Iago 4 - Prophets and Epistles 1852-62 (John Owen)

PEN. IV.

1O ba le y mae rhyfeloedd ac ymladdau yn eich plith? onid oddiyma, oddiwrth eich chwantau a frwydrant yn eich aelodau?

2Chwantwch, ond nid ydych yn cael; lladdwch a chenfigenwch, ond nid ellwch gyrhaeddyd; ymladdwch a rhyfelwch, ond nid ydych yn cael, am na ofynwch:

3gofynwch, ond ni dderbyniwch, o herwydd gofynwch ar gam, fel y treulioch ef ar eich chwantau.

4Godinebwyr a godinebesau! oni wyddoch fod cariad at y byd yn gasineb gan Dduw? Pwy bynag gan hyny a fyno fod yn garwr byd, a gyfrifir yn elyn gan Dduw.

5A dybiwch y llefara’r Ysgrythyr yn ofer? ai at genfigen y tuedda’r Ysbryd a annedda ynom?

6Yn hytrach rhydd fwy o rad, o herwydd dywed, “Gwrthwyneba Duw y beilchion, ond rhydd rad i’r gostyngedig.”

7Ymostyngwch gan hyny i Dduw; gwrthwynebwch Ddiafol, a ffŷ oddiwrthych.

8Nesëwch at Dduw, ac atoch y nesâ; glanhewch eich dwylaw, chwi bechaduriaid; a phurwch eich calonau, chwi o feddwl dauddyblyg:

9ymofidiwch, a galerwch, ac wylwch; tröer eich chwerthin i alar, a’ch llawenydd i dristwch;

10ymddarostyngwch gerbron yr Arglwydd, a derchafa chwi.

11Na absenwch eich gilydd, frodyr: yr hwn a abseno ei frawd ac a farno ei frawd, absena y ddeddf a barna y ddeddf; ac os berni y ddeddf, nid wyt wneuthurwr o’r ddeddf ond yn farnydd.

12Un Deddfroddwr a Barnydd sydd, yr hwn a ddichon achub a chollfarnu: pwy wyt ti a ferni arall?

13Clywch yn awr y rhai a ddywedwch, “Heddyw neu yfory awn i’r cyfryw ddinas, ac aroswn yno flwyddyn, a marchnadwn ac ennillwn;”

14ond ni wyddoch beth a fydd yfory, canys beth yw eich bywyd? tarth yn ddiau ydyw, a ymddengys dros ychydig, ac yna diflana:

15yn lle hyn dylech ddywedyd, “Os myn yr Arglwydd, yna byw fyddwn a gwnawn hyn neu hyny.”

16Ond yn awr ymffrostio a wnewch yn eich rhyfyg: pob cyfryw ymffrost, drwg ydyw.

17Am hyny y neb a wyddo wneuthur da, ac nis gwnelo, pechod yw iddo.