Hosea 9 - Prophets and Epistles 1852-62 (John Owen)

PENNOD IX.

1Na lawenha Israel, gan orfoledd, fel y cenedloedd;

Canys puteiniaist, gan ymadael oddiwrth dy Dduw:

Ceraist wobrau ar bob llawr yd.

2Nid y llawr-dyrnu na’r gwinwryf a’u portha;

A metha iddynt y gwin newydd.

3Ni chânt drigo yn ngwlad yr Arglwydd;

Ond dychwel Ephraim i’r Aipht,

Ac yn Assyria yr hyn sydd aflan a fwytânt.

4Ni thywalltant i’r Arglwydd win,

Ac ni bydd cymeradwy ganddo eu haberthau;

Fel bara galarwyr y byddant iddynt,

Pawb a’i bwytânt a halogir;

Dïau eu bara a fydd iddynt eu hunain,

Ni ddaw i dŷ yr Arglwydd.

5Beth a wnewch ar ddydd yr ymgynnull,

Ac ar ddydd cylchwyl yr Arglwydd?

6Canys, wele ânt ymaith rhag y dinystrydd;

Yr Aipht a’u casgla, Memphis a’u cladd hwynt:

Trysorfanau eu harian, y danadl a’u hetifedda;

Y drain a fydd yn eu pebyll.

7Daeth dyddiau yr ymweliad!

Daeth dyddiau talu’r pwyth!

Adnebydd Israel ef yn ynfyd — y prophwyd,

Yn wallgof, ddyn yr ysbryd:

O herwydd amlder dy anwiredd,

Amlhaodd hefyd y dygasedd.

8Gwyliedydd Ephraim!

Gyda’m Duw yn brophwyd!

Magl yr adarwr yw ar ei holl ffyrdd.

Yn ddygasedd yn nhŷ ei Dduw.

9Dwfn ymlygrasant fel yn nyddiau Gibea:

Cofia eu hanwiredd,

A gofwya eu pechodau.

10Fel grawnwin yn yr anialwch y cefais Israel,

Fel blaenffrwyth ar y ffigysbren,

Yn eu dechreu y gwelais eich tadau:

Hwy — aethant at Baal-peor,

Ac ymroddasant i warth,

A daethant yn ffiaidd fel eu cariad.

11Ephraim fel aderyn a eheda ymaith,

Felly eu gogoniant oddiwrth enedigaeth,

Ac oddiwrth y bru, ac oddiwrth y beichiogi.

12Ond os dygant i fyny eu plant,

Eto dygaf hwynt ymaith fel na byddont ddynion:

Yn ddïau hefyd gwae hwynt!

Pan ymadawyf oddiwrthynt.

13Ephraim, yn ol yr hyn a welais yn Tyrus,

Sydd blanigyn mewn cyfanneddle:

Eto rhaid i Ephraim ddwyn allan i’r lleiddiad ei blant!

14Rho iddynt, Arglwydd — beth a roddi?

Rho iddynt fru dieppil a bronau sychion.

15Eu holl ddrygioni sydd yn Gilgal;

O herwydd yno y casëais hwynt:

Am ddrwg eu gweithredoedd, o’m tŷ y gyraf hwynt allan;

Ni chwanegaf eu caru;

Eu holl dywysogion ydynt wrthgilwyr.

16Tarewir Ephraim; eu gwraidd a wywa;

Ffrwyth ni ddygant; eto os cenedlant,

Lladdaf anwylion eu bru.

17Gwrthoda fy Nuw hwynt,

Am na wrandawent arno:

A byddant grwydraid yn mysg y cenedloedd.