Zechariah 12 - The Minor Prophets 1881 (John Davies, Ietwen)

1Baich gair yr Arglwydd am Israel:

Medd yr Arglwydd,

Sydd yn estyn wybrenau,

Ac yn sylfaenu daear;

Ac yn llunio ysbryd dyn ynddo.

2Wele fi yn gosod Jerusalem yn gwpan meddwol i’r holl bobloedd o amgylch:

A hefyd am Judah y bydd,

Yn y gwarchae ar Jerusalem.

3A bydd yn y dydd hwnw,

Y gosodaf Ierusalem yn faen trwm i’r holl bobloedd;

Pawb ag a’i codant gan gael eu dryllio a ddryllir:

A chesglir yn ei herbyn hi;

Holl genedloedd y ddaear.

4Yn y dydd hwnw, medd yr Arglwydd,

Y tarawaf bob march â dychryn,

A’i farchog ag ynfydrwydd:

Ac ar dŷ Iudah yr agoraf fy llygaid;

A holl feirch y bobloedd;

A darawaf â dallineb.

5A phenogion Iudah a ddywedant yn eu calon:

Nerth i mi yw preswylwyr Ierusalem;

Trwy Arglwydd y lluoedd eu Duw hwynt.

6Yn y dydd hwnw y gwnaf benogion Iudah,

Fel padellaid o dân mewn coed,

Ac fel ffagl dân mewn ysgub;

Ac ysant ar ddeheu ac ar aswy,

Yr holl bobloedd o amgylch:

A Ierusalem a drig eto yn ei lle,

Yn Ierusalem.

7A’r Arglwydd a achub bebyll Iudah yn gyntaf;

Fel nad ymfawrhao gogoniant tŷ Dafydd,

A gogoniant preswylydd Ierusalem ar Iudah.

8Yn y dydd hwnw,

Yr ymddiffyn yr Arglwydd breswylydd Ierusalem;

A bydd yr egwan yn eu plith y dydd hwnw fel Dafydd:

A thŷ Dafydd fel duwiau;

Fel angel yr Arglwydd o’u blaen hwynt.

9A bydd yn y dydd hwnw:

Y ceisiaf ddyfetha yr holl genedloedd;

Y sydd yn dyfod yn erbyn Ierusalem.

10A thywalltaf ar dŷ Dafydd ac ar breswylydd Ierusalem,

Ysbryd ymbiliau a gweddïau;

Ac edrychant ataf fi yr hwn a wanasant:

A galarant am dano.

Fel galar am yr unig-anedig;

A bydd chwerw wylo am dano,

Fel chwerw wylo am y cyntaf-anedig.

11Yn y dydd hwnw y bydd mawr y galar yn Ierusalem;

Megys galar Hadadrimmon yn nyffryn Megidon.

12A’r wlad a alara:

Yn deuluoedd, yn deuluoedd wrthynt eu hunain,

Teulu tŷ Dafydd wrtho ei hunan,

A’u gwragedd wrthynt eu hunain;

Teulu tŷ Nathan wrtho ei hunan;

A’u gwragedd wrthynt eu hunain.

13Teulu tŷ Lefi wrtho ei hunan;

A’u gwragedd wrthynt eu hunain:

Teulu y Shimeiad wrtho ei hunan;

A’u gwragedd wrthynt eu hunain.

14Yr holl deuluoedd gweddill;

Yn deuluoedd, yn deuluoedd wrthynt eu hunain:

A’u gwragedd wrthynt ei hunain.