Hosea 7 - Prophets and Epistles 1852-62 (John Owen)

PENNOD VII.

1Pan yr oeddwn yn iachâu Israel,

Yna dadguddiwyd anwiredd Ephraim,

A drygioni Samaria;

Canys gweithredasant yn dwyllodrus;

A’r lleidr, daw i mewn;

Anrheithiodd yr yspeilydd oddiallan,

2Ac ni ddywedant wrth eu calon,

Y cofiaf eu holl ddrygioni:

Yn awr amgylcha hwynt eu gweithredoedd;

Ger bron fy wyneb y maent.

3Yn eu drygioni y llawenha’r breninoedd,

Ac yn eu celwyddau, y tywysogion.

4Hwynt oll ydynt odinebwyr!

Maent fel ffwrn a ennynir gan bobydd:

Gorphwysa rhag cynhyrfu,

Rhag tylino y toes hyd oni lefeinia.

5Dydd ein brenin! dechreuodd y tywysogion boethi gan win;

Estynodd efe ei law gyda gwatwarwyr!

6Pan nesasant, fel ffwrn oedd eu calon gan eu cynllwyn;

Yr holl nos cysgodd eu poethder,

Y bore fe a gynneuodd fel tân fflamllyd.

7Hwynt oll — ymboethant fel ffwrn;

A difasant eu barnwyr;

Eu holl freninoedd a syrthiasant:

Ac ni alwodd neb o’u herwydd arnaf fi.

8Ephraim — â’r cenedloedd yr ymgymysgodd efe;

Ephraim — daeth yn deisen heb ei throi:

9Difaodd estroniaid ei gryfder,

Ond efe nid yw yn gwybod;

Penwyni hefyd a ymdaenodd arno,

Ond efe nid yw yn gwybod;

10Ac iselhawyd balchder Israel sydd yn ei wyneb:

Ond ni ddychwelasant at yr Arglwydd eu Duw,

Ac ni cheisiasant ef er hyn oll.

11A bu Ephraim fel colomen wirion heb ddeall;

Ar yr Aipht y galwasant,

At yr Assyriad yr aethant.

12Pan yr elont, taenaf drostynt fy rhwyd;

Ac fel adar y nefoedd, dygaf hwynt i lawr;

Cosba hwynt fel y mynegwyd i’w cynnulleidfa,

13Gwae hwynt! o herwydd ffoisant oddiwrthyf;

Dinystr iddynt! o herwydd gwrthryfelasant i’m herbyn:

A Myfi — gwaredais hwynt;

Ond hwy — dywedasant wrthyf gelwyddau;

14Ac ni waeddant arnaf â’u calon,

Pan udant ar eu gwelyau:

Am yd a gwin newydd yr ymgasglant;

Troant yn fy erbyn.

15Wedi eu ceryddu, cryfheais eu breichiau;

Ond yn fy erbyn y dychymygant ddrwg;

16Dychwelant — nid ataf fi;

Maent fel bwa twyllodrus:

Syrthia gan y cleddyf eu tywysogion,

O herwydd rhyfyg eu tafod:

Hyn fydd yn wawd iddynt yn ngwlad yr Aipht.