Zechariah 2 - The Minor Prophets 1881 (John Davies, Ietwen)

1A mi a godais fy ngolwg ac a edrychais:

Ac wele bedwar cyrn.

2A dywedais wrth y genad oedd yn ymddyddan â mi,

Beth yw y rhai hyn:

Ac efe a ddywedodd wrthyf;

Y rhai hyn yw y cyrn a wasgarasant Judah;

Israel a Jerusalem.

3A’r Arglwydd a ddangosodd i mi;

Bedwar gofaint.

4A dywedais,

Beth y mae y rhai hyn yn dyfod i’w wneuthur:

Ac efe a ddywedodd gan ddywedyd,

Y rhai hyn yw y cyrn y rhai a wasgarasant Judah,

Fel nad allai gŵr godi ei ben;

A’r rhai hyn a ddaethant i’w tarfu hwynt,

I daflu lawr gyrn y cenedloedd,

Y rhai a godasant gorn yn erbyn tir Judah,

I’w gwasgaru hi.

5A chodais fy ngolwg ac edrychais,

Ac wele ŵr:

Ac yn ei law linyn mesur.

6A dywedais,

I ba le yr ai di:

Ac efe a ddywedodd wrthyf,

I fesur Jerusalem;

I weled beth yw ei lled hi a pheth yw ei hyd hi.

7Ac wele y genad a oedd yn ymddyddan â mi yn myned allan;

A chenad arall yn myned allan i’w gyfarfod ef.

8Ac efe a ddywedodd wrtho, rhed,

Llefara wrth y llanc hwn gan ddywedyd:

Yn faesdrefi y cyfaneddir Jerusalem;

Gan amledd dyn ac anifail o’i mewn.

9A myfi a fyddaf iddi, medd yr Arglwydd:

Yn fûr o dân o amgylch:

A byddaf yn ogoniant yn ei chanol.

10Ho, ho,

A ffowch o wlad y gogledd, medd yr Arglwydd:

Canys fel pedwar gwynt y nefoedd y gwasgerais chwi,

Medd yr Arglwydd.

11Ho, Sïon ymachub;

Yr hon wyt yn preswylio gyda merch Babylon.

12Canys fel hyn y dywedodd Arglwydd y lluoedd,

Ar ol gogoniant;

Y’m anfonodd at y cenedloedd y rhai a’ch ysbeiliasant chwi;

Canys a gyffyrddo â chwi;

Sydd yn cyffwrdd â chanwyll ei lygad Ef.

13Canys wele fi yn ysgwyd fy llaw arnynt;

A byddant yn ysbail i’w gweision:

A chewch wybod mai Arglwydd y lluoedd a’m hanfonodd.

14Gwaedda a llawenycha, merch Sïon:

Canys wele fi yn dyfod,

Ac a drigaf yn dy ganol di,

Medd yr Arglwydd.

15A chenedloedd lawer a lynant wrth yr Arglwydd yn y dydd hwnw;

A byddant i mi yn bobl:

A mi a drigaf yn dy ganol di;

A chei wybod mai Arglwydd y lluoedd a’m anfonodd atat.

16A’r Arglwydd a etifedda Judah ei ran;

Ar y wlad santaidd:

Ac a ddewis Jerusalem eto.

17Pob cnawd taw yn ngwydd yr Arglwydd:

Canys cyfododd o’i drigfan santaidd.