1 Pedr 4 - Prophets and Epistles 1852-62 (John Owen)

PEN. IV.

1Yna gan i Grist ddyoddef trosom yn y cnawd, arfoger chwi hefyd â’r un bwriad: oblegid yr hwn a ddyoddefodd yn y cnawd a beidiodd â phechod,

2fel na byddo fyw mwyach, dros yr amser sydd yn ol yn y cnawd, i chwantau dynion, ond i ewyllys Duw.

3Canys digon i ni yr amser a aeth heibio o’n bywyd i weithredu ewyllys y cenedloedd, gan rodio mewn trythyllwch, trachwant, gloddest, cyfeddach, dïota, ac eilunaddoliad ananianol.

4O herwydd hyn y synant, sef, am na chydredwch â hwynt i’r unrhyw ormodedd o afradlondeb, gan eich difenwi;

5y rhai a roddant gyfrif i’r hwn sydd barod i farnu y byw a’r meirw.

6Canys er mwyn hyn yr efengylwyd hefyd i’r meirw, fel y barned hwynt gan ddynion yn y cnawd, ac adfywier hwynt gan Dduw trwy yr Ysbryd.

7Ond diwedd pob peth a nesäodd: am hyny byddwch gymedrol a gwyliwch i weddïo.

8Ac uwchlaw pob dim, bydded genych gariad gwresog tuag at eich gilydd, o herwydd cuddia cariad liaws o bechodau.

9Byddwch lettygar y naill i’r llall heb rwgnach.

10Pob un, megys y derbyniodd rodd, gweinyddwch yr un y naill i’r llall, fel da oruchwylwyr o rad amrywiol Duw.

11Os llefara neb, llefared megys geiriau Duw; os gweinydda neb, gweinydded megys trwy’r nerth a rydd Duw; fel ymhob dim y gogonedder Duw trwy Iesu Grist; yr hwn y bo iddo y gogoniant a’r gallu yn oes oesoedd. Amen.

12Na synwch, anwyliaid, o herwydd y tân cyneuol sydd yn eich plith, yr hwn sydd er eich profi, fel pe dygwyddasai i chwi beth rhyfedd:

13ond gan y cyfranogwch o ddyoddefiadau Crist, llawenhëwch; fel y llawenhäoch hefyd yn orfoleddus ar ddadguddiad o’i ogoniant.

14Os gwaradwyddir chwi am enw Crist, dedwydd ydych; oblegid gorphwys arnoch Ysbryd gogoneddus Duw: ganddynt hwy yn wir difenwir Ef, ond genych chwi Efe a ogoneddir.

15Ond na ddyoddefed neb o honoch fel llofrudd, neu leidr, neu ddrwgweithredwr, neu ymyrydd;

16ond os fel cristion, na chywilyddied, ond gogonedded Dduw o herwydd hyn;

17canys yr amser yw i’r farn ddechreu ar dŷ Dduw; ac os yn gyntaf arnom ni, beth fydd diwedd y rhai a anufuddhânt efengyl Duw?

18ac os o braidd yr achubir y cyfiawn, p’le yr ymddengys yr annuwiol a’r pechadur?

19Am hyny hefyd traddoded y rhai a ddyoddefant yn ol ewyllys Duw, eu heneidiau iddo Ef megys i Berchenog ffyddlawn, gan wneuthur yr hyn sydd dda.