1 Ioane 3 - Samoan Contemporary New Testament

O Fānau a le Atua

1Fa‘auta i le silisili o le alofa ‘ua foa‘iina mai e le Tamā ‘iā te i tatou, ‘ina ‘ua ta‘ua i tatou o le fānau a le Atua; i le ‘ua fa‘apea lava. O le mea lea ‘ua lē iloa ai i tatou e le lalolagi, auā na lē iloa o ia.

2A‘u uō pele e, o fānau i tatou a le Atua, ‘ae le‘i fa‘aalia mai nei le uiga o i tatou. A ‘ua tatou iloa, a fa‘aalia mai o ia, ona foliga ai lea o i tatou ‘iā te ia, auā tatou te iloa tino ai lava o ia.

3O i latou uma lava ‘ua i ai lenei fa‘amoemoe ‘iā Keriso, ‘ua ta‘itasi ma fa‘amamāina o ia e ia, fa‘apei ‘ona mamā o Keriso.

4O i latou uma lava e fai le agasala, ‘ua soli fo‘i e i latou le tulafono; o le agasala o le solitulafono lava lea.

5‘Ua ‘outou iloa na fa‘aalia mai o ia ‘ina ‘ia ‘ave‘eseina e ia a tatou agasala, e lē o ‘iā te ia fo‘i se agasala.

6E lē agasala se isi o ē e tumau ‘iā te ia; so o se isi e agasala ‘ua lē va‘ai o ia ‘iā te ia, ‘ua lē iloa fo‘i o ia e ia.

7Le fānau e, ‘aua ne‘i ta‘ita‘isesēina ‘outou e se isi. O lē e fai le amiotonu, o le amiotonu lea, fa‘apei o Keriso e amiotonu;

8o lē e fai le agasala, e mai le tiapolo o ia, auā ‘ua agasala le tiapolo talu mai le amataga. O le mea lava lea ‘ua fa‘aalia mai ai le Alo o le Atua, ‘ina ‘ia fa‘aumatia e ia galuega a le tiapolo.

9E lē faia e le fānau a le Atua se agasala, auā o lo‘o ‘iā te i latou uiga o le Atua; e lē faia fo‘i e i latou le agasala, auā ‘ua fānau mai i latou i le Atua.

10O le mea lea e iloa ai le fānau a le Atua ma le fānau a le tiapolo: O i latou uma o ē e lē fai le amiotonu, e lē mai le Atua i latou, ‘atoa ma ē e lē alolofa i o latou uso.

‘Ia Alofa le Tasi i le Isi

11Auā o le fe‘au lenei na ‘outou fa‘alogologo i ai mai le amataga, ‘ia tatou fealofani.

12E lē pei o Kaino; na i lē o lo‘o leaga lava ia, na fasioti fo‘i i lona uso. Aiseā na fasioti ai o ia e Kaino? Auā o ana galuega ‘ua leaga ia, a o galuega a lona uso e tonu ia.

13Uso e, ‘aua tou te ofo pe a ‘ino‘ino mai le lalolagi ‘iā te ‘outou.

14Auā ‘ua tatou iloa ‘ua tatou ola nai le oti, auā ‘ua tatou alolofa i o tatou uso. O sē e lē alofa, o lo‘o tumau ia i le oti.

15So o se isi e ‘ino‘ino i lona uso o le fasioti tagata o ia; ‘ua ‘outou iloa fo‘i e leai se fasioti tagata e tumau ‘iā te ia le ola e fa‘avavau.

16O le mea lava lenei ‘ua tatou iloa ai le alofa, auā ‘ua tu‘uina atu e ia lona ola mo i tatou, ia fa‘apea fo‘i ‘ona tu‘uina atu o tatou ola mo o tatou uso.

17‘Āfai ‘ua i se tagata le ‘oloa o le lalolagi ma ‘ua va‘ai atu i ona uso mativa, ‘ae punitia ona mata ‘iā te ia, pe fa‘apefea ‘ona tumau o le alofa o le Atua ‘iā te ia?

18La‘u fānau e, ‘aua ne‘i tatou alolofa tau o le ‘upu ma le gutu; a o galuega ma le ‘upu moni.

Lototele i Luma o le Atua

19O le mea fo‘i lenei ‘ua tatou iloa ai ‘ua tatou i ai i le ‘upu moni, ‘ua mautinoa fo‘i lea mea e o tatou loto i ona luma,

20pe ‘āfai e fa‘asala o tatou loto fuatiaifo ‘iā te i tatou lava; auā e silisili lava le Atua i o tatou loto fuatiaifo, ‘ua silafia fo‘i e ia mea uma.

21O le mea lea, la‘u fānau e, ‘āfai e lē fa‘asalaina i tatou e o tatou loto fuatiaifo, e maua e i tatou le lototele i luma o le Atua.

22‘Ua tatou maua mai ‘iā te ia mea uma lava tatou te ōle atu ai, auā ‘ua tatou tausia ana poloa‘iga: ‘ia faia mea lelei uma ‘iā te ia.

23O lenei fo‘i lana poloa‘iga: ‘ia tatou fa‘atuatua i le suafa o lona Alo o Iesu Keriso, ma ‘ia tatou fealofani e pei ‘ona fa‘atonuina ai i tatou e ia.

24O lē e tausi i poloa‘iga a le Atua, ‘ua i le Atua o ia, ‘ua ‘iā te ia fo‘i le Atua. ‘Ua tatou iloa ‘ua i ai o ia ‘iā te i tatou, ‘ona o lona Agaga na foa‘iina mai e ia ‘iā te i tatou.