Zechariah 14 - The Minor Prophets 1881 (John Davies, Ietwen)

1Wele ddydd i’r Arglwydd yn dyfod:

A rhenir dy ysbail yn dy ganol.

2A mi a gasglaf yr holl genedloedd i Ierusalem i ryfel;

A chymerir y ddinas,

Ac anrheithir y tai;

A’r gwragedd a dreisir:

A haner y ddinas a â allan mewn caethiwed;

A gweddill y bobl;

Nis torir ymaith o’r ddinas.

3A’r Arglwydd a â allan;

Ac a ryfela â’r cenedloedd hyny:

Megys y dydd y rhyfeloedd efe yn nydd y frwydyr.

4A’i draed a safant yn y dydd hwnw ar fynydd yr Olewydd,

Yr hwn sydd ar gyfer Ierusalem o’r tu dwyrain:

A holltir mynydd yr Olewydd o’i haner tua’r dwyrain a thua’r gorllewin,

Yn ddyffryn mawr iawn:

A haner y mynydd a symud tua’r gogledd,

A haner iddo tua’r deheu.

5A chwi a ffowch i ddyffryn fy mynyddoedd,

Canys cyrhaedd dyffryn mynyddoedd i Atsal;

A chwi a ffowch fel y ffoisoch rhag y ddaeargryn;

Yn nyddiau Uzziah brenin Iudah:

A daw yr Arglwydd fy Nuw;

Yr holl rai santaidd gyda thi.

6A bydd yn y dydd hwnw:

Na bydd goleuni;

Rhai gwychion a ymataliant.

7A bydd un diwrnod,

Hwnw a adwaenir gan yr Arglwydd,

Nid dydd ac nid nos:

A bydd at bryd hwyr y bydd goleuni.

8A bydd yn y dydd hwnw,

Yr ant allan ddyfroedd bywiol o Ierusalem;

Eu haner hwynt tua môr y dwyrain;

A’u haner hwynt tua môr y gorllewin:

Yn yr hâf ac yn y gauaf y bydd.

9A bydd yr Arglwydd yn frenin ar yr holl dir:

Yn y dydd hwnw,

Yr Arglwydd yn unig fydd,

A’i enw yn unig.

10Troir yr holl dir megys gwastadedd o Geba i Rimon;

Ar ddeheu Ierusalem:

A hi a gyfyd ac a erys yn eu lle,

O borth Beniamin hyd le y porth cyntaf,

Hyd borth y conglau;

A o dwr Chananeel,

Hyd gafnau gwin y brenin.

11A thrigir ynddi;

A melldith ni bydd mwyach;

A Ierusalem a erys mewn diogelwch.

12A hyn fydd y pla;

A’r hwn y tery yr Arglwydd yr holl bobloedd;

Y rhai a wersyllant yn erbyn Ierusalem:

Cnawd un a dderfydd,

Ac yntau yn sefyll ar ei draed;

A’i lygaid a ddarfyddant yn eu tyllau,

A’u tafod a dderfydd yn eu genau.

13A bydd yn y dydd hwnw;

Y bydd dychryn mawr oddiwrth yr Arglwydd yn eu plith hwynt:

Ac ymaflant un yn llaw ei gymydog.

A’i law a gyfyd yn erbyn llaw ei gymydog.

14A Iudah hefyd a ryfela yn Ierusalem:

A chesglir golud yr holl genedloedd o amgylch,

Yn aur ac arian a dillad lawer iawn.

15Ac felly y bydd pla y march, y mul, y camel, a’r asyn,

A phob anifail;

Yr hwn a fydd yn y gwersylloedd hyn: Fel y pla hwn.

16A bydd i bawb ag a weddillwyd o’r holl genedloedd;

Y rhai a ddaethant yn erbyn Ierusalem;

I fyned i fyny o flwyddyn i flwyddyn,

I ymgrymu i’r Brenin Arglwydd y lluoedd;

Ac i gadw gwyl y pebyll.

17A bydd ar y sawl nad elo i fyny o deuluoedd y wlad i Ierusalem;

I ymgrymu i’r Brenin Arglwydd y lluoedd:

Na bydd y gwlaw arnynt.

18Ac os teulu yr Aipht nid â i fyny ac ni ddaw,

Ni bydd arnynt hwy:

Y pla fydd a’r hwn y tery yr Arglwydd y cenedloedd;

Y rhai nid ant i fyny i gadw gwyl y pebyll.

19Hyn fydd pechod yr Aipht:

A phechod yr holl genedloedd;

Y rhai nid ant i fyny;

I gadw gwyl y pebyll.

20Yn y dydd hwnw,

Y bydd ar glychau y march:

SANTEIDDRWYDD i’r ARGLWYDD:

A bydd y crochanau yn nhŷ yr Arglwydd,

Fel y cawgiau gerbron yr allor.

21A bydd pob crochan yn Ierusalem ac yn Iudah,

Yn SANTEIDDRWYDD i ARGLWYDD y lluoedd

A’r holl aberthwyr a ddeuant;

Ac a gymerant o honynt ac a ferwant ynddynt:

Ac ni bydd Canaanead mwyach yn nhŷ Arglwydd y lluoedd,

Yn y dydd hwnw.