Micah 6 - The Minor Prophets 1881 (John Davies, Ietwen)

PEN VI.—

1Gwrandewch atolwg yr hyn a ddywed yr Arglwydd:

Cyfod dadleu wrth y mynyddoedd;

A chlywed y bryniau dy lais.

2Gwrandewch fynyddoedd ddadl yr Arglwydd;

A chedyrn sylfaeni daear:

Canys y mae dadl gan yr Arglwydd â’i bobl;

Ac âg Israel yr ymryson.

3Fy mhobl beth a wnaethum i ti, Ac yn mha beth y’th flinais:

Tystia wrthyf.

4Canys myfì a’th ddygais i fyny o dir yr Aipht;

Ac a’th ryddheais o dŷ caethiwed:

Ac a anfonais o’th flaen;

Moses, Aaron, a Miriam.

5Fy mhobl cofia atolwg beth a fwriadodd Balac brenin Moab;

A pha beth a atebodd Bilam mab Beor iddo:

O Sittim hyd Gilgal;

Er mwyn gwybod unionderau yr Arglwydd.

6A pha beth y deuaf gerbron yr Arglwydd;

Yr ymgrymaf i’r uchel Dduw:

A ddeuaf ger ei fron ef âg aberthau llosg;

A lloi blwyddiaid.

7A foddlonir yr Arglwydd â miloedd o hyrddod;

A myrddiynau o ffrydiau olew:

A roddaf fi fy nghyntaf-anedig dros fy anwiredd;

Ffrwyth fy nghroth am bechod fy enaid.

8Hysbysodd efe i ti ddyn beth sydd dda:

A pha beth a gais yr Arglwydd genyt,

Ond gwneuthur barn a hoffi trugaredd;

Ac ymostwng i rodio gyda’th Dduw.

9Llef yr Arglwydd a eilw ar ddinas;

A doethineb yw ofni dy enw:

Gwrandewch gerydd a phwy a’i hordeiniodd.

10A oes eto dŷ anwir;

Drysorau anwir:

Ac ephah brin felldigedig.

11A gyfrifwn yn lân gyda chlorianau anghywir;

A chyda chôd o geryg twyllodrus.

12Am fod ei chyfoethogion yn llawn trais;

A dywedyd celwydd o’i thrigolion:

A’u tafod yn dwyllodrus yn eu genau.

13Minau hefyd a ddechreuais dy daro:

Gan ddwyn difrod am dy bechodau.

14Ti a fwyti ac ni’th ddigonir;

A’th wagter a fydd ynot:

A thi a gymeri ymaith ac nid achubi;

A’r hyn a achubech a roddaf i’r cleddyf.

15Ti a heui ac ni fedi:

Ti a sethri olewydden ac nid ymiri âg olew;

A gwin newydd ac nid yfi win.

16A chadw yr ydys at ddeddfau Omri,

A holl waith tŷ Ahab;

A chwi a rodiwch wrth eu cynghorion hwynt:

Fel y’th wnawn yn anghyfanedd,

A’i thrigolion yn ddirmyg;

A chwi a ddygwch warth fy mhobl.