Amos 7 - The Minor Prophets 1881 (John Davies, Ietwen)

PEN. VII.—

1Fel hyn y dangosodd yr Arglwydd Iôr i mi;

Ac wele efe yn ffurfìo locustiaid;

Pan ddechreuodd yr atdwf godi:

Ac wele atdwf wedi lladdiadau gwair y brenin oedd.

2A bu pan ddarfuwyd bwyta glaswellt y ddaear;

Y dywedais,

Arglwydd Iôr arbed attolwg;

Pwy a gyfyd Jacob;

Canys bychan yw efe.

3Tosturiodd yr Arglwydd wrth hyn:

Ni bydd medd yr Arglwydd.

4Fel hyn y dangosodd yr Arglwydd Iôr i mi;

Ac wele yr Arglwydd Iôr yn galw am farn drwy dân:

Ac efe a ddifaodd y dyfnder mawr;

Ac a ddifaodd y tir.

5A mi a ddywedais,

Arglwydd Iôr paid, attolwg;

Pwy a gyfyd Jacob: Canys bychan yw efe.

6Tosturiodd yr Arglwydd wrth hyn:

Ni bydd hyn, hefyd;

Medd yr Arglwydd Iôr.

7Fel hyn y dangosodd efe i mi;

Ac wele yr Arglwydd yn sefyll ar fûr syth;

Ac yn ei law blwmed.

8A’r Arglwydd a ddywedodd wrthyf,

Beth a weli di, Amos;

A mi a ddywedais, Plwmed:

A dywedodd yr Arglwydd,

Wele myfi yn gosod plwmed yn nghanol fy mhobl Israel:

Ni chwanegaf fyned heibio iddynt mwyach.

9A dinystrir uchelfëydd Isaac;

A chysegroedd Israel a anrheithir,

A mi a gyfodaf yn erbyn tŷ Jeroboam â’r cleddyf.

10Ac Amasiah offeiriad Bethel a anfonodd at Jeroboam brenin Israel, gan ddywedyd, bradfwriadodd Amos i’th erbyn yn nghanol tŷ Israel; ni ddichon y tir ddyoddef ei holl eiriau ef.

11Canys fel hyn y dywedodd Amos:

Jeroboam a fydd farw trwy y cleddyf:

Ac Israel yn ddiau a gaethgludir allan o’i wlad.

12A dywedodd Amasiah wrth Amos:

Weledydd, dos, ffo i wlad Judah:

A bwyta fara yno!

Ac yno proffwyda.

13Ac yn Bethel;

Na chwanega broffwydo mwyach:

Canys cysegr brenin ydyw hi;

A llys teyrnas ydyw hi.

14Ac Amos a atebodd ac a ddywedodd wrth Amaziah;

Nid proffwyd oeddwn i;

Ac nid mab i broffwyd oeddwn i:

Canys bugail oeddwn i a thriniwr sycamorwydd.

15A’r Arglwydd a’m cymerodd i;

Oddiar ol y praidd:

A’r Arglwydd a ddywedodd wrthyf;

Dos, proffwyda i’m pobl Israel.

16Ac yn awr gwrando air yr Arglwydd:

Ti a ddywedi na phroffwyda yn erbyn Israel;

Ac na ddefnyna air yn erbyn tŷ Isaac.

17Am hyny fel hyn y dywedodd yr Arglwydd,

Dy wraig a buteinia yn y ddinas;

A’th feibion a’th ferched a syrthiant drwy y cleddyf;

A’th dir a renir wrth linyn:

A thithau,

Byddi farw mewn tir halogedig;

Ac Israel,

A gaethgludir yn ddiau allan o’i wlad.