Mica 4 - Prophets and Epistles 1852-62 (John Owen)

PENNOD IV.

1Ond bydd yn niwedd y dyddiau,

Y bydd mynydd tŷ Iehofa

Yn cael ei osod yn ben y mynyddoedd,

A dyrchefir ef uwchlaw y bryniau;

A phobloedd a ddylifant iddo;

2Ac ä cenedloedd lawer, a dywedant,

“Deuwch ac esgynwn i fynydd Iehofa,

Ac i dŷ Duw Iacob;

A dysg i ni ei ffyrdd,

A rhodiwn yn ei lwybrau:”

Canys o Sïon y daw allan gyfraith,

A gair Iehofa o Ierusalem;

3A barna rhwng pobloedd lawer,

A cherydda genedloedd cedyrn hyd ymhell;

A churant eu cleddyfau yn sychau,

A’u gwaewffyn yn bladuriau;

Ni chyfyd cenedl yn erbyn cenedl gleddyf,

Ac ni ddysgant mwyach ryfel;

4Ond eisteddant pob un dan ei winwydden,

A than ei ffigysbren, heb neb yn peri dychryn;

Canys genau Iehofa y lluoedd a lefarodd hyn;

5Canys yr holl bobloedd sy’n rhodio,

Pob un yn enw ei dduw ei hun,

A ninnau hefyd, rhodio a wnawn

Yn enw Iehofa ein Duw dros oesoedd a byth.

6Yn y dydd hwnw, medd Iehofa,

Casglaf y gloff, a’r gwasgaredig a gynnullaf,

A’r hon a gystuddiais;

7A gwnaf y gloff yn weddill,

A’r hon a yrwyd ymhell yn genedl gref;

A theyrnasa Iehofa arnynt,

Yn mynydd Sïon, o’r pryd hyn hyd byth.

8A thi, tŵr y praidd, caer merch Sïon,

I ti y dygwydd;

Ië, daw y llywodraeth flaenorol —

Y deyrnas, i ferch Ierusalem.

9Yn awr, pam y gwaeddi waedd?

Ai nid oes brenin genyt?

A yw dy gynghorydd wedi marw?

Canys cymerodd di wewyr

Fel eiddo gwraig wrth esgor.

10Bydd mewn gwewyr a gruddfana,

Ferch Sïon, fel gwraig wrth esgor;

Canys allan yr ëi yn awr o’r ddinas,

A thrigi yn y maes, ac ëi hyd Babylon:

Oddiyno y gwaredir di,

Yno yr achub Iehofa di o law dy elynion.

11Ond yn awr ymgasglodd yn dy erbyn

Genedloedd lawer, y rhai a ddywedant,

“Haloger hi, ac edryched ar Sïon ein llygaid.”

12Ond hwy, ni wyddant fwriadau Iehofa,

Ac ni ddeallant ei gynghor;

Canys casgla hwynt fel ysgubau i’r llawrdyrnu:

13Cyfod a dyrna, ferch Sïon,

Gan y gwnaf dy gorn yn haiarn,

A’th garnau a wnaf yn bres,

Fel y drylliot bobloedd lawer;

A chysegri i Iehofa eu helw,

A’i meddiannau i Arglwydd yr holl ddaear.