Salmo 139 - Bible

Pëti himno David uikuatía jare umee upurumɨkätaka wae pe

1CheTumpa, nde nemae kawi chepɨa re jare chekuaaete.

2Nde ndikuaa opaete mbaembae ayapo wae. Yepe tëi chemaerä mbɨrɨ echa aï ndewi, jesewe ndikuaa opaete chepɨayemɨngeta reta.

3Jare nde ndecha neï opaete mbaembae ayapo wae. Opaete chereko nde ndikuaa kawi.

4CheTumpa, nde ndikuaa che jaeta wae ndei mbae jae mbowe.

5Cheraɨkue rupi jare cherenonde rupi nde cheñowa neï. Nembaepuere rupi cherepɨ.

6Chembɨpɨakañɨ ndearakuaa katuete ye ramo. Chepuere’ä etei aikuaa ndearakuaa, echa’ä tuichaete ye ramo.

7¿Ketɨ ra ata ndeEspíritu wi? ¿Ketɨ pa asita nderowai wi? Mbaetɨ etei ketɨ awe.

8Chepuere ayupi yawe ɨwatete ara re, joko pe neï nde. Chepuere aweyɨ yawe kɨpete ɨwɨwɨ pe umanokue wae reta ñonoï wae pe, joko pe neï wi.

9Chepuere awewe mbɨrɨete warasɨ oë wae kotɨ yawe, ani a aï waerä mbɨrɨete warasɨ uike wae kotɨ yawe,

10jokoropi awe chereruwatata jare cheyokota nembaepuere rupi.

11Che chepuere jae tëi: “¡Tañemi ndewi pɨ̈tumimbi pe! Jayawe tembipe tuyeyapo pɨ̈tumimbirä añemi waerä.”

12Erëi pɨ̈tumimbi cheñomi’ä etei nderesa wi. Echa’ä pɨ̈tu jembipe oï wae rami ko ndewe.

13Nde ko jae chapoa, jare chembɨyekuaa chesɨ jɨe pe.

14Amee ndewe yasurupái, echa’ä nde chapo ikawiete ramo. Opaete chepɨa rewe aikuaa aï nderembiapo ko ikawiete ye wae.

15Chereterä uyekuaa iko yawe, añemi’ä etei ndewi yepe tëi chesɨ jɨe pe aiko.

16Nde cherecha ndei chesɨ wi a mbowe. Nde ndikuatía ma ndetupapire pe opaete ara cherekowe rewa. Nembɨjɨsɨ opaete cheara reta ndei ayembɨpɨ mbowe.

17CheTumpa, ikawiete ye ko chewe ndepɨayemɨngeta reta, jare jetaete ye ko. Yawaiete ko aikuaa waerä ndepɨayemɨngeta rewa.

18Chepuere’ä etei aipapa ndepɨayemɨngeta reta, echa’ä jetaete ye ɨwɨkuïti mar jembeɨ rupi oï wae rami. Asareko yawe, jekuaeño aï nde ndiwe.

19Tumpa, ¡nde moná nembái jeko kachi wae reta! ¡Embɨsɨrɨ chewi upuruyuka wae reta!

20Echa’ä jae reta nderee ueniraangaiño uipɨu mbae rewe, jare pochɨ rewe uyemɨngeta kachi reta ndekotɨ.

21CheTumpa, ¿añamɨtäa’ä yerá neamɨtäa reta wae? ¿Ambowaicho’ä yerá nembowaicho wae reta?

22Che añamɨtäa reta opaete chepɨa rewe, echa’ä nderowaicho reta ko jare cherowaicho reta wi.

23CheTumpa, emae chepɨa re ndikuaa kawi waerä chepɨayemɨngeta reta re.

24Emae ime ra aramoi ikawi mbae wae chepɨa pe. Jare chereruwata tape tekowe opa mbae wae rupi.