1 Tesalonia 2 - Samoan Contemporary New Testament

O le Galuega a Paulo i Tesalonia

1Uso e, ‘ua ‘outou iloa e le‘i i‘uvale lo matou ō atu ‘iā te ‘outou.

2E pei ‘ona ‘outou iloa na tigāina ma fa‘aleagaina i matou i Filipi, ‘ae peita‘i na fa‘alototeteleina i matou e le Atua e ta‘utino atu le Tala Lelei a le Atua, a o fa‘afeagai ma le tele o tagata e tete‘e mai.

3Auā o lo matou apoapoa‘i atu ‘iā te ‘outou e le‘i fa‘avaeina i mea sesē po o ala lē mamā, matou te le‘i taumafai fo‘i e maileia se isi.

4‘Ae peita‘i, fa‘apei ‘ona tatau i le finagalo o le Atua ‘ona tu‘uina mai ‘iā te i matou le Tala Lelei, o lea fo‘i matou te tautala atu ai, e lē ‘ina ‘ia fa‘afiafiaina tagata, a o le Atua o lē na te tofotofo i o tatou loto.

5Auā ‘ua ‘outou iloa lelei matou te le‘i ō atu ‘iā te ‘outou ma ni ‘upu fa‘avi‘ivi‘i; ‘ua silafia fo‘i e le Atua matou te le‘i natia le mana‘o tele i mea.

6Matou te le‘i sā‘ilia fo‘i le vi‘iga mai tagata, po o ‘outou po o isi tagata, e ui lava ‘ina mafai ‘ona matou matuā fa‘atauānauina ‘outou, auā o i matou o ‘aposetolo a Keriso.

7‘Ae peita‘i na matou agamalū a o tatou fa‘atasi, fa‘apei o se tinā ‘ona tausi lelei i lana lava fānau.

8O le mea lea, ‘ona o lo matou alolofa ‘iā te ‘outou, ‘ua matou sauni ai e avatu ‘iā te ‘outou, e lē na o le Tala Lelei i le Atua a o o matou ola fo‘i, auā ‘ua pele ‘outou ‘iā te i matou.

9Uso e, ‘ia ‘outou manatua la matou galuega mamafa ma le tigā, na matou galulue i le po ma le ao, ‘ina ‘ia lē fa‘alavelave i matou i se isi o ‘outou a o matou tala‘i atu le Tala Lelei a le Atua.

10O ‘outou lava o a matou molimau, ‘atoa fo‘i ma le Atua, i le pa‘ia ma le amiotonu, ma le lē ta‘uleagaina o la matou amio ‘iā te ‘outou o ē e fa‘atuatua.

11‘Ua ‘outou iloa na matou apoapoa‘i ‘iā te ‘outou ta‘ito‘atasi, ma fa‘amalosi ‘iā te ‘outou, ma fa‘atonu ‘iā te ‘outou, fa‘apei o le tamā i lana fānau.

12‘Ina ‘ia ‘outou savavali ia tatau i le Atua, o lē na vala‘auina ‘outou i lona mālō ma lona mamalu.

13Matou te fa‘afetai atu i le Atua e lē aunoa ‘ona o lenei mea, ‘ina ‘ia maua e ‘outou le afioga a le Atua na ‘outou fa‘alogo ai ‘iā te i matou, na ‘outou talia e lē pei o ni ‘upu a tagata a o le ‘upu moni, o le afioga a le Atua, o lo‘o matuā galue fo‘i ‘iā te ‘outou o ē e fa‘atuatua.

14Auā na ‘avea ‘outou uso e, ma fa‘aa‘oa‘o o ekalesia a le Atua ‘iā Keriso Iesu o ē o lo‘o i Iutaia; ma ‘ua ‘avea ma totino o Keriso Iesu auā ‘ua ‘outou puapuagātia ‘ona o tagata o lo ‘outou lava nu‘u, pei fo‘i ‘ona puapuagātia i latou ‘ona o tagata Iutaia;

15o ē na fasiotia le Ali‘i o Iesu ‘atoa ma perofeta, ma ‘ua tulia uma i matou i fafo. E le‘i fa‘afiafiaina fo‘i e i latou le Atua, a ‘ua te‘ena e i latou tagata uma lava,Galu 2.23

16i lo latou tāofia o i matou ia lē tautala atu i tagata o Nu‘u ‘ese ‘ina ‘ia fa‘aolaina i latou. ‘Ua fa‘a‘atoa ai e i latou e lē aunoa a latou agasala, a ‘ua o‘o ‘iā te i latou le to‘asā e fa‘aumatia ai.

‘Ua Mana‘o Paulo e Toe Asiasi atu ‘iā te i Latou

17Uso e, fa‘ato‘ā matou tete‘a ma ‘outou i sina taimi pu‘upu‘u, ma e ui lava ‘ina peiseaī ‘ua lē va‘aia ‘outou, ‘ae le‘i galo ‘outou i o matou loto, sa fa‘atūmuina fo‘i i matou i le fia fa‘afesaga‘i pea ma ‘outou.

18O le pogai lenā o lo matou manana‘o e ō atu ‘iā te ‘outou. O a‘u o Paulo, ‘ua sili atu i lo le fa‘atasi ‘ona ‘ou taumafai e fia alu atu, a ‘ua tāofia i matou e Satani.

19Auā o le ā ‘ea lo tatou fa‘amoemoe, po o le ‘oli‘oli, po o se pale e mitamita ai i luma o lo tatou Ali‘i o Iesu Keriso i lona afio mai?

20Auā o ‘outou lava o lo matou vi‘iga ma lo matou ‘oli‘oli.