Haggai 1 - The Minor Prophets 1881 (John Davies, Ietwen)

PEN. I.—

1Yn yr ail flwyddyn i Darius y brenin, yn y chweched mis, yn y dydd cyntaf o’r mis, y bu gair yr Arglwydd trwy law Haggai y proffwyd at Zerubabel, mab Shealtiel, llywydd Judah, ac at Joshua, mab Jehosadac yr archoffeiriad, gan ddywedyd:

2Fel hyn y dywedodd Arglwydd y lluoedd gan ddywedyd:

Y bobl hyn a ddywedasant;

Ni ddaeth yn amser,

Yn amser i adeiladu tŷ yr Arglwydd.

3A bu gair yr Arglwydd trwy law Haggai y proffwyd gan ddywedyd:

4A ydyw yn amser i chwi eich hunain;

I drigo yn eich tai byrddiedig:

A’r tŷ hwn yn anghyfanedd.

5Ac yn awr fel hyn y dywedodd Arglwydd y lluoedd:

Ystyriwch eich ffyrdd.

6Hauasoch lawer,

Ond ychydig ddwyn i fewn fu;

Bu bwyta,

Ond nid hyd ddigon;

Yfed;

Ond nid hyd ddisychedu;

Gwisgo,

Ond nid i gynesrwydd i un:

A’r hwn a enillo gyflog;

Sydd yn enill cyflog i god dyllog.

7Fel hyn y dywedodd Arglwydd y lluoedd:

Ystyriwch eich ffyrdd.

8Esgynwch i’r mynydd a dygwch goed,

Ac adeiladwch y tŷ:

A mi a ymhyfrydaf ynddo,

A mi a ogoneddir,

Medd yr Arglwydd.

9Edrychwyd am lawer,

Ac wele ychydig oedd;

A dygasoch adref;

A chwythais arno:

Am ba beth,

Medd Arglwydd y lluoedd:

Am fy nhŷ yr hwn sydd yn anghyfanedd;

A chwithau yn rhedeg bob un i’w dŷ ei hun.

10Am hyny o’ch plegid chwi;

Yr attaliodd wybrenau rhag gwlith;

A’r ddaear a attaliodd ei chynyrch.

11A gelwais am sychder ar y ddaear ac ar y mynyddoedd,

Ac ar ŷd, ac ar y gwin, ac ar yr olew;

Ac ar yr hyn a ddwg y ddaear:

Ac ar y dyn ac ar yr anifail;

Ac ar holl lafur dwylaw.

12A gwrandawodd Zerubabel mab Shaltiel a Jehoshua mab Jehosadac yr offeiriad mawr, a holl weddill y bobl, ar lais yr Arglwydd eu Duw; ac ar eiriau Haggai y proffwyd, megys yr anfonodd yr Arglwydd eu Duw hwynt ef: a’r bobl a ofnasant rhag yr Arglwydd.

13A dywedodd Haggai cenad yr Arglwydd, mewn cenadwri gan yr Arglwydd, wrth y bobl gan ddywedyd:

Yr wyf fi gyda chwi, medd yr Arglwydd,

14A chynhyrfodd yr Arglwydd ysbryd Zerubabel, mab Shaltiel, llywydd Judah, ac ysbryd Jehoshua, mab Jehosadac yr offeiriad mawr, ac ysbryd holl weddill y bobl; â hwy a ddaethant ac a wnaethant waith yn nhŷ

15Arglwydd y lluoedd, eu Duw hwynt: yn y pedwerydd dydd ar hugain o’r chweched mis, yn yr ail flwyddyn i Darius y brenin.