Zechariah 7 - The Minor Prophets 1881 (John Davies, Ietwen)

PEN. VII.—

1A bu yn y bedwaredd flwyddyn i Darius y brenin, y bu gair yr Arglwydd at Zecharïah ar y pedwerydd o’r mis, y nawfed, yn Cislef.

2Ac anfonodd Bethel Sharetser, Regem Melec a’i wŷr i ymbil am wyneb yr Arglwydd

3gan ddywedyd wrth yr offeiriaid y rhai oeddent wrth dŷ Arglwydd y lluoedd; ac wrth y prophwydi, gan ddywedyd: A wylaf fi yn y pumed mis i ymatal fel y gwnaethum bellach gynifer o flynyddoedd.

4,5A bu gair Arglwydd y lluoedd ataf gan ddywedyd: dywed wrth holl bobl y wlad ac wrth yr offeiriaid gan ddywedyd:

Ddarfod ymprydio o honoch a galaru ar y bumed a’r seithfed,

A hyn ddeng mlynedd a thriugain;

Ai i mi yr ymprydiasoch,

I mi,

6A phan fwytaech a phan yfech;

Onid y chwi oeddech yn bwyta,

A chwi oeddech yn yfed.

7Onid hyn

y geiriau,

Y rhai a gyhoeddodd yr Arglwydd trwy y proffwydi gynt;

Pan oedd Jerusalem yn aros ac yn esmwyth;

A’i dinasoedd o’i hamgylch:

A’r deheudir a’r gwastad-dir yn cael ei gyfaneddu.

8A bu gair yr Arglwydd at Zechariah gan ddywedyd;

9Fel hyn y dywedodd Arglwydd y lluoedd gan ddywedyd;

Bernwch farn gywir;

A thrugaredd a thosturi;

Gwnewch bob un i’w frawd.

10A gweddw ac amddifad,

A dieithr a thlawd na orthrymwch:

A drwg gan un i’w frawd;

Na feddyliwch yn eich calonau.

11A gwrthodasant wrando;

A rhoddasant ysgwydd anhydyn:

A’u clustiau a drymasant rhag clywed.

12A’u calonau a wnaethant yn adamant,

Rhag clywed y gyfraith a’r geiriau,

Y rhai a anfonodd Arglwydd y lluoedd trwy ei ysbryd;

Yn llaw y proffwydi gynt:

A bu digofaint mawr oddiwrth Arglwydd y lluoedd.

13A bu megys y galwodd efe ac na wrandawsant;

Felly y galwent hwy ac ni wrandawn,

Medd Arglwydd y lluoedd.

14A gwasgarwn hwynt,

Dros yr holl genedloedd y rhai nis adwaenent hwynt;

A’r wlad a anghyfaneddwyd ar eu hol hwynt;

Heb a dramwyai ac heb a ddychwelai:

A hwy a osodasant wlad ddymunol yn ddiffaethwch.