Zechariah 6 - The Minor Prophets 1881 (John Davies, Ietwen)

1A thrachefn mi a godais fy ngolwg ac a edrychais; ac wele bedwar cerbydau yn myned allan oddirhwng y ddau fynydd: a’r mynyddoedd oeddent fynyddoedd pres.

2Yn y cerbyd cyntaf yr oedd meirch cochion: yn yr ail gerbyd meirch duon:

3Ac yn y trydydd cerbyd meirch gwynion: ac yn y pedwerydd cerbyd meirch brithion cryfion.

4A mi a aethum rhagof i ddywedyd wrth y genad oedd yn ymddyddan â mi, beth yw y rhai hyn fy arglwydd.

5A’r genad a atebodd ac a ddywedodd wrthyf: y rhai hyn ydynt bedwar ysbrydion y nefoedd; yn myned allan o sefyll gerbron Arglwydd yr holl ddaear.

6Yr hwn y mae y meirch duon ynddo, hwy sydd yn myned allan i dir y gogledd; a’r gwynion a aethant allan ar eu hol hwynt: a’r brithion a aethant allan i dir y deheu.

7A’r cryfion a aethant allan ac a geisiasant fyned i gerdded trwy y ddaear; ac efe a ddywedodd, ewch, cerddwch trwy y ddaear: a hwy a gerddasant trwy y ddaear.

8Ac efe a waeddodd arnaf; ac a lefarodd wrthyf gan ddywedyd: edrych, y rhai sydd yn myned allan i dir y gogledd a lonyddasant fy ysbryd yn nhir y gogledd.

9A bu gair yr Arglwydd ataf gan ddywedyd:

10Cymer gan y gaethglud, gan Cheldai, gan Tobiah, a chan Jedaiah, a dos di ar y dydd hwnw, a dos i dŷ Josiah, mab Sephania lle y daethant o Babylon.

11A chymer arian ac aur, a gwna goronau, a gosod ar ben Jehoshuah yr offeiriad mawr.

12A thi a ddywedi wrtho gan ddywedyd; Fel hyn y dywed Arglwydd y lluoedd:

Wele ŵr, Blaguryn ei enw,

O obry iddo y Blagura;

Ac yr adeilada deml yr Arglwydd.

13Ac efe a adeilada deml yr Arglwydd:

Ac efe a ddwg ogoniant;

Ac a eistedd ac a lywodraetha ar ei orsedd;

A bydd yn offeiriad ar ei orsedd;

A chynghor heddwch fydd rhyngddynt eill dau.

14A’r coronau a fyddant yn nheml yr Arglwydd yn goffadwriaeth:

I Cheleu, ac i Tobiah, ac i Jedaiah, ac i Chên, mab Sephaniah.

15A phellenigion a ddeuant ac a adeiladant yn nheml yr Arglwydd;

A chewch wybod mai Arglwydd y lluoedd a’m hanfonodd atoch:

Ac fe fydd os gan wrando y gwrandewch;

Ar lais yr Arglwydd eich Duw.