Malaci 2 - The Minor Prophets 1881 (John Davies, Ietwen)

PEN. II.—

1Ac yn awr,

Atoch chwi yr offeiriaid y mae y gorchymyn hwn.

2Oni wrandewch ac onid ystyriwch,

I roddi gogoniant i’m henw I,

Medd Arglwydd y lluoedd;

Yna yr anfonaf yn eich plith y felldith;

Ac a felldithiaf eich bendithion:

A mi a’u melldithiais hefyd;

Am nad oeddech yn ystyried.

3Wele fi yn atal i chwi yr hâd;

A thaenais dom ar eich wynebau;

Tom eich gwyliau:

A chymerir chwi iddo.

4A chewch wybod ddanfon o honof atoch;

Y gorchymyn hwn;

I fod yn gyfamod i mi â Lefi;

Medd Arglwydd y lluoedd.

5Fy nghyfamod ag ef oedd fywyd a hawddfyd;

A rhoddais hwynt iddo am

ofn,

Ac efe a’m hofnodd I:

A rhag fy enw yr arswydodd efe.

6Cyfraith gwirionedd fu yn ei enau;

A thwyll ni chafwyd yn ei wefusau ef:

Mewn perffeithrwydd ac uniondeb y rhodiodd gyda mi;

A llawerodd a drodd efe oddiwrth anwiredd.

7Canys gwefusau offeiriad a gadwant wybodaeth;

A chyfraith a geisiant o’i enau ef:

O herwydd cenad Arglwydd y lluoedd yw efe.

8A chwithau a wyrasoch allan o’r ffordd;

Parasoch i laweroedd dramgwyddo yn y gyfraith;

Torasoch gyfamod y Lefiad;

Medd Arglwydd y lluoedd.

9A minau hefyd a’ch gwnaethum chwithau yn ddirmygedig ac isel gan yr holl bobl:

Yn gymaint ag nas cadwasoch fy ffyrdd I,

A derbyn o honoch wynebau yn y gyfraith.

10Onid un Tad sydd i ni oll;

Onid un Duw a’n creodd ni:

Paham y gwnawn yn anffyddlon un a’i frawd;

I halogi cyfamod ein tadau.

11Twyllodrus fu Judah;

A ffieidd-dra wnaed yn Israel ac yn Jerusalem:

Canys halogodd Judah gysegr yr Arglwydd yr hwn a hoffa;

Ac a briododd ferch duw dieithr.

12Yr Arglwydd a dyr ymaith y gwr a wna hyn yn wyliedydd ac atebydd;

O bebyll Jacob:

Ac yn offrymydd offrwm;

I Arglwydd y lluoedd.

13A hyn eilwaith a wnaech;

Cuddio allor yr Arglwydd â dagrau;

Wylofain a chwynfan;

Fel nad edrycho mwyach ar yr offrwm;

A chymeryd o’ch llaw yr hyn a fyddai foddhaol.

14A chwi a ddywedwch am beth:

Am fod yr Arglwydd yn dyst rhyngot ti a gwraig dy ieuenctyd,

Yr hon y buost ti anffyddlon iddi;

A hithau yn gydymaith iti,

Ac yn wraig dy gyfamod.

15* * *

* * * *

* *

* * *

A gwyliwch ar eich ysbryd,

Ac â gwraig dy ieuenctyd na wna yn dwyllodrus.

16Canys yr wyf yn cashau rhoi ymaith,

Medd Arglwydd Dduw Israel,

A chuddio trais ar wisg un;

Medd Arglwydd y lluoedd:

A gwyliwch ar eich ysbryd,

Ac na fyddwch dwyllodrus.

17Blinasoch yr Arglwydd â’ch geiriau;

A dywedasoch,

Yn mha beth y blinasom Ef:

Trwy ddywedyd o honoch,

Pob gwneuthurwr drygioni sydd dda yn ngolwg yr Arglwydd,

Ac ynddynt hwy yr ymhyfryda Efe;

Neu pa le y mae Duw y farn.