Tsephanïah 3 - The Minor Prophets 1881 (John Davies, Ietwen)

1Gwae yr wrthryfelgar a halogedig:

Y ddinas orthrymus.

2Ni wrandawodd ar lef;

Ni chymerodd addysg:

Yn yr Arglwydd nid ymddiriedodd;

At ei Duw ni nesäodd.

3Ei thywysogion o’i mewn;

Sydd yn llewod rhuol:

Ei barnwyr yn fleiddiau hwyr;

Ni weddillant erbyn y boreu.

4Ei phroffwydi ydynt feilchion;

Yn wŷr twyllodrus:

Ei hoffeiriaid a halogasant yr hyn oedd gysegredig;

Treisiasant gyfraith.

5Yr Arglwydd sydd uniawn yn ei chanol;

Ni wna anwiredd:

Bob boreu y rhydd ei farn yn oleu,

Ni pheidia;

Ond anwiredd ni fedr gywilyddio.

6Torais ymaith genedloedd,

Dinystriwyd eu tyrau hwynt;

Diffaethais eu heolydd hwynt rhag a dramwyai:

Anghyfaneddwyd eu dinasoedd hwynt,

Rhag bod dyn, rhag bod preswylydd.

7Dywedais,

Yn ddiau ti a’m hofni, derbyni addysg;

Fel na thorer ymaith ei thrigfa;

Y cwbl ag a osodais arni:

Er hyny codasant yn foreu,

Llygrasant eu holl weithredoedd.

8Gan hyny dysgwyliwch wrthyf fi,

Medd yr Arglwydd;

At y dydd y cyfodwyf i’r ysglyfaeth:

Canys fy marn I sydd i gynull cenedloedd,

I gasglu o honof deyrnasoedd,

I dywallt arnynt fy llid, holl angerdd fy nigofaint;

Canys â thân fy eiddigedd yr ysir yr holl wlad.

9O herwydd yna yr adferaf i bobloedd wefus bur:

I alw o bawb o honynt ar enw yr Arglwydd;

I’w wasanaethu ef âg un ysgwydd.

10O’r tu hwnt i afonydd Ethiopia:

Fy ngweddïwyr y rhai a wasgarwyd genyf;

A ddygant fy offrwm.

11Yn y dydd hwnw ni’th gywilyddir am dy holl weithredoedd;

Trwy y rhai y pechaist i’m herbyn;

Canys yna y symudaf o’th blith,

Y rhai a lawenychant yn dy ddyrchafiad;

Ac ni chwanegi ymddyrchafu mwyach yn fy mynydd santaidd.

12A gweddillaf yn dy ganol di,

Bobl ostyngedig a thlodion;

Ac yn enw yr Arglwydd y gobeithiant.

13Gweddill Israel ni wnant anwiredd,

Ac ni ddywedant gelwydd;

Ac ni cheir yn eu genau hwynt dafod twyllodrus:

Canys hwy a borant ac a orweddant,

Ac ni bydd a’u tarfo.

14Cân, ferch Sïon;

Crechwena, Israel:

Llawenycha a gorfoledda â’r holl galon;

Oh, ferch Jerusalem.

15Trodd yr Arglwydd ymaith dy farnau;

Dinystriodd dy elynion:

Yr Arglwydd brenin Israel sydd yn dy ganol;

Ni weli ddrwg mwyach.

16Yn y dydd hwnw;

Y dywedir wrth Jerusalem,

Nac ofna;

Sïon, na laesed dy ddwylaw.

17Yr Arglwydd dy Dduw sydd yn dy ganol di yn gadarn,

Efe a achub:

Efe a lawenycha o’th blegid gan lawenydd,

Efe a ymlonydda yn ei gariad;

Efe a orfoledda o’th blegid gan lawenydd.

18Casglaf y rhai o honot sydd brudd am y gymanfa:

Gwae am ddwyn arni waradwydd.

19Wele fi yn gwneuthur yn yr amser hwnw i’th holl gystuddwyr:

Ac a achubaf y gloff,

A’r darfedig a gasglaf:

Ac a’u gosodaf yn foliant ac yn enw;

Yn holl dir eu gwarth.

20Yn yr amser hwnw y dygaf chwi;

Ac yn yr amser y casglaf chwi:

Y rhoddaf chwi yn enw ac yn foliant,

Yn mysg holl bobloedd y ddaear;

Pan ddychwelwyf eich caethiwed chwi o flaen eich llygaid,

Medd yr Arglwydd.