Kolose 4 - Samoan Contemporary New Testament

1O ‘outou ali‘i, ‘ia ‘outou avatu mea e tatau, ma mea e tusa ai ia ‘outou pologa, auā ‘ua ‘outou iloa o lo‘o ‘iā te ‘outou fo‘i le Ali‘i i le lagi.

O Apoapoa‘iga

2‘Ia ‘outou fa‘amalosi i le tatalo, ma ‘ia ‘outou mataala i lea mea fa‘atasi ma le fa‘afetai.

3‘Ia ‘outou tatalo fo‘i mo i matou, ‘ina ‘ia fa‘aavanoa mai e le Atua se faitoto‘a o le ‘upu mo i matou, e tautala atu ai i le mea lilo e uiga ‘iā Keriso, o le mea lilo lava lea ‘ua fa‘apagotāina ai a‘u,

4‘ina ‘ia ‘ou fa‘ailoa atu ai, e pei lava ‘ona tatau ‘ona ‘ou tautala atu ai.

5‘Ia ‘outou savavali ma le poto i ē o i tua, ma ‘ia ‘outou fa‘aaogāina aso o lenei olaga.

6‘Ia lē aunoa a ‘outou ‘upu ma le alofa ia fa‘a‘o‘onaina i le masima, ma ‘ia ‘outou iloa ‘ona fai fa‘atatau se tali i tagata ta‘ito‘atasi uma.

7O mea uma lava o ‘iā te a‘u e fa‘ailoa atu ‘iā te ‘outou e Tuiko, o le uso pele o ia, ma o le ‘au‘auna fa‘amaoni, o lē na ma ‘au‘auna fa‘atasi i le Ali‘i.

8‘Ua ‘ou ‘auina atu o ia ‘iā te ‘outou ‘ona o lenei lava mea, ‘ina ‘ia ‘outou iloa mea o lo‘o i ai ‘iā te i matou, ma ‘ia fa‘amafanafanaina o ‘outou loto;

9o lo‘o ō atu ma Onesemo, o le uso fa‘amaoni lea ma le pele, o ia fo‘i o se tasi lava o ‘outou. E fa‘ailoa atu e i lā‘ua ‘iā te ‘outou mea uma o lo‘o faia ‘i‘inei.

10O lo‘o alofa atu ‘iā te ‘outou Aritako, lē o lo‘o fa‘atasi ma a‘u i le falepuipui, ‘atoa ma Mareko, o le ‘āiga o Panapa o ia (o ia lea na poloa‘iina ai ‘outou, ‘ina ‘ia ‘outou talia lelei pe a alu atu ‘iā te ‘outou);

11o lo‘o alofa atu fo‘i Iesu, lē ‘ua igoa ia Iuso. Na o i latou ia o le au peritomeina, sa galulue fa‘atasi ma a‘u i le Mālō o le Atua, na ‘avea fo‘i i latou ma fa‘amafanafana mai ‘iā te a‘u.

12O lo‘o alofa atu ‘iā te ‘outou Epafara, o ia o se tasi lava o ‘outou, ma o le ‘au‘auna a Keriso Iesu o lo‘o matuā tatalo o ia e lē aunoa mo ‘outou, ‘ina ‘ia ‘outou tumau ma ia tagata matutua ‘outou, o ē ‘ua mautinoa le finagalo uma lava o le Atua.

13Auā o la‘u molimau atu e uiga ‘iā te ia, na matuā galue malosi o ia mo ‘outou ma ē o i Laotikaia, ‘atoa ma i latou o lo‘o i Iarapoli.

14O lo‘o alofa atu ‘iā te ‘outou Luka le foma‘i pele, ‘atoa ma Tema.

15‘Ou te alofa atu i le au uso i Laotikaia, ‘atoa ma Numefa, ma le ekalesia uma o i lona fale.

16A uma ‘ona ‘outou faitau i lenei tusi, ia faitauina fo‘i e le ekalesia i Laotikaia; ia fa‘apea fo‘i ‘ona ‘outou faitauina le tusi o le a avane e Laotikaia.

17Fai atu ia Arekipa, “Tautuanā ma oe le galuega na tu‘uina atu ‘iā te oe e le Ali‘i, ‘ina ‘ia e fa‘ataunu‘uina.”

18O a‘u o Paulo, ‘ua ‘ou tusia lenei alofa‘aga i lo‘u lava lima. ‘Ia ‘outou manatua mai o‘u noanoaga.

‘Ia ‘iā te ‘outou le alofa tunoa.