Amos 2 - The Minor Prophets 1881 (John Davies, Ietwen)

PEN II.—

1Fel hyn y dywedodd yr Arglwydd;

Am dri anwireddau Moab;

Ac am bedwar,

Ni throaf hyny yn ol:

Am iddo losgi esgyrn brenin Edom yn galch.

2A mi a anfonaf dân yn Moab;

Ac efe a ddifa balasau y dinasoedd:

A Moab a fydd marw mewn terfysg;

Mewn gwaeddi, mewn sain udgorn.

3A mi a doraf ymaith farnwr o’i chanol:

A’i holl dywysogion a laddaf gydag ef,

Medd yr Arglwydd.

4Fel hyn y dywedodd yr Arglwydd;

Am dri anwireddau Judah;

Ac am bedwar,

Ni throaf hyny yn ol:

Am wrthod o honynt gyfraith yr Arglwydd,

Ac nas cadwasant ei ddeddfau Ef;

Ac i’w celwyddau beri iddynt gyfeiliorni;

Y rhai y rhodiodd eu tadau yn eu hol.

5A mi a anfonaf dân yn Judah;

Ac efe a ddifa balasau Jerusalem.

6Fel hyn y dywedodd yr Arglwydd;

Am dri anwireddau Israel,

Ac am bedwar,

Ni throaf hyny yn ol:

Am iddynt werthu gŵr uniawn am arian;

A thlawd am bâr o sandalau.

7Y rhai a ddyheuant am lwch daear ar ben tlodion;

A ffordd rhai cystuddiedig a wyrant:

A gwr a’i dad a ant at y llances;

I halogi fy enw santaidd I.

8Ac ar ddillad wedi eu rhoi yn wystl y gorweddant;

Wrth bob allor:

A gwin y dirwyedig a yfant;

Yn nhŷ eu duwiau.

9A myfi a ddinystriais yr Amoriad o’u blaen hwynt;

Yr hwn yr oedd ei uchder fel uchder cedrwydd,

Ac efe oedd gryf fel derw:

A dinystriais ei ffrwyth oddiarnodd;

A’i wraidd odditanodd.

10A myfì a’ch dygais i fyny o wlad yr Aipht:

Ac a wnawn i chwi gerdded yn yr anialwch ddeng mlynedd;

I feddianu gwlad yr Amoriad.

11A chyfodwn broffwydi o’ch meibion;

A Nazareaid o’ch gwŷr ieuanc:

Oni bu hyn, meibion Israel,

Medd yr Arglwydd.

12A chwi a roisoch i’r Nazareaid win i’w yfed:

Ac am y proffwydi y gorchymynasoch, gan ddywedyd:

Na phroffwydwch.

13Wele fi wedi fy llethu tanoch:

Fel y llethir y fen lawn o ysgubau.

14A metha gan y buan ffoi;

A chryf ni chadarnha ei rym:

A gwr cadarn ni weryd ei einioes.

15Ni saif a ymaflo mewn bwa;

Ni ddianc y buan o draed:

Ac a farchogo ar y march: Ni weryd ei einioes.

16A chryf ei galon yn mhlith y cedyrn;

A ffy yn noeth yn y dydd hwnw,

Medd yr Arglwydd.