerä chewe.” Jukuärái jei Tumpa Moisés pe.