Hosea 7 - The Minor Prophets 1881 (John Davies, Ietwen)

PEN. VII.—

1A mi yn troi ymaith gaethglud fy mhobl,

A mi yn meddyginiaethu Israel,

Datguddiwyd anwiredd Ephraim a drygioni Samaria;

Canys gwnaethant ffalsder:

A lleidr a ddaw;

Mintai a ysbeilia yn yr heol.

2Ac ni feddyliant yn eu calon;

Fy mod i yn cofio eu holl ddrygioni hwynt:

Yn awr eu gweithredoedd a’u hamgylchant;

Y maent gerbron fy wyneb.

3Llawenhant frenin â’u drygioni:

A thywysogion â’u celwyddau.

4Y maent oll yn odinebwyr;

Y maent fel ffwrn wedi ei phoethi gan bobydd:

Efe a baid a chodi;

Rhag tylino toes nes lefeinio o hono.

5Ar ddydd ein brenin;

Clafychodd tywysogion o wres gan win;

Estynodd ei law gyda gwatwarwyr.

6Canys wrth gynllwyn o honynt gwnaethant eu calon agos fel ffwrn:

Eu pobydd a gwsg ar hyd y nos;

Y boreu y llysg fel fflam dân.

7Pawb o honynt a wresogant fel y ffwrn,

Ac a ysant eu barnwyr:

Eu holl freninoedd a gwympasant,

Heb un o honynt yn galw arnaf fi.

8Ephraim a ymgymysgodd â’r bobloedd;

Ephraim sydd fel teisen heb ei throi.

9Estroniaid a fwytasant ei gryfder:

Ac nis gŵyr efe;

Ymdaenodd penwyni ar hyd-ddo,

Ac nis gwybu efe.

10Ac y mae balchder Israel yn tystiolaethu yn ei wyneb;

Ac er hyn oll ni throant at yr Arglwydd eu Duw,

Ac ni ddychwelasant at yr Arglwydd eu Duw;

Ac nis ceisiasant ef er hyn oll.

11A bu Ephraim;

Fel colomen ynfyd heb galon:

Galwant ar yr Aipht,

Ant i Assuria.

12Fel yr elont,

Taenaf fy rhwyd drostynt;

Tynaf hwynt i lawr fel adar yr awyr:

Ceryddaf hwynt y modd y clybu eu cynulleidfa hwynt.

13Gwae hwynt,

Canys ffoisant oddiwrthyf;

Dinystr arnynt,

O herwydd iddynt droseddu i’m herbyn:

A mi a’u gwaredais hwynt,

A hwythau a ddywedasant gelwyddau arnaf fi.

14Ac ni lefasant arnaf â’u calon,

Pan gwynfanasant ar eu gwelyau;

A’m ŷd a gwin yr ymgasglasant.

15Troisant i’m herbyn,

A minau wedi hyfforddi;

Cryfheais eu breichiau hwynt;

Ac i’m herbyn y meddyliasant ddrwg.

16[Troisant at ddim. — LXX.]

[Troisant at yr hwn nad yw ddim. — Syr.

]

Buost fel bwa twyllodrus;

Eu tywysogion a syrthiant trwy y cleddyf, am gynddaredd eu tafod.

Hyn fydd eu gwaradwydd hwynt yn ngwlad yr Aifft.