Iona 3 - Prophets and Epistles 1852-62 (John Owen)

PENNOD III.

1Pan ddaeth gair Iehofa at Iona yr eilwaith, gan ddywedyd, —

2“Cyfod, dos i Ninife, y ddinas fawr, a chyhoedda iddi y cyhoeddiad yr hwn a fynegaf i ti;”

3yna cyfododd Iona, ac aeth i Ninife yn ol gair Iehofa.

A Ninife oedd ddinas fawr iawn, taith tri diwrnod.

4Pan ddechreuodd Iona fyned trwy’r ddinas daith un diwrnod, yna gwaeddodd a cyhoeddodd, — “Deugain niwrnod, a Ninife a ddymchwelir!”

5A gwŷr Ninife a gredasant Dduw, a chyhoeddasant ympryd; gwisgasant hefyd sachlenau o’r mwyaf hyd y lleiaf o honynt:

6o herwydd daethai y gair at frenin Ninife; yna cyfododd o’i orsedd, a diosgodd ei wisg oddiam dano, a gwisgodd sachlen, ac eisteddodd yn y lludw:

7a gwaeddwyd a chyhoeddwyd trwy Ninife, yn ol gorchymyn y brenin a’i bendefigion, gan ddywedyd, —

“Dyn ac anifail, eidion a dafad,

Na phrofant ddim, na phorant, a dwfr nac yfant;

8A gwisger â sachlenau ddyn ac anifail;

Ië, galwant ar Dduw yn egnïol,

A thröant bob un oddiwrth ei ffordd ddrwg

Ac oddiwrth y treisiant sydd yn eu dwylaw:

9Pwy a ŵyr a dry ac yr edifarhâ Duw,

Ac y try oddiwrth angerdd ei ddigofaint,

Fel na’n dyfether.”

10Pan welodd Duw eu gweithredoedd, ddarfod iddynt droi oddiwrth eu ffordd ddrwg; yna edifarhäodd Duw am y drwg a ddywedasai y gwnai, ac nis gwnaeth.