Hosea 4 - The Minor Prophets 1881 (John Davies, Ietwen)

PEN. IV.—

1Gwrandewch air yr Arglwydd, meibion Israel: Canys y mae cwyn gan yr Arglwydd â thrigolion y wlad;

Am nad oes gwirionedd, ac nad oes trugaredd, ac nad oes gwybodaeth o Dduw yn y wlad.

2Tyngu a dywedyd celwydd;

A lladd, a lladrata, a godinebu a dorant allan:

A gwaed a gyffwrdd a gwaed.

3Am hyny y galara y wlad;

Ac y llesga pawb sydd yn trigo ynddi;

Ynghyd âg anifeiliaid y maes ac ehediaid yr awyr:

A physgod y môr hefyd a ddarfyddant.

4Eto, nid oes ddyn a ddadleua, ac nid oes ddyn a gerydda:

A’th bobl sydd fel rhai a ymrysonent âg offeiriaid.

5A thi a syrthi y dydd:

A phroffwyd hefyd a syrth gyda thi y nos:

A mi a ddyfethaf dy fam.

6Fy mhobl a ddyfethir o eisiau gwybodaeth:

Am i ti wrthod gwybodaeth,

Minau hefyd a’th wrthodaf dithau rhag bod yn offeiriad i mi;

A thi a annghofiaist gyfraith dy Dduw;

Minau hefyd a annghofiaf dy blant dithau.

7Fel yr amlhauwyd hwynt, felly y pechasant i’m herbyn:

Eu gogoniant hwythau a newidiaf am warth.

8Pech aberth fy mhobl a fwytant:

Ac yn eu hanwiredd hwynt yr ymhyfryda eu henaid.

9Ac megys y bydd y bobl, felly yr offeiriad:

Ac ymwelaf âg ef am ei ffyrdd;

Ac ad-dalaf iddo ei weithredoedd.

10hwy a fwytant ac nis diwellir hwynt;

Puteiniant ac nid amlhant:

Am iddynt adael gwasanaethu yr Arglwydd.

11Godineb, a gwin, a gwin newydd a gymer ymaith eu calon.

12Fy mhobl a ymofyn â’u pren;

A’u ffon a fynega iddynt:

Canys ysbryd puteindra a barodd gyfeiliorni;

A phuteiniasant oddiwrth eu Duw.

13Ar benau y mynyddoedd yr aberthant,

Ac ar y bryniau yr arogldarthant:

Dan dderwen, a phoplysen, a phystac,

Am fod yn dda ei chysgod:

Am hyny y puteinia eich merched,

A’ch gwauddau a odinebant.

14Nid ymwelaf a’ch merched pan buteiniant,

Nac a’ch gwauddau pan odinebant;

Canys hwynt eu hunain a ymddidolant gyda y puteiniaid;

A chyda’r merched aflan yr aberthant,

A phobl ag na ddeallant a syrthiant.

15Os yn puteinio yr wyt ti, Israel,

Na pheched Judah:

Ac nac ewch i fyny i Gilgal,

Ac nac ewch i fyny i Bethafen;

Ac na thyngwch byw yr Arglwydd.

16Canys fel anner anhywaith;

Yr anhyweithodd Israel:

Yn awr yr Arglwydd a’u portha hwynt;

Fel oen mewn ëangle.

17Ephraim a gysylltwyd âg eilunod:

Gad iddo.

18Trodd eu gwin hwynt:

Gan buteiuio y puteiniasant;

Ei llywodraethwyr a hoffasant moeswch gywilydd.

19Gwynt a’i rhwymodd hi yn ei hadenydd:

A bydd arnynt gywilydd o herwydd eu haberthau.