Eperu 11 - Samoan Contemporary New Testament

O le Fa‘atuatua

1A o le fa‘atuatua, o le fa‘alagolago lea i mea ‘ua fa‘amoemoe i ai, o le mautinoa lea o mea e lē o va‘aia.

2Auā o le mea lea na ta‘uleleia ai tagata i aso ‘ua mavae.

3O le fa‘atuatua ‘ua tatou iloa ai na faia mea uma i le afioga a le Atua; na faia fo‘i mea ‘ua va‘aia i mea e lē aliali mai.

4O le fa‘atuatua na avatu ai e Apelu i le Atua le taulaga e sili ‘ona lelei i lo Kaino; o lea fo‘i ‘ua ta‘ua ai o ia ‘ua amiotonu, o lo‘o tauleleia ana taulaga e le Atua; ‘ua oti o ia, a o lona fa‘atuatua ‘ua tautala mai ai pea o ia.

5O le fa‘atuatua na ‘ave‘esea ai Enoka ‘ina ‘ia lē o‘o ‘iā te ia le oti, na lē iloa fo‘i o ia, auā na ‘avea o ia e le Atua; auā a o le‘i ‘ave‘eseina, sa ta‘ua o ia o lē ‘ua fiafia i ai le Atua.

6A leai fo‘i se fa‘atuatua, e lē mafai ‘ona fiafia mai o ia; auā e tatau i lē o lo‘o alu atu i le Atua ‘ona talitonu o lo‘o soifua o ia, o ia fo‘i na te tauia mai i ē e matuā sā‘ili ‘iā te ia.

7O le fa‘atuatua na fausia ai e Noa le va‘a ‘ina ‘ua mata‘u, e ola ai lona ‘aiga, ‘ina ‘ua a‘oa‘oina e le Atua i mea e le‘i va‘aia i ai aso na fa‘asalaina ai e ia le lalolagi; ma ‘ua na maua ai le amiotonu, o le amiotonu lea e i le fa‘atuatua.

8O le fa‘atuatua na usita‘i ai Aperaamo ‘ina ‘ua vala‘auina o ia e alu i le mea o le a maua e ‘avea ma ona fanua, na alu fo‘i o ia, ‘ae le‘i iloa po o fea a alu i ai.

9O le fa‘atuatua sa aumau ai o ia i le nu‘u na folafolaina, ‘ina o fai mo tagata ‘ese, sa nofo i fale ‘ie, fa‘apea fo‘i Isaako ma Iakopo, o ē na tofia fa‘atasi ma ia i lea lava mea na folafolaina;

10auā na fa‘atalitali atu o ia i se ‘a‘ai na fa‘avaeina, o lona matai tufuga ma lē na atiina a‘e o le Atua lava lea.

11O le fa‘atuatua fo‘i na maua ai e Sara le malosi e fānau ai, na fānau fo‘i o ia ‘ina ‘ua mavae tausaga o lona malosi, auā na manatu o ia e fa‘amaoni lē na folafolaina mai.

12O le mea lea sa tutupu mai ai i le to‘atasi, a ‘ua lata ‘ona oti, ni tagata e to‘atele e pei o fetū o le lagi, e pei fo‘i o le oneone i le matāfaga e lē mafaitaulia.

13Na oti i latou nei uma lava a o fa‘atuatua, e le‘i maua mea na folafolaina, a ‘ua na ‘ona va‘aia mamao atu e i latou, ma talia ma le fiafia, ma ‘ua ta‘utino mai fo‘i o tagata ‘ese i latou ma le aumau i le lalolagi.

14Auā o i latou o ē e fai ‘upu fa‘apenā, ‘ua matuā fa‘ailoa mai lava o lo‘o sā‘ili e i latou lo latou lava nu‘u.

15Auā fo‘i ana manatua e i latou le nu‘u na ō mai ai, po ‘ua mafai e i latou ‘ona toe fo‘i atu i ai;

16a o lenei, ‘ua naunau lava i latou i le nu‘u e sili ‘ona lelei, o le nu‘u fa‘alelagi lea; o le mea lea e lē ma ai le Atua ‘iā te i latou, ‘ina ‘ia ta‘ua o ia o lo latou Atua; auā ‘ua sauni e ia le ‘a‘ai mo i latou.

17O le fa‘atuatua na faitaulaga ai Aperaamo ia Isaako, ‘ina ‘ua tofotofoina o ia; o lē na tu‘uina mai i ai le folafolaga, ‘ua matuā nofo sauni lava e avatu lona atali‘i e to‘atasi e fai ma taulaga.

18Sa fetalai mai fo‘i le Atua ‘iā te ia, “E vala‘auina lau fānau ia Isaako.”

19‘Ua manatu o ia e mafaia e le Atua ‘ona toe fa‘atūina mai tagata nai ē ‘ua oti, o lea fo‘i la ‘ua toe maua mai ai o ia. O se fa‘atusa lea.

20O le fa‘atuatua na fa‘amanuia atu ai Isaako ia Iakopo ma Esau i mea o le a o‘o mai.

21O le fa‘atuatua na fa‘amanuia ta‘itasi ai e Iakopo atali‘i o Iosefa, ‘ina o le a oti o ia, na ifo fo‘i o ia ma toto‘o i le ulu o lona to‘oto‘o.

22O le fa‘atuatua na fa‘amanatu mai ai e Iosefa, ‘ina o le a oti o ia, e ō ‘ese atu le fānauga a Isaraelu, ma ‘ua poloa‘i atu ai fo‘i o ia ‘iā i latou e uiga i ona ivi.

23O le fa‘atuatua sa natia ai Mose i masina e tolu e ona mātua, ‘ina ‘ua fānau mai o ia, auā na iloa e i lā‘ua o ia o le tama tino lelei; sa lē fefefe fo‘i i lā‘ua i le poloa‘iga a le tupu.

24O le fa‘atuatua na lē mafai ai Mose, ‘ina ‘ua matua o ia, ‘ona ia ta‘ua o ia o le tama a le afafine o Farao,

25‘ua filifili e ia ‘ia agaleagaina o ia fa‘atasi ma tagata o le Atua e lelei ai, ‘ae ‘aua ne‘i ‘iā te ia le fiafia i le agasala e vave mavae.

26‘Ua manatu o ia i le ‘upu fāifāi ‘ona o Keriso, o le ‘oa lea e sili i fa‘aputugā‘oa a Aikupito; auā sa fa‘amoemoe o ia i le taui.

27O le fa‘atuatua na tu‘ua ai e ia Aikupito, ‘ua lē fefe i le ita o le tupu; auā na lototele e pei o se ‘ua na iloa atu lē e lē o va‘aia.

28O le fa‘atuatua na fai ai e ia le paseka, ma le sausauina atu o le toto, ‘ina ‘ia le papa‘i ane ia i latou lē na fano ai ulumatua.

29O le fa‘atuatua na ui ai i latou i le Sami ‘ula‘ula e pei o le ‘ele‘ele matūtū; na taumafai fo‘i tagata Aikupito e sopo‘ia, a ‘ua malelemo ai i latou.

30O le fa‘atuatua na solo ai pa o Ieriko, ‘ina ‘ua fa‘ata‘amilo ai i latou i aso e fitu.

31O le fa‘atuatua na lē oti ai Raava, le fafine talitane, fa‘atasi ma tagata fa‘alogogatā, auā sa talia lelei e Raava tagata na asiasi atu i lona nu‘u.

32O le ā ‘ea se isi a‘u tala a fai atu? Auā ‘ua le lava le taimi ‘ou te fa‘amatalaina atu ai mea e uiga ia Kitiona, ma Parako, ma Samasoni, ma Iefata, ma Tavita, ma Samuelu, ma le ‘au perofeta.Fa‘ama 6.11; 4.6; 15.20; 12.7

33O i latou ia na fa‘ato‘ilaloina mālō i le fa‘atuatua, ma fa‘amalosia le amiotonu, ma maua ai mea na folafolaina mai, ma ‘ua tapunia fo‘i gutu o leona,

34ma tineia le malosi o le afi, na fa‘asaoina fo‘i mai le mata o le pelu, ma ‘ua fa‘amalosia ai i latou sa vāivāi, ma ‘ua ‘avea ai ma fitafita mo le tau‘a, na tulia ai ‘au a nu‘u ‘ese.

35Na maua mai e fafine o latou tagata oti ‘ina ‘ua toe tutū mai.

Na fa‘ataugāina nisi, ‘ua lē talia e i latou le olataga, ‘ina ‘ia maua ai e i latou le toetū mai e sili ‘ona lelei.

36O isi na mafatia i tauemuga, ma sasaina, ma noanoatia ma tu‘uina i falepuipui.

37Na fetogia i latou i ma‘a, ma ta‘ivaeluaina i ili, ma fasiotia i le pelu; na feoa‘i solo ma ‘o‘ofu i pa‘u mamoe ma pa‘u ‘oti; na matitiva i latou ma puapuagātia ma fa‘asauāina

38(e lē aogā le lalolagi ia i latou) na feoa‘i solo i latou i vao, ma mauga, ma ana, ma lua i le ‘ele‘ele.

39O i latou uma ia o ē na ta‘uleleia ‘ona o le fa‘atuatua, na lē maua e i latou le mea na folafolaina,

40auā ‘ua saunia e le Atua le isi mea e sili ‘ona lelei mo i tatou, ‘ina ‘ia lē fa‘a‘ato‘atoaina i latou pe a lē i ai i tatou.