Iago 3 - Prophets and Epistles 1852-62 (John Owen)

PEN. III.

1Na fyddwch athrawon lawer, fy mrodyr, gan wybod y derbyniwn farnedigaeth fwy;

2canys mewn llawer o bethau y tramgwyddwn oll. Os na thramgwydda neb ar air, hwn sydd ŵr perffaith, yn gallu ffrwyno, ïe, ei holl gorff

3Wele, rhoddwn ffrwynau yn mhenau y meirch, fel yr ufuddhäont i ni, ac y troffom oddiamgylch eu holl gorff.

4Wele hefyd y llongau, er mor fawr ydynt ac y gyrer hwynt gan wyntoedd gerwin, eto tröir hwynt oddiamgylch gan lyw tra bychan, ple bynag y myno’r llywydd.

5Felly hefyd y tafod, aelod bychau yw, ond mawr ymffrostia. Wele ychydig dân, pa faint o danwydd a ennyn!

6A’r tafod, tân ydyw, byd o ddrygedd! Felly y tafod a osodwyd ymhlith ein haelodau; haloga yr holl gorff, a ffagla gylchedd anian, ac a ffaglir gan uffern.

7Pob math yn wir o wylltfilod ac o adar, o ymlusgiaid hefyd ac o fôrfilod, a ddofir ac a ddofwyd gan ddynol ryw;

8ond y tafod, ni ddichon neb dynion ei ddofi; drwg anllywodraethus yw, yn llawn o wenwyn marwol.

9Ag ef y bendithiwn Dduw a’r Tad;

10âg ef hefyd y melldithiwn ddynion a wnaed ar ddelw Duw; o’r un genau y daw allan fendith a melldith! Ni ddylai, fy mrodyr, y pethau hyn fod felly.

11A ydyw ffynnon o’r un llygad yn taflu allan y melus a’r chwerw?

12A ddichon ffigysbren, fy mrodyr, ddwyn grawn olew-wydd, neu winwydden, ffigys? Felly ni ddichon un ffynnon roddi dwfr hallt a chroew.

13Pwy sydd ddoeth a deallus yn eich plith? dangosed trwy ymarweddiad da ei weithredoedd mewn addfwynder doethineb.

14Ond os cenfigen chwerw a chynhen ydynt genych yn eich calon, na wnewch ymffrostio a chelwyddu yn erbyn y gwirionedd.

15Nid yw y ddoethineb hon yn disgyn oddiuchod; ond daearol yw, anianol a dieflig:

16canys lle mae cenfigen a chynhen, yno y mae annhrefn a phob gwaith drwg.

17Ond y ddoethineb oddiuchod sydd gyntaf yn bur, yna yn heddychlon, yn fwynaidd, yn hawdd ei thrin, yn llawn o drugaredd ac o ffrwythau da, yn ddiduedd, ac yn ddiragrith:

18o herwydd ffrwyth cyfiawnder a heuir mewn heddwch gan y rhai a wnant heddwch.