Iago 2 - Prophets and Epistles 1852-62 (John Owen)

PEN. II

1Fy mrodyr, onid yw genych ffydd ogoneddus ein Harglwydd Iesu Grist gyda derbyn wyneb?

2Oblegid os daw i mewn i’ch cynnulleidfa ŵr â modrwy aur, mewn dillad gwychion, ac y daw i mewn hefyd un tlawd mewn dillad gwaelion,

3ac edrych o honoch arno ef a wisga ddillad gwychion, a dywedyd wrtho, “Eistedd di yma mewn lle da,” a dywedyd wrth y tlawd, “Saf di yna,” neu, “Eistedd yma o tan fy nhroedfainc;”

4yna oni wnewch wahaniaeth ynoch eich hunain, ac y deuwch yn farnwyr â meddyliau drwg genych?

5Gwrandewch, fy mrodyr anwyl, oni ddewisodd Duw dlodion y byd hwn yn gyfoethogion mewn ffydd, ac yn etifeddion y deyrnas yr hwn a addawodd i’r rhai a’i carant?

6Ond chwi, anmharchasoch y tlawd. Oni wna’r cyfoethogion eich gorthrymu, a’ch tynu ger bron brawdleoedd?

7oni chablant yr enw da a elwir arnoch?

8Os yn wir y cyflawnwch y ddeddf freninol, yn ol yr Ysgrythyr, “Câr dy gymydog fel dy hun,” da y gwnewch.

9Ond os y derbyniwch wyneb, pechod a wnewch, gan yr argyhoeddir chwi gan y ddeddf megys troseddwyr.

10Canys y neb a gadwo’r ddeddf oll, ond a dramgwyddo mewn un rhan, euog yw o’r cyfan.

11Oblegid yr hwn a ddywedodd, “Na odineba,” a ddywedodd hefyd, “Na ladd;” ac os ni odinebi, ond eto a leddi, troseddwr wyt o’r ddeddf.

12Felly dywedwch ac felly gwnewch, fel y rhai a fernir wrth ddeddf rhyddid.

13Oblegid barn ddidrugaredd a fydd i’r hwn ni wna drugaredd: ond gorfoledda trugaredd yn erbyn barn.

14Pa fodd, fy mrodyr, os dywed neb fod ganddo ffydd, ac heb fod ganddo weithredoedd? a ddichon ffydd ei achub?

15Oblegid os bydd brawd neu chwaer yn noeth ac mewn eisieu o ymborth beunyddiol,

16ac os dywed neb un o honoch wrthynt, “Ewch ymaith mewn heddwch; cynheser a digoner chwi,” ac heb roddi o honoch iddynt o anghenrheidiau’r corff, pa fudd yw?

17Felly hefyd ffydd, os na fydd ganddi weithredoedd, marw yw, pan wrthi ei hun.

18Ond dywed rhyw un, “Mae genyt ti ffydd, a chenyf finnau weithredoedd; dangos i mi dy ffydd heb dy weithredoedd, minnau a ddangosaf i ti fy ffydd trwy fy ngweithredoedd.

19Ti a gredi fod un Duw, da y gwnai; creda y cythreuliaid hefyd a chrynant.”

20Ond a fyni di wybod, O ddyn ofer, fod ffydd heb weithredoedd yn farw?

21Abraham ein tad, oni chyfiawnhäwyd ef gan weithredoedd, pan offrymodd Isaac ei fab ar yr allor?

22Gweli y cydweithiai ffydd â’i weithredoedd, a thrwy weithredoedd y perffeithid ffydd.

23Cyflawnid hefyd yr Ysgrythyr a ddywed, “Credodd Abraham Dduw, a chyfrifwyd iddo yn gyfiawnder;” a gelwyd ef yn gyfaill Duw.

24Gwelwch ynte mai trwy weithredoedd y cyfiawnhëir dyn, ac nid trwy ffydd yn unig.

25Yr un modd hefyd Rahab y butain, onid trwy weithredoedd y cyfiawnhawyd hi, pan y derbyniodd y cenadon ac y danfonodd hwynt ymaith ffordd arall?

26Oblegid fel ag y mae’r corff heb yr ysbryd yn farw, felly hefyd ffydd heb weithredoedd, marw yw.