2 Pedr 3 - Prophets and Epistles 1852-62 (John Owen)

PEN. III.

1Yr ail Epistol, anwyliaid, yw hwn a ysgrifenaf yn awr atoch; y rhai y deffroaf ynddynt eich meddwl didwyll trwy eich hadgoffhâu,

2fel y cofioch y geiriau a ragdraethwyd gan y prophwydi sanctaidd, a’n gorchymyn ni, apostolion yr Arglwydd a’r Iachawdwr;

3gan wybod hyn yn gyntaf, y daw yn y dyddiau diweddaf watwarwyr, yn rhodio yn ol eu chwantau eu hunain,

4ac yn dywedyd, “P’le y mae yr addewid o’i ddyfodiad? canys er pan hunodd y tadau, felly erys pob peth o ddechreu y grëadigaeth.”

5Ond hyn y maent o wirfodd yn anwybodus o hono, mai trwy air Duw yr oedd y nefoedd gynt, ac y cydsafai y ddaear o’r dwfr ac yn y dwfr,

6y rhai y dyfethwyd trwyddynt y byd oedd y pryd hwnw, gan gael ei orchuddio gan ddwfr;

7ac y trysorir y nefoedd a’r ddaear ydynt yn awr, gan yr un gair, gan gael eu cadw i dân, erbyn dydd y farn a dystryw dynion annuwiol.

8A hyn, anwyliaid, na fyddwch yn anwybodus o hono, fod un dydd ger bron yr Arglwydd megys mil o flynyddau, a mil o flynyddau megys un dydd.

9Nid oeda yr Arglwydd ei addewid, fel y cyfrif rhai oedi; ond hir ymarhôus yw tuag atom, heb ewyllysio bod neb yn golledig, ond dyfod o bawb i edifeirwch.

10Ond daw dydd yr Arglwydd fel lleidr yn y nos; yr hwn yr ä heibio ynddo y nefoedd gyda thwrf, a thodda’r elfenau gan boethder, a llosgir y ddaear a’r gweithiau ydynt ynddi.

11Yna gan yr ymollwng y pethau hyn oll, pa fath rai y dylech chwi oll fod mewn pob ymarweddiad sanctaidd a phob duwioldeb,

12gan ddysgwyl a thaer ddymuned dyfodiad dydd Duw; yr hwn yr ymollwng ynddo y nefoedd, gwedi eu rhoi ar dân, ac y todda’r elfenau gan boethder.

13Ond nefoedd newydd a daear newydd yn ol ei addewid, a ddysgwyliwn, y rhai y cartrefa ynddynt gyfiawnder.

14Am hyny, anwyliaid, gan y dysgwylwch y pethau hyn, ymdrechwch eich cael ganddo mewn heddwch, yn ddifannau ac yn ddifrychau

15a chyfrifwch hiramynedd ein Harglwydd yn iachawdwriaeth: megys ag yr ysgrifenodd atoch hefyd ein hanwyl frawd Paul, yn ol y ddoethineb a roddwyd iddo,

16fel yn ei holl epistolau hefyd, gan lefain ynddynt am y pethau hyn: y rhai y mae rhyw bethau ynddynt yn anhawdd eu deall; y rhai a wyrdröa yr annysgedig a’r ansefydlog, fel yr ysgrythyrau eraill hefyd, er dinystr iddynt eu hunain.

17Chwi gan hyny, anwyliaid, gan y rhagwyddoch y pethau hyn, gwyliwch fel na syrthioch o’ch sefyllfan eich hun, trwy gael eich harwain ymaith gan amryfusedd yr afreolus:

18ond cynnyddwch yn rhad a gwybodaeth ein Harglwydd a’n Hiachawdwr Iesu Grist. Iddo y bo’r gogoniant yn awr ac yn dragywydd. Amen.