Habacuc 2 - The Minor Prophets 1881 (John Davies, Ietwen)

PEN. II.—

1Safaf ar fy nysgwylfa;

Ac ymsefydlaf ar dŵr:

Ac edrychaf i weled pa beth a ddywaid wrthyf;

A pha beth a atebaf am yr hyn yr achwynaf arno.

2A’r Arglwydd a’m atebodd ac a ddywedodd;

Ysgrifena weledigaeth;

A cherfia ar y llechau:

Fel y rhedo yr hwn a’i darlleno.

3Canys eto bydd gweledigaeth at yr amser;

A hi a frysia i’r diwedd ac ni thwylla:

Os erys, dysgwyl wrthi:

Canys gan ddyfod y daw, nid oeda.

4Wele trahaus,

Nid uniawn ei enaid ynddo:

A gŵr uniawn a fydd byw yn ei ffyddlondeb.

5A hefyd fel y twylla gwin;

Gŵr balch yw efe ac ni bydd lonydd:

Yr hwn a helaetha ei enaid fel anwelfa,

Ac y mae efe fel yr angeu,

Ac nis digonir ef;

Ac efe a gasgl ato yr holl genedloedd;

Ac a gynull ato yr holl bobloedd.

6Oni chyfyd y rhai hyn oll o honynt ddiareb am dano;

A chaneuon gwatwarus iddo:

A dywedir,

Gwae yr hwn a chwanego yr hyn nad yw eiddo iddo;

Pa hyd;

A’r hwn a lwytho arno wystlon yn drwm.

7Onid yn ddisymwth y cyfyd y rhai a’th gnoant;

Ac y deffry y rhai a’th gystuddiant:

A thi a fyddi yn ysglyfaeth iddynt.

8Am iti ysbeilio cenedloedd lawer;

Holl weddill pobloedd a’th ysbeiliant dithau:

Am waed dyn a thrais i wlad;

I ddinas ac oll ag a drigant ynddi.

9Gwae a elwo elw drwg i’w dŷ:

I osod ei nyth yn uchel;

I ddianc o afael drygfyd.

10Cynghoraist warth i’th dŷ:

I ddinystrio pobloedd lawer;

A phechu y bu dy enaid.

11O herwydd careg a lefa o fûr;

A thrawst a’i hetyb o’r coed.

12Gwae a adeilado dref trwy waed:

Ac a gadarnhao ddinas trwy anghyfiawnder.

13Wele, onid oddiwrth Arglwydd y lluoedd y mae:

Y gwna pobloedd lafurio wrth dân;

A chenedloedd ddiffygio wrth wagedd.

14Canys llenwir y ddaear;

Gan wybodaeth gogoniant yr Arglwydd,

Fel y toa y dyfroedd fôr.

15Gwae a roddo ddiod i’w gymydog;

Gan dywallt dy gostrel a pheri meddwi hefyd:

Er cael edrych ar eu noethni hwynt.

16Llanwyd di o warth yn fwy na gogoniant;

Yf dithau hefyd a noetha dy flaengroen:

Try atat gwpan deheulaw yr Arglwydd;

Chwydiad gwarthus fydd ar dy ogoniant.

17Canys trais Libanus a’th orchuddia;

A difrod anifeiliaid a’u dychryna:

O achos gwaed dynion a thrais ar wlad,

Dinas ac oll ag a drigant ynddi.

18Pa les a wna delw gerfiedig,

Er i’w lliniwr ei cherfio hi;

Delw dawdd ac athraw celwydd,

Er i liniwr ei waith hyderu arno;

I wneuthur eilunod mudion.

19Gwae a ddywedo wrth bren, Deffro;

Cyfod, wrth gareg fud:

Efe a rydd addysg;

Wele gwisgwyd ef âg aur ac arian;

A dim anadl nid oes o’i fewn.

20Ond y mae yr Arglwydd yn ei deml santaidd:

Yr holl ddaear gostega ger ei fron EF.