Amos 8 - The Minor Prophets 1881 (John Davies, Ietwen)

PEN. VIII.—

1Fel hyn y dangosodd yr Arglwydd Iôr i mi:

Ac wele fasgedaid o ffrwythau haf.

2Ac efe a ddywedodd, Pa beth a weli di, Amos:

A mi a ddywedais,

Basgedaid o ffrwythau haf:

A’r Arglwydd a ddywedodd wrthyf,

Daeth y diwedd ar fy mhobl Israel;

Ni chwanegaf fyned heibio iddynt mwyach.

3A chaniadau teml a droir yn alarnad ar y dydd hwnw;

Medd yr Arglwydd Iôr:

Lluaws o gelaneddau;

Yn mhob lle a deifl ddystawrwydd.

4Gwrandewch hyn,

Y rhai a ddyheuwch am anghenog:

A chan beri i dlodion gwlad ddarfod.

5Gan ddywedyd,

Pa bryd yr â dydd y newydd loer heibio,

Fel y gwerthom ŷd;

A’r sabbath,

Fel yr agorom wenith:

Gan fychanu epha a mwyhau sicl;

A thrwy dwyll wneuthur clorianau annghydbwys.

6Gan brynu tlodion am arian;

A gwr anghenus er pâr o sandalau:

A ni a werthwn wehilion gwenith.

7Tyngodd yr Arglwydd trwy ogoniant Jacob:

Nid annghofiaf byth eu holl weithredoedd hwynt.

8Oni chryn y ddaear am hyn;

Ac y galara ei holl breswylwyr:

A hi a gyfyd i gyd fel afon;

A hi a ddygir ymaith ac a ostwng megys afon yr Aipht.

9A bydd yn y dydd hwnw,

Medd yr Arglwydd Iôr:

Y gwnaf i’r haul fachludo haner dydd:

Ac y tywyllaf y ddaear ar ddydd goleu.

10A throaf eich gwyliau yn alar,

A’ch holl ganiadau yn gwynfan;

A dygaf sachlîan ar yr holl lwynau;

A moelni ar bob pen:

A gosodaf iddi alar fel am unig blentyn;

A’i diwedd fel dydd chwerw.

11Wele ddyddiau yn dyfod,

Medd yr Arglwydd Iôr;

Yr anfonaf newyn i’r tir:

Nid newyn am fara ac nid syched am ddwfr;

Ond am gael clywed geiriau yr Arglwydd.

12A hwy a grwydrant o fôr i fôr;

Ac o’r gogledd hyd y dwyrain:

Gwibiant i geisio gair yr Arglwydd,

Ac nis cânt.

13Yn y dydd hwnw y llewyga y gwyryfon glân,

A’r meibion ieuainc trwy syched.

14Y rhai a dyngant trwy bechod Samaria;

Ac a ddywedant,

Byw yw dy dduw di, Dan;

A byw yw ffordd Beersheba:

A hwy a syrthiant ac ni chodant mwyach.