Apocalipsis 7 - Bible

Tumpa umɨseñara 144.000 wae reta

1Jare kua jaɨkue rupi aecha irundɨ araɨwa reta uyemboɨ ñonoï ɨwɨ pe. Pëti uyemboɨ oï warasɨ oë wae kotɨ, jare ïru uyemboɨ oï warasɨ uike wae kotɨ. Ïru uyemboɨ oï norte kotɨ, jare ïru uyemboɨ oï sur kotɨ. Jare jae reta oyopia yureko irundɨ kotɨ kotɨ wi ɨwɨtu uyepeyu wae, awɨye waerä ɨwɨtu uyepeyu ɨwɨ re, jare mar re, jare ɨwɨra reta re.

2Kua araɨwa reta pe uñemee ma mbaepuere urükumewa waerä ɨwɨ jare mar.

Jare aecha ïru araɨwa uyupi oo oï ara kotɨ warasɨ oë wae kotɨ wi. Jare aecha ipo pe wɨraa pëti marka – jokua ko jae Tumpa ikoño mái wae imarka. Jokua pɨpe araɨwa umɨseñarata iko Tumpa uiparawo wae reta.

3Jare kua araɨwa usapɨkai rewe jei jokua irundɨ araɨwa reta pe: “Awɨye perükumewa ɨwɨ, jare mar, jare ɨwɨra reta ndei amɨseñara mbowe yandeTumpa pe uyeyokui wae reta jesɨwa pe,” jei chupe reta. Jayawe joko wi araɨwa oo upurumɨseñara.

4Jare oo ma opa umɨseñara yawe, che ayandu mbowɨ ko Tumpa pe uyeyokui wae reta araɨwa opa umɨseñara wae. Umɨseñara 144.000 Israel iñemoñaa reta.

5Judá iñemoñaa reta wi umɨseñara 12.000.

Rubén iñemoñaa reta wi umɨseñara 12.000.

Gad iñemoñaa reta wi umɨseñara 12.000.

6Aser iñemoñaa reta wi umɨseñara 12.000.

Neftalí iñemoñaa reta wi umɨseñara 12.000.

Manasés iñemoñaa reta wi umɨseñara 12.000.

7Simeón iñemoñaa reta wi umɨseñara 12.000.

Leví iñemoñaa reta wi umɨseñara 12.000.

Isacar iñemoñaa reta wi umɨseñara 12.000.

8Zabulón iñemoñaa reta wi umɨseñara 12.000.

José iñemoñaa reta wi umɨseñara 12.000.

Jare Benjamín iñemoñaa reta wi umɨseñara 12.000.

Jeta ye ye jemimonde tïi wae reta ñonoï Tumpa iwapɨa jowai

9Kua jaɨkue rupi aecha jetaete ye ye opaete kerupi rupi yureko wae reta jare opa kërái raí ñee pe uyemɨngeta wae reta. Jae reta uyemboɨ ñonoï jokua mburuwicha wasu iwapɨa jowai jare Owecha kuimbae taurusu wae jowai. Mbaetɨ kiawe ipuere opa uipapa reta, echa’ä jetaete ye ramo. Jae reta jemimonde tïi, jare ipo pe onoi reta karandaɨ jokɨ.

10Jare usapɨkai rewe jei reta:

“¡Yanderepɨ ma kua yandeTumpa uwapɨ oï iwapɨa mburuwicha wasu pewa pe wae jare Owecha kuimbae taurusu wae!” jei reta.

11Jare opaete araɨwa reta uyemboɨ ñonoï jokua mburuwicha wasu iwapɨa jare jokua mburuwicha reta jare jokua irundɨ mbae tekowe onoi wae reta iyɨpɨ rupi. Jayawe jae reta uñeñono ɨwɨ re uñemɨmichi rewe mburuwicha wasu iwapɨa jowai jare umbutuicha reta Tumpa jee.

12Jare jei reta:

“¡Jukuärái tuiko! Nde oreTumpa, numee yasurupái tuicha ndewe.

Ndeñoete nenoi opaete arakuaa, mɨräta, jare mbaepuere.

Jupi ko opaete wae uipɨu waerä ndewi jare umbutuicha reta waerä nderee jaeño mái pewa.

¡Jukuärái tuiko!” jei reta.

13Jayawe pëti wae jokua mburuwicha upɨrandu chewe: “¿Ndikuaa pa kua jemimonde tïi wae reta jare ketɨ wi ra yuweru?” jei.

14“Aikuaa’ä etei. Nde ndikuaa,” jae chupe.

Jayawe jae jei chewe: “Kua reta ko jae uasa mbaesusere wasu rupi wae. Oyoe ma reta jemimonde jare umɨtïi reta Owecha kuimbae taurusu wae juwɨ pe,” jei.

15“Jáeramo añawe ñonoï reta Tumpa joo pe iwapɨa jowai uyeyokui reta waerä chupe ara rupi jare pɨ̈tu rupi,” jei. “Jare jokua imburuwicha wasu iwapɨa pe uwapɨ oï wae uyandarekota oï jese reta.

16Jáeramo ndarau ye ma jae reta iyembaɨ jare iɨwe. Jare ndarau ye ma warasɨ jasɨ chupe reta jare araku wi.

17Echa’ä Owecha kuimbae taurusu wae wapɨa mburuwicha wasu pewa pe oï wae uyandarekota oï jese reta. Jare jae wɨraata oï reta ɨkua ɨwororo jekuaeño oë wae pe, joko pe jou reta waerä ɨ tekowe umee wae. Jare Tumpa etei oyoeta jesaɨ chuwi reta.” Jukuärái jokua mburuwicha jei chewe.