Micah 1 - The Minor Prophets 1881 (John Davies, Ietwen)

PEN. I.—

1Gair yr Arglwydd yr hwn a fu at Micah, y Morasthiad, yn nyddiau Jotham, Achas, Hizciah, breninoedd Judah: yr hwn a welodd am Samaria a Jerusalem.

2Gwrandewch, bobloedd, oll o honynt;

Clyw, wlad a’i chyflawnder:

A bydd yr Arglwydd Iôr yn dyst yn eich erbyn;

Yr Arglwydd o’i deml santaidd.

3Canys wele yr Arglwydd yn dyfod allan o’i le:

Ac efe a ddisgyn ac a sathr ar uchelderau daear.

4A’r mynyddoedd a doddant dano ef;

A’r glynoedd a ymholltant:

Fel y cwyr o flaen y tân;

Fel dyfroedd a dywalltwyd ar y gorwaered.

5Am anwiredd Jacob y mae hyn i gyd;

Ac am bechodau tŷ Israel:

Beth yw anwiredd Jacob,

Onid Samaria;

A pheth yw uchelfeydd Judah;

Onid Jerusalem.

6A gosodaf Samaria yn garnedd y maes,

Yn blanfeydd gwinllan:

A gwnaf i’w cherig dreiglo i’r dyffryn;

A dadguddiaf ei sylfaeni.

7A’i holl ddelwau cerfiedig a ddryllir,

A’i holl wobrau a losgir yn tân;

A’i holl eilunod a osodaf yn anrhaith:

O herwydd mai o wobr putain y casglodd hi;

Yn wobr putain yr ant eto.

8O herwydd hyn y galaraf ac y cwynaf;

Cerddaf yn ddiosgedig ac yn noeth:

Gwnaf gwynfan fel y dreigiau:

A griddfanaf fel cywion estrys.

9O herwydd anwelladwy yw ei harchollion hi;

Canys daeth hyd at Judah;

Cyrhaeddodd hyd at borth fy mhobl, Hyd at Jerusalem.

10Yn Gath na fynegwch;

Gan wylo nac wylwch:

Yn Beth Aphra,

Ymdreigla yn y llwch.

11Dos trosodd, breswyles Shaphir, yn noeth dy warth:

Nid aeth preswyles Saanan allan;

Galar Beth Hasel,

A gymer oddiwrthych ei chynorthwy.

12Preswyles Maroth yn ddiau a ddysgwyliodd am ddaioni:

Canys drwg a ddisgynodd oddiwrth yr Arglwydd;

Hyd borth Jerusalem.

13Rhwym y cerbyd wrth y buan-farch, breswyles Lachis:

Dechreuad pechod fu hi i ferch Sion;

Canys ynot ti y cafwyd anwireddau Israel.

14Am hyny y rhoddi ollyngdod;

Ar Moresheth Gath.

Tai Aczib a fyddant yn gelwydd;

I freninoedd Israel.

15Hefyd mi a ddygaf etifedd i ti, breswyles Maresha:

Hyd Adulam y daw gogoniant Israel.

16Ymfoela ac ymeillia;

Am dy feibion moethus:

Lleda dy foelni fel yr eryr;

Canys caethgludwyd hwynt oddiwrthyt.