Mica 1 - Prophets and Epistles 1852-62 (John Owen)

PENNOD I.

1Gair Iehofa, yr hwn a ddaeth at Mica y Morasthiad, yn

nyddiau Iotham, Achas, Hesecia, breninoedd Iowda, yr

hwn a welodd am Samaria ac Ierusalem, —

2Gwrandewch bobloedd, — bawb o honynt;

Clyw, wlad, ïe, oll sydd ynddi; —

Bydd, ïe, yr Arglwydd Iehofa yn eich erbyn yn dyst —

Yr Arglwydd o deml ei sancteiddrwydd:

3Canys wele Iehofa a ddaw allan o’i le;

Ië, disgyn a cherdda ar uchelfanau ’r wlad;

4A thawdd y mynyddoedd tano,

A’r glynoedd a ymholltant;

Fel cŵyr o flaen y tân,

Fel gan ddyfroedd yn rhuthro ar orwaered.

5Am drosedd Iacob y bydd hyn oll,

Ac am bechod tŷ Israel.

Beth yw trosedd Iacob? onid Samaria?

A pheth yw pechod Iowda? onid Ierusalem?

6Am hyny gwnaf Samaria yn garnedd y maes,

Yn blanigfaoedd gwinllan;

A pharaf dreiglo i’r dyffryn ei cheryg,

A’i sylfeini a ddadguddiaf:

7A’i holl gerf-ddelwau a ddryllir,

A’i holl wobrau a losgir yn y tân,

A’i holl eilunod a wnaf yn ddifrod;

Gan mai o wobr putain y casglodd hwynt,

Yn wobr putain hefyd y dychwelant.

8O herwydd hyn gwnaf iddi alaru ac udo,

Paraf iddi gerdded yn ddiosgedig ac yn noeth,

Gwnaf iddi alaru fel môrfilod,

Ac wylo fel estrysiaid:

9Canys anaele fydd ei dyrnod;

Yn ddiau y daw hyd at Iowda,

Gan nesau hyd at borth fy mhobl,

Hyd at Jerusalem.

10Yn Gath na fynegwch hyn,

Gan wylo na wylwch;

Yn nhŷ Ophrah mewn llwch ymdreigla;

11Dos erddot ymaith breswylferch Saphir,

Yn noeth dy warth;

Na aed allan breswylferch Sanan gan alaru;

Tŷ Asel, cymered genych ei sefyllfan:

12Diau dihoena am dda breswylferch Maroth,

Canys disgyn ddrwg oddiwrth Iehofa hyd borth Ierusalem;

13Rhwymed wrth y cerbyd

Y buan-farch, breswylferch Lacis;

Dechreuad pechod fu hi i ferch Sïon,

Canys ynot y cafwyd troseddiadau Israel;

14Am hyny y rhoddi anrhegion i Moreseth-Gath;

Tai Acsib, yn gelwydd fyddant i freninoedd Israel.

15Eto etifedd a ddygaf i ti, preswylferch Moresa;

Daw ef hyd Adulam, gogoniant Israel.

16Ymfoela ac eillia am blant dy hoffderau;

Ymhelaetha dy foelni fel yr eryr,

O herwydd mudwyd hwynt oddiwrthyt.