Hosea 12 - The Minor Prophets 1881 (John Davies, Ietwen)

PEN. XII.—

1Ephraim a’m hamgylchodd â chelwydd;

A thy Israel â thwyll:

[A Judah hefyd sydd yn crwydro oddiwrth Dduw;

Ac oddiwrth yr un Santaidd ffyddlon. Dathe.]

[Eto Judah llywodraetha di o hyd gyda Duw,

A thi bobl y saint bydd ffyddlon. Dr. R. Williams.]

[A Judah sydd hyd yn hyn yn ansefydlog gyda Duw,

Gyda yr un ffyddlon Santaidd. Schmoller.

]

2Ephraim sydd yn ymborthi ar wynt,

Ac yn dilyn gwynt y dwyrain;

Ar hyd y dydd celwydd a dinystr a amlha efe:

A chyfamod âg Assur a wnant,

Ac olew a ddygir i’r Aipht.

3Ac y mae i’r Arglwydd gwyn ar Judah:

Ac y mae i ymweled â Jacob yn ol ei ffyrdd;

Yn ol ei weithredoedd y tâl iddo.

4Yn y groth y disodlodd ei frawd:

Ac yn ei nerth yr ymdrechodd â Duw.

5Ac efe a ymdrechodd ag angel a gorchfygodd;

Wylodd ac ymbiliodd ag ef:

Cafodd ef yn Bethel;

Ac yno yr ymddyddanodd ag ef.

6A Jehovah Duw y lluoedd:

Jehovah yw ei goffadwriaeth ef.

7A thithau tro gyda’th Dduw:

Cadw drugaredd a barn;

A dysgwyl wrth dy Dduw bob amser.

8Yn farchnatäwr,

Yn ei law y mae clorianau twyllodrus,

Da ganddo orthrymu.

9A dywed Ephraim;

Diau mi a ymgyfoethogais;

Cefeis i mi olud:

Yn fy holl gynyrch ni chafwyd yn fy erbyn fai a fyddai yn bechod.

10A mi yr Arglwydd dy Dduw o wlad yr Aipht;

Gwnaf i ti drigo mewn pebyll megys ar ddyddiau cymanfa.

11A mi a lefarais wrth y proffwydi;

A myfi a roddais aml weledigaeth:

A thrwy y proffwydi yr arferais gyffelybiaethau.

12Os bu Gilead yn anwireddus,

Twyllodrus yn ddiau fuont yn Gilgal;

Ychain a aberthasant:

Eu hallorau hefyd sydd fel carneddau;

Ar rychau maes.

13A ffodd Jacob i wlad Aram:

A gwasanaethodd Israel am wraig;

Ac am wraig y bu yn bugeilio.

14A thrwy broffwyd y dygodd yr Arglwydd Israel i fynu o’r Aipht:

A thrwy broffwyd y cadwyd ef.

15Ephraim a barodd ddigofaint chwerw:

A’i waed a adewir arno;

A’i waradwydd a ddychwel ei Arglwydd arno.