2 Reyes 25 - Bible

1Jáeramo Sedequías chau año ma iko mburuwicha wasurä yawe, payandepo yasɨ, payandepo ara pe etei Babilonia imburuwicha wasu Nabucodonosor opaete isɨndaro reta ndiwe yuweru uwäe reta tëta wasu Jerusalén kotɨ. Opa oñowa reta ye tëta wasu Jerusalén, jare uikëse reta opaete tëta wasu ikësea iyɨpɨ rupi awɨye waerä oë osi kiawe tëta wasu wi.

2Jare sɨndaro Babilonia pewa reta upɨta joko pe pëti año mbɨte ye, Sedequías once año ma iko mburuwicha wasurä rewa.

3Jayawe jokua año, irundɨ yasɨ, chau ara pe jasɨete ko karuái jokua tëta wasu pe jare mbaetɨ etei tëta wasu pewa reta jembiurä.

4Jare sɨndaro Babilonia pewa reta uitɨ tëta wasu ikësea uike yuraa reta waerä. Jayawe sɨndaro tëta wasu Jerusalén pewa reta uipota tëi oë osi chuwi reta, erëi sɨndaro Babilonia pewa reta opaetei oñowa tëta wasu. Jáeramo pɨ̈tu ma yawe, oë reta tëta wasu ikësea jöke mburuwicha wasu iko raɨ ikupe kotɨ, mokui ɨwambɨ ipäu pe oï wae rupi. Jayawe mburuwicha wasu Sedequías jare isɨndaro reta oë osi reta tëta wasu wi jare yuraa ɨwɨ ipe tuicha wae kotɨ.

5Jayawe sɨndaro Babilonia pewa reta uaɨkuemoña mburuwicha wasu Sedequías, jare wɨraa uepitɨ reta ɨwɨ ipe tuicha wae Jericó jee wae rupi, jare uipɨsɨ reta joko pe. Jare opaete Sedequías isɨndaro reta opa ueya jare opa uñemɨái reta chuwi.

6Joko wi sɨndaro Babilonia pewa reta wɨraa Sedequías mburuwicha wasu Nabucodonosor jowai, tëta wasu raɨ Ribla jee wae pe. Joko pe Nabucodonosor umae jese teko iya jare oyokui kërái uiporaraka chupe waerä.

7Jayawe Sedequías umae oï rambuewe, mburuwicha wasu Nabucodonosor uyukaka opaete Sedequías taɨ reta. Joko wi uekika Sedequías wi jesa, jare opa oñonoka cadena jiero bronce pewa pɨpe, jare wɨraaka iperesorä ɨwɨ Babilonia pe.

Opa urukachi reta tupao wasu

8Joko wi, pëti yasɨ ma uasa yawe, yasɨ pandepo chiu ara pe, diecinueve año ma Nabucodonosor iko mburuwicha wasurä ɨwɨ Babilonia pe yawe, omondo tëta wasu Jerusalén pe kuimbae ɨwɨ Babilonia pewa Nabuzaradán jee wae. Jae ko pëti kuimbae mburuwicha wasu imborɨa umbɨarakuaa wae, jare mburuwicha wasu isɨndaro reta itenondewa ko.

9Jae opa uapɨka Tumpa jëta tupao wasu, jare tëta mburuwicha wasu pewa, jare opaete Jerusalén pewa itenondewa reta jëta.

10Joko wi Nabuzaradán oyokui isɨndaro reta opa umbái waerä opaete tëta wasu Jerusalén ikësea.

11Jayawe wɨraaka ɨwɨ Babilonia pe iperesorä upɨtakue reta – jae reta ko Jerusalén pe upɨta wae reta. Jare wɨraaka wi ïru wae reta tenonde yawe jaei uñemee reta Babilonia isɨndaro reta pe wae.

12Erëi umaeño upɨta waerä ɨwɨ Judá rupi amokue ikuasɨete wae reta uyandareko waerä uvarupa reta re jare uparawɨkɨ waerä maetɨ pe.