Zechariah 5 - The Minor Prophets 1881 (John Davies, Ietwen)

1A thrachefn y codais fy llygaid ac yr edrychais: ac wele ròl yn ehedeg.

2Ac efe a ddywedodd wrthyf, Beth a weli di: a dywedais, Mi a welaf ròl yn ehedeg; ei hyd yn ugain cufydd, a’i lled yn ddeg cufydd.

3Ac efe a ddywedodd wrthyf;

Hon yw y felldith;

Yr hon sydd yn myned allan dros wyneb yr holl wlad:

Canys pob un a ladrato,

A dorir ymaith oddiyma yn ei hol;

A phob un a dyngo;

A dorir ymaith oddiyma yn ei hol.

4Dygais hi allan medd Arglwydd y lluoedd;

A hi a ddaw i dŷ y lleidr;

Ac i dŷ yr hwn a dyngo trwy fy enw I yn gelwyddog:

A hi a erys yn nghanol ei dŷ ef;

Ac a’i difa ef a’i goed a’i gerig.

5A’r genad a ymddyddanai â mi a aeth allan ac a ddywedodd wrthyf, Cyfod yn awr dy lygaid ac edrych; beth yw hon sydd yn myned allan.

6A mi a ddywedais beth yw hi: ac efe a ddywedodd, hon yw yr ephah sydd yn myned allan; ac efe a ddywedodd, dyma eu hagwedd hwynt yn yr holl wlad.

7Ac wele dalent o blwm wedi ei chodi i fynu; a thyma wraig yn eistedd yn nghanol yr ephah.

8Ac efe a ddywedodd, Dyma y Drygioni; ac a’i taflodd hi i ganol yr ephah: ac a daflodd y pwys plwm ar ei genau hi.

9A chyfodais fy llygaid ac edrychais ac wele ddwy wragedd yn myned allan, a gwynt yn eu hesgyll; ac iddynt yr oedd esgyll fel esgyll y ciconia: a chodasant yr ephah rhwng y ddaear a’r nefoedd.

10A mi a ddywedais wrth y genad oedd yn ymddyddan â mi: i ba le y mae y rhai hyn yn myned â’r ephah.

11Ac efe a ddywedodd wrthyf, i adeiladu iddi dŷ yn ngwlad Sinaar: i’w sicrhau a rhoi iddi orphwys yno ar ei lle.