Números 13 - Bible

Doce kuimbae upurupiäro wae reta

1Tumpa jei Moisés pe kuärái:

2“Emondo amokue kuimbae reta uikuaa kawi waerä ɨwɨ Canaán jee wae. Jokua ɨwɨ amee aï Israel iñemoñaa reta iɨwɨrä,” jei. “Jacob pëti pëti taɨ iñemoñaa itenondewa reta ipɨte wi emondo pëti kuimbae.” Jukuärái jei Tumpa Moisés pe.

3Jayawe Moisés uyapo Tumpa jei wae rupi. Opaete Israel iñemoñaa reta ɨwɨtini wasu Parán jee wae pe ñonoï rambuewe, Moisés uiparawo jare omondo doce kuimbae reta – pëti pëti Israel iñemoñaa itenondewa reta ko.

(4-16Jokua doce kuimbae tamɨkue reta rewa jare pëti pëti jee wae)

17Ndei omondo reta mbowe ɨwɨ Canaán kotɨ, Moisés jei rani jokua doce kuimbae reta pe kuärái: “Pekua ɨwɨ Neguev rupi peo pewäe rewa jeta ɨwɨtu wasu oï wae pe,” jei.

18“Pemae kawi opaete jokua ɨwɨ re jare jokua ɨwɨ pewa reta re pikuaa kawi waerä jae reta ipɨräta ra ani ipɨräta’ä ra, jare jeta ra reta ani mbowɨño ra reta.

19Pemae kawi wi jae reta iɨwɨ re, ¿ikawi ra ani ikawi’ä ra? Jare pemae wi jëta wasu reta re, ¿uñekëse ra oï jëta wasu reta, ani ikëse mbae ra oï?

20Jare pemae kawi wi jokua ɨwɨ re: ¿Mbaewɨye ikawi ra, ani ikawi’ä ra? ¿Jeta ra oï ɨwɨra reta, ani jeta’ä ra oï? Jayawe piyapo pepuere wae rupi peru waerä orewe amokue mbaewɨye jokua ɨwɨ pewa pecha wae.” Jukuärái jei Moisés chupe reta.

Jare jokua yasɨ rupi ko jae tenonde uva yawɨye kawi wae.

21Jayawe jokua doce upurupiäro wae reta oë yuraa uikuaa kawi waerä ɨwɨ Canaán. Umae kawi reta jokua ɨwɨtini wasu Sin jee wae wi norte kotɨ ɨwɨ Rehob jee wae rewa. Ɨwɨ Rehob oï tëta wasu Hamat jee wae jape wi koiño.

22Uike reta yawe ɨwɨ Canaán pe, yuraa ɨwɨ Neguev jee wae rupi uwäe reta tëta wasu Hebrón jee wae pe rewa. Joko pe uecha reta Anac taɨ reta Ahimán, Sesai, jare Talmai jee wae iñemoñaa reta. Jokua tëta wasu Hebrón yepe uyeyapo chiu año ndei iko mbowe tëta wasu Zoán jee wae ɨwɨ Egipto pe wae.

23Joko wi upurupiäro wae reta yuraa uwäe pëti ɨ raɨ pe. Jokua ɨwɨ rupi usɨrɨ oï ɨ raɨ jae reta umbɨjee ɨwɨ Escol. Joko pe uyasɨa reta pëti uva jäka ía rewe ikawiete wae. Jare mokui pe ueupi wɨraa reta iyatiɨ re ɨwɨra pɨpe, echa’ä jokua uva ía tuicha jare poɨ ramo. Wɨraa reta wi granada ía jare ɨwa ía jokua ɨwɨ pewa.

24Jayawe jokua ɨwɨ umbɨjee reta Escol, echa’ä jae reta uyasɨa jokua uva jäka tuicha wae joko pe ramo.

Upurupiäro wae reta ɨwɨ rewa uikuaaka wae

25-26Cuarenta ara ma uasa yawe, uñatima reta yewɨ ɨwɨ Cades jee wae kotɨ, ɨwɨtini wasu Parán jee wae pe. Joko pe ñonoï Moisés, jare Aarón, jare opaete Israel iñemoñaa reta. Jare upurupiäro wae reta umɨmbeu chupe reta uecha wae rewa, jare uechaka chupe reta jokua mbaewɨye ikawiete ɨwɨ Canaán pewa jae reta ueru wae.

27Joko wi jei reta Moisés pe: “Ndoo ma jokua ɨwɨ pe nde oremondo wae pe. Añetete jokua ɨwɨ ikawiete ye ko,” jei reta. “Mase, kua ko jae mbaewɨye ikawi wae jokua ɨwɨ pewa,” jei reta chupe.

28“Erëitu jokua ɨwɨ pewa reta ipɨrätaete reta, jare jëta wasu reta tuicha jare uñekëse kawi oï. Jare oete ye jokua wi, nduecha joko pe ñonoï kuimbae Anac iñemoñaa reta.

29Nduecha wi ñonoï ɨwɨ Neguev pe kuimbae Amalec iñemoñaa reta. Jare ñaipe reta rupi ñonoï heteo reta, jare jebuseo reta, jare amorreo reta. Jare Mar Mediterráneo jembeɨ rupi jare ɨ wasu Jordán jembeɨ rupi nduecha ñonoï cananeo reta,” jei reta chupe. Jukuärái jae reta uyemɨngeta kawi’ä jokua ɨwɨ Canaán rewa.

30Erëi pëti upurupiäro wae reta ipɨte wi, Caleb jee wae, umɨkïi jokua Moisés oï wae pe uyembatɨ ñonoï wae reta, jare jei chupe reta: “¡Ya woi ñapɨ̈ro chuwi reta yandeɨwɨrä! ¡Yandepuereta ko ñamɨamɨri reta!” jei chupe reta.

31Erëi jokua ïru kuimbae reta yuraa Caleb ndiwe wae jei reta opaete wae pe: “¡Ndarau etei yandepuere jokua yayapo, echa’ä jae reta ipɨrätaete ñonoï yandewi!” jei reta.

32Jayawe umbɨpɨ umɨmbeu kawi’ä etei reta opaete Israel iñemoñaa reta pe jare jei reta: “Jokua ɨwɨ ndoo nduecha wae, yawaieteta ko yandewe yaiko waerä joko pe,” jei reta. “Ndarau yandepuere yayerepɨ joko pe, echa’ä opaete jokua ɨwɨ pewa nduecha wae reta tuichaete yandewi.

33Nduecha wi Anac iñemoñaa reta ñonoï joko pe. Jae reta tuichaete ye ko. Jáeramo ore numae oriyé michi raɨ tuku reta rami jae reta jowai. Jae ramiño wi jukuärái jae reta umae oreré,” jei reta.