Deuteronomio 34 - Bible

Moisés imano jare uñeñotɨ wae rewa

1Jayawe Moisés oo uyupi ɨwɨtini wasu Moab jee wae wi ɨwɨtu wasu Nebo jee wae re. Jare oo uwäe ɨwɨtu wasu iyapɨte ɨwatete wae re Pisga jee wae. Pisga tëta wasu Jericó jee wae jowai oï. Joko wi Tumpa uechaka Moisés pe ɨwɨ Canaán, ɨwɨ Galaad jee wae wi ɨwɨ Dan jee wae rewa.

2Uechaka chupe wi opaete ɨwɨ Neftalí jee wae, jare ɨwɨ reta Efraín jare Manasés jee wae reta, jare opaete ɨwɨ Judá jee wae Mar Mediterráneo jee wae rewa.

3Uechaka chupe wi ɨwɨ Neguev jee wae, ɨwɨ ipe tuicha wae tëta wasu Zoar jee wae wi tëta wasu Jericó jee wae rewa. Jokua tëta wasu Jericó jeese wi Karandaɨrenda.

4Jayawe Tumpa jei Moisés pe: “Kua ko jae ɨwɨ ikawiete wae che jae nderamɨkue reta Abraham, Isaac, jare Jacob pe ameeta aï jae reta iñemoñaa reta pe iɨwɨrä,” jei. “Aechaka ma ndewe, erëi ndiketa’ä neï kua ɨwɨ ikawiete wae pe,” jei chupe.

5Jare jokua ɨwɨtini wasu Moab pe, Moisés Tumpa pe uyeyokui wae umano kërái Tumpa uikuaaka chupe wae rupi.

6Jare Tumpa oñotɨ Moisés jetekue ɨwɨ Moab pe, pëti ñuu tëta wasu Bet-peor jee wae wi koiño oï wae pe. Erëi kiawe uikuaa’ä oï kiape etei uñeñotɨ wae añawe rewa.

7Moisés 120 año wɨreko umano yawe. Jare yepe tëi indechi iko, jesewe jekuaeño ipɨräta jare jesa kawi.

8Jayawe ɨwɨ ipe tuicha wae Moab pe, opaete Israel iñemoñaa reta tuicha ipɨatɨtɨ, jare uyao uapïro reta Moisés imano re pëti yasɨ rupi. Jukuärái ko jae reta jeko imburuwicha umano yawe.

9Ndei Moisés umano mbowe, oñono ipo Josué iñäka re. Jokoropi Tumpa umee Josué pe iyarakuaa katu waerä Espíritu Santo rupi. Jáeramo Israel iñemoñaa reta uyapɨsaka Josué jei wae re, jare uyapo reta opaete jokua mbaembae Tumpa jei Moisés pe wae.

10Jayawe mbaetɨ ye iko ïru kuimbae Tumpa iñee umɨmbeu wae Moisés rami Israel iñemoñaa reta ipɨte wi, echa’ä Tumpa uyemɨngeta Moisés ndiwe oyowai etei.

11Mbaetɨ ye iko ïru kuimbae Tumpa iñee umɨmbeu wae uyapo mbaembae Tumpa imbaepuere rupi wae Moisés uyapo wae rami. Tumpa omondo Moisés ɨwɨ Egipto pe yawe, omondo uyapo waerä mbaembae kía ipuere mbaei uyapo wae mburuwicha wasu jowai, imborɨa umbɨarakuaa wae reta jowai, jare opaete ɨwɨ Egipto pewa reta jowai wi.

12Moisés rupi Tumpa uechaka wi opaete Israel iñemoñaa reta pe imbaepuere tuichaete jare kɨyete pewa.