Habacuc 1 - Prophets and Epistles 1852-62 (John Owen)

PENNOD I.

1Y baich a welodd Habacuc y prophwyd: —

2Pa hyd, Arglwydd, y gwaeddaf, ac ni wrandewi?

Y bloeddiaf arnat “Gormes,” ac ni waredi?

3Pam y dangosir i mi drawsder,

Ac ar orthrymder yr edrychi?

Ië, anrhaith a gormes ydynt ger fy mron,

A dadl ac ymryson sy’n cyfodi!

4Am hyn y metha y gyfraith

Ac nid ä allan farn i fuddygoliaeth,

Am fod y drygionus yn amgylchu y cyfiawn:

Am hyn ä allan farn gamweddus.

5Gwelwch chwi ddirmygwyr,

Ië, edrychwch a synwch a rhyfeddwch;

Canys gwaith a wnaf yn eich dyddiau

Na chredwch pan fyneger ef:

6Canys wele fi yn cyffröi y Caldëaid,

Cenedl greulawn a byrbwyll,

Yr hon a gerdd trwy amgylchoedd y wlad

I feddiannu trigfanau nid ei heiddo.

7Ofnadwy ac arswydus a fydd —

O honi ei hun y daw ei hawl a’i huchelder:

8Buanach na llewpartiaid fydd ei mheirch,

Ac awchlymach na bleiddiaid yr hwyr;

Ac ymdaena ei marchogion;

Ië, ei marchogion o bell y deuant,

Ehedant fel eryr yn brysio i ddifrodi.

9Yn gwbl er anrheithio y daw;

Gogwydd ei hwyneb fydd tua’r dwyrain,

A chasgla gaethion fel y tywod.

10Breninoedd hefyd a wawdia,

A bydd tywysogion yn watwar iddi;

A phob caer a ddirmyga,

Ië, casgla lwch a goresgyna hi.

11Yna adnewydda ei hysbryd,

Ac ä trwodd, ac a drosedda:

Hwn ei dewrder yn Dduw iddi!

12Ond er cynt, Arglwydd, fy Nuw ydwyt;

Fy sancteiddydd — ni byddwn feirw.

Arglwydd, er barn y gosodaist hi,

Ac yn gadarn er ein ceryddu y gwnaethost hi.

13Glân dy lygaid, fel nad edrychi ar ddrwg,

Ac edrych ar ofid nid elli:

Pam yr edrychi ar y bradwrus,

Yr ymguddi pan mae’r annuwiol

Yn traflyncu un cyfiawnach nag ef ei hun?

14Ac y gwnai ddyn fel pysg y môr,

Fel yr ymlusgiad nad oes iddo lywydd?

15Pob un a dỳn allan â’i fach,

Casgla hwynt â’i rwyd,

Ië, cynnulla hwynt â’i fallegrwyd:

Am hyny llawenycha a gorfoledda.

16O herwydd hyn abertha i’w rwyd,

Ac arogldartha i’w fallegrwyd;

Am mai trwyddynt bydd ei ran yn fras,

A’i fwyd yn helaethlawn. —

17A gaiff efe gan hyny estyn ei rwyd,

A pharhau i ladd cenedloedd heb arbed!