Amos 5 - The Minor Prophets 1881 (John Davies, Ietwen)

PEN. V.—

1Gwrandewch y gair hwn a godaf am danoch, galarnad, tŷ Israel.

2Gwryf Israel a syrthiodd;

Ni chyfyd mwy:

Hi a daflwyd ar ei thir,

Nid oes a’i cyfyd.

3Canys fel hyn y dywedodd yr Arglwydd Iôr;

Y ddinas yr hon a â allan yn fil a weddill gant:

A’r hon a â allan yn gant a weddill ddeg i dŷ Israel.

4Diau fel hyn y dywedodd yr Arglwydd wrth dŷ Israel:

Ceisiwch fi a byw fyddwch.

5Ac na cheisiwch Bethel;

Ac nac ewch i Gilgal;

Ac na thramwywch i Beersheba:

O herwydd gan gaethgludo y caethgludir Gilgal;

A Bethel a fydd yn ddiddim.

6Ceisiwch yr Arglwydd a byw fyddwch:

Rhag iddo syrthio fel tân ar dŷ Joseph;

A difa o hono ac na byddo i Bethel a’i diffoddo.

7Y rhai a droant farn yn wermod:

Ac a daflasant gyfiawnder i’r ddaear.

8Gwneuthurwr Ceimah a Cesil,

A’r hwn a dry dywyllwch dudew yn foreu;

Ac a dywylla ddydd yn nos:

Yr hwn a eilw ar ddyfroedd y môr,

Ac a’u tywallt ar wyneb y ddaear,

Yr Arglwydd yw ei enw.

9Yr hwn a ddwg ddinystr ar gryfder:

Ac a wna i ddinystr ddyfod ar ymddiffynfa.

10Cas fu ganddynt yr hwn a geryddai yn y porth:

A ffiaidd ganddynt yr hwn a lefarai uniondeb.

11O herwydd hyny am i chwi sathru ar dlawd,

A chymeryd o honoch doll o ŷd ganddo;

Adeiladasoch dai o gerig nadd,

Ond ni thrigwch ynddynt:

Planasoch winllanoedd hyfryd;

Ond nid yfwch eu gwin hwynt.

12Canys mi a adwaen eich holl anwireddau;

A’ch pechodau cryfion;

Y rhai a gystuddiwch wr uniawn,

Y rhai a gymerwch iawn;

A thlodion a droir heibio yn y porth.

13Am hyny y synwyrol a fydd dystaw yn yr amser hwn:

Canys amser drwg ydyw.

14Ceisiwch ddaioni ac nid drygioni,

Fel y byddoch byw:

Ac felly y bydd yr Arglwydd Duw y lluoedd gyda chwi,

Fel y dywedasoch.

15Casewch ddrygioni a cherwch ddaioni;

A gosodwch farn yn y porth:

Fe allai y tosturia yr Arglwydd, Duw y lluoedd, wrth weddill Joseph.

16Am hyny fel hyn y dywedodd yr Arglwydd, Duw y lluoedd, yr Iôr;

Yn mhob heol y bydd cwynfan;

Ac yn mhob ffordd y dywedir Och, och:

A gelwir arddwr i alaru;

A chwynfan a fydd i’r neb a fedront alarnad.

17Ac yn mhob gwinllan y bydd cwynfan:

Canys tramwyaf trwy dy ganol di,

Medd yr Arglwydd.

18Gwae y rhai a ddymunant ddydd yr Arglwydd:

Beth fydd hwnw i chwi,

Dydd yr Arglwydd,

Efe a fydd yn dywyllwch ac nid yn oleuni.

19Megys pe ffoai gŵr rhag y llew;

A chyfarfod o’r arth âg ef:

A myned i’r tŷ,

A phwyso o’i law ar y mur;

A chnoi o’r sarph ef.

20Onid tywyllwch a fydd dydd yr Arglwydd ac nid goleuni:

A magddu ac heb lewyrch iddo.

21Casheais, ffieiddiais eich gwyliau:

Ac nid ymhyfrydaf yn eich cymanfaoedd.

22Canys os offrymwch i mi aberthau llosg a’ch offrymau bwyd,

Ni byddaf foddlawn:

Ac ar eich pasgedigion yn ebyrth diolch nid edrychaf.

23Symud oddiwrthyf drwst dy ganiadau:

Ac ar beroriaeth dy nablau ni wrandawaf.

24A threigled barnedigaeth fel y dyfroedd:

A chyfiawnder fel llifeiriant cryf.

25A offrymasoch chwi aberthau ac offrymau bwyd i mi,

Yn y diffaethwch ddeugain mlynedd, tŷ Israel.

26Ond dygasoch babell eich Moloch;

A sefyllfan eich delwau:

Seren eich duw;

Yr hwn a wnaethoch i chwi.

27A mi a’ch caethgludaf chwithau y tu hwnt i Damascus,

Medd yr Arglwydd:

Duw y lluoedd yw ei enw.