Joel 1 - The Minor Prophets 1881 (John Davies, Ietwen)

PEN. I.—

1Gair yr Arglwydd yr hwn a fu at Joel fab Pethuel.

2Gwrandewch hyn yr henafgwyr;

A rhoddwch glust;

Holl breswylwyr y wlad:

A fu hyn yn eich dyddiau chwi;

Ac os yn nyddiau eich tadau.

3Mynegwch am dano i’ch plant:

A’ch plant i’w plant hwynt;

A’u plant hwythau i genedlaeth arall.

4Gweddill pryf y rhwd a fwytaodd y locust;

A gweddill y locust a fwytaodd y lindys:

A gweddill y lindys a fwytaodd y chesil.

5Deffrowch feddwon ac wylwch;

A chwynwch holl yfwyr gwin:

Am y gwin newydd;

Canys torwyd ef oddiwrth eich min.

6Canys cenedl a ddaeth i fyny ar fy ngwlad;

Gref ac annifeiriol:

Ei danedd ydynt ddanedd llew;

A childdanedd llewes sydd iddi.

7Hi a ddifrododd fy ngwinwydden:

A hi a ddrylliodd fy ffigyswydden:

Gan ddirisglo hi a’i dirisglodd ac a’i taflodd ymaith;

Ei changenau a wynasant.

8Cwyna fel gwyryf wedi ei gwregysu â sachlïan,

Am wr ei hieuenctyd.

9Torwyd offrwm bwyd ac offrwm diod oddiwrth dŷ yr Arglwydd:

Galarodd yr offeiriaid;

Gweinidogion yr Arglwydd.

10Difrodwyd maes;

Galarodd daear:

Canys difrodwyd ŷd;

Sychodd gwin newydd, pallodd olew.

11Cywilyddiwych, lafurwyr,

Wylwch winwyddwyr;

Am wenith ac am haidd:

Canys darfu cynhauaf maes.

12Gwywodd y winwydden;

Methodd y ffigyswydden:

Pomgranad, palmwydden hefyd ac afallen,

Holl goed y maes a wywasant;

Canys sychodd llawenydd oddiwrth feibion dynion.

13Ymwregyswch a galerwch yr offeiriaid,

Wylwch weinidogion allor:

Ewch, gorweddwch yn y sachlieiniau;

Weinidogion fy Nuw:

Canys ataliwyd oddiwrth dŷ eich Duw,

Offrwm bwyd ac offrwm diod.

14Cysegrwch ympryd, gelwch gymanfa;

Cesglwch, henuriaid, holl drigolion y wlad;

I dŷ yr Arglwydd eich Duw:

A gwaeddwch ar yr Arglwydd.

15Och i’r dydd;

Canys agos yw dydd yr Arglwydd;

Ac fel difrod oddiwrth yr Hollalluog y daw.

16Onid yn ngwydd ein llygaid y torwyd ymaith fwyd:

Llawenydd a gorfoledd o dŷ ein Duw.

17Pydrodd hadau dan eu cwysau;

Anrheithiwyd ystorfëydd;

Dinystriwyd ysguboriau,

Canys ŷd a wywodd.

18Pa fodd y cwyna anifeiliaid,

Yr aflonydda minteiodd gwartheg;

Am nad oes borfa iddynt:

Deadelloedd y defaid hefyd a ddifrodwyd.

19Atat ti, Arglwydd, y llefaf:

Canys tân a ddifaodd borfeydd yr anialwch;

A fflam a oddeithiodd holl goed y maes.

20Anifeiliaid maes hefyd a ddysgwyliant wrthyt ti:

Canys sychodd y ffrydiau dwfr;

A thân a ysodd borfeydd yr anialwch.