Galuega 17 - Samoan Contemporary New Testament

‘Ua o i Tesalonia

1‘Ua tuana‘i atu Amefipoli ma Apolonia, ‘ona o‘o lea o i lā‘ua i Tesalonia, e i ai i ‘ina le sunako o tagata Iutaia.

2Na ulufale i ai Paulo, e pei lava o lana masani; e tolu Sapati o finau atu pea o ia ‘iā te i latou i Tusi,

3‘ua fa‘amatalaina e ia Tusi, ma fa‘amaonia atu e tatau ‘ona puapuagātia le Keriso, ma toetū mai i ē ‘ua oti; ‘ua fai atu fo‘i o ia, “O Iesu o lenei o lo‘o ‘ou folafolaina atu ‘iā te ‘outou, o le Keriso o ia.”

4‘Ua talitonu mai fo‘i nisi o i latou, ma ‘ua fa‘aopoopoina atu i latou ‘iā Paulo ma Sila; e to‘atele tagata Eleni o ē e matata‘u i le Atua, ‘atoa ma tama‘ita‘i iloga e to‘atele fo‘i.

5A o tagata Iutaia ‘ua lotovale i latou, ‘ua fa‘atasi mai ‘iā te i latou nisi tagata leaga o ē e tafafao vale, ‘ua fa‘atupu le vevesi ma le pisa tele i le ‘a‘ai; ‘ua feosofi fo‘i i le fale o Iasona, ma sā‘ili ‘iā te i lā‘ua ‘ina ‘ia ta‘ita‘iina i fafo mai le nu‘u.

6‘Ae le‘i maua i lā‘ua; ‘ona toso mai lea o Iasona ma nisi o le au uso e i latou i faipule o le nu‘u, ma ‘ua ‘alalaga atu, “ ‘Ua fa‘atupu le fouvale e tagata nei i le lalolagi uma, ma ‘ua o‘o mai lava ‘i‘inei;

7‘ua talia fo‘i i latou e Iasona i lona fale. ‘Ua te‘ena fo‘i e i latou tulafono uma lava a Kaisara, ma fai mai e i ai le isi tupu o Iesu.”

8‘Ua fa‘atupu e i latou le vevesi i tagata, ‘atoa ma faipule o le nu‘u o ē ‘ua fa‘alogo atu i nei mea.

9‘Ua talia e i latou le totogi mai ia Iasona ma isi mo lo latou fa‘asa‘olotoina, ‘ona tu‘uina atu lea o i latou e o.

‘Ua o‘o i Perea

10‘Ona momoli lea o Paulo ma Sila e le au uso i le po i Perea; ‘ua taunu‘u atu i lā‘ua, ‘ona ulufale loa lea i le sunako o tagata Iutaia.

11‘Ua sili ‘ona amiolelei i latou nei i lo tagata Tesalonia; auā ‘ua talia e i latou le ‘upu ma le fiafia tele, ma ‘ua su‘esu‘e i Tusi i lea aso ma lea aso pe moni nei mea.

12O le mea lea ‘ua talitonu ai i latou e to‘atele, ma tama‘ita‘i fa‘aaloalogia o Eleni, ‘atoa fo‘i ma tane e to‘atele.

13A ‘ua iloa e tagata Iutaia o lo‘o i Tesalonia, ‘ua tala‘iina le afioga a le Atua e Paulo i Perea, ‘ona ō atu ai lea o i latou ma fa‘avevesi tagata i lea mea.

14‘Ona ‘auina atu loa lea o Paulo e le au uso e alu ifo i tai; a ‘ua nonofo ai pea Sila ma Timoteo.

15‘Ona ō lea o Paulo ma ē na momoliina o ia i Atenai; ‘ua poloa‘i mai fo‘i ‘iā te i latou, e fai atu ia Sila ma Timoteo ia vave mai i lā‘ua ‘iā te ia; ‘ona fo‘i ai lea o i latou na momoliina o ia.

‘Ua o‘o i Atenai

16A o fa‘atali Paulo ia Sila ma Timoteo i Atenai, sa tigā tele le loto o Paulo a o va‘ava‘ai atu i tupua e tele na‘uā i totonu o le ‘a‘ai.

17‘Ua lauga atu fo‘i o ia i le sunako i tagata Iutaia ma ē e matata‘u i le Atua; ‘ua talanoa fo‘i o ia ma ē sa feiloa‘i ma ia i le malae i lea aso ma lea aso.

18‘Ua finau mai ‘iā te ia tagata e ta‘ua o Epikuro, ‘atoa ma le itū‘āiga o Setoiko; ‘ua fai mai nisi, “O le ā ‘ea se mea o tau fai mai ai lenei tagata lē a‘oa‘oina?”

A o isi ‘ua fai mai, “E foliga mai o ia o se failauga o atua ‘ese,” auā ‘ua tala‘iina atu e ia ‘iā te i latou le Tala Lelei ‘iā Iesu, ma le toetū mai.

19‘Ona ‘ave lea o ia e i latou, ‘ua ta‘ita‘i atu i luma o le fono i Areopako, ma ‘ua fai atu, “Matou te fia iloaina, po o le ā lenei a‘oa‘oga fou ‘ua e ‘aumaia.

20Auā ‘ua e ‘aumaia i o matou taliga nisi mea ‘ese; o lea ‘ua matou fia iloa ai po o le ā le uiga o nei mea.”

21O tagata Atenai uma ‘atoa ma tagata ‘ese na i ai, ‘ua leai se isi mea e fai, ‘ua na o le naunau e ta‘u atu, po o le fa‘alogo fo‘i i se mea fou.

22‘Ona tula‘i lea o Paulo i Areopako ma fai atu: “Tagata Atenai e, ‘ua ‘ou iloa i mea uma lava o ‘outou o tagata e lolotu tele.

23Auā na ‘ou ui ane, ma ‘ou va‘ava‘ai ia ‘outou mea pa‘ia, ma sa ‘ou iloa ai le isi fatafaitaulaga o lo‘o tusia ai ‘upu ia: ‘Mo le Atua e le Iloa.’ O lea la, o lē o lo‘o ‘outou tapua‘i i ai ma le lē iloa, o le a ‘ou fa‘ailoa atu ‘iā te ‘outou.

24O le Atua na faia le lalolagi ma mea uma lava o i ai; o le Ali‘i o ia o le lagi ma le lalolagi; e lē afio o ia i malumalu e faia e lima;1 Tu 8.27; Isai 42.5; Galu 7.48

25e lē o lima o tagata e ‘au‘auna ai ‘iā te ia, peiseaī ‘ua mativa o ia i se mea e tasi; a o ia lava na te foa‘iina mai i tagata uma le ola, ma le mānava, ma mea uma lava.

26‘Ua faia fo‘i e ia nu‘u uma mai le tagata e to‘atasi, ia nonofo i le fogā‘ele‘ele uma lava, ma ‘ua tu‘u fo‘i e ia taimi e pei ‘ona tofia mai anamua, ‘atoa ma tuā‘oi o mea e nonofo ai i latou.

27‘Ina ‘ia sā‘ili i latou i le Ali‘i, pe mafai ‘ona tautagotago atu i latou ma iloa o ia. Peita‘i, e lē mamao o ia ma i tatou ta‘ito‘atasi,

28auā

‘O ia o lo‘o ola ai i tatou ma gaoioi ai ma o lo‘o i ai nei i tatou ‘ona o ia.’

E pei lava ‘ona fai mai ai nisi o ‘outou fatupese,

‘Auā o lana fānau i tatou.’

29O lea, ‘ona o i tatou o le fānau a le Atua, e lē tatau ai ‘ona tatou manatu e tutusa le Atua ma se auro, po o se siliva, po o se ma‘a, po o se mea o lo‘o fa‘aalia mai ai le poto ma le mafaufau o le tagata.

30Sa ‘onosa‘i le Atua i aso o le valea, a o lo‘o fetalai mai nei i tagata uma i nu‘u uma lava ia salamō;

31auā ‘ua fuafuaina e ia le aso e fa‘amasinoina ai le lalolagi i le amiotonu e le tagata ‘ua filifilia; ‘ua fa‘amaonia mai fo‘i e ia lenei mea i tagata uma lava, i lona toe fa‘atūina mai o ia nai ē ‘ua oti.”

32‘Ua fa‘alogo atu i latou i le toetū mai o ē ‘ua oti, ‘ona tauemu lea o isi; a ‘ua fai mai si, “Matou te toe fia fa‘alogo ‘iā te oe i lenei lava matā‘upu.”

33‘Ona alu atu lea o Paulo nai o latou luma.

34A ‘ua pipi‘i nisi tagata ‘iā te ia, ma ‘ua fa‘atuatua; e i ai le tagata Areopako o Taionusio, ma le fafine e igoa ia Tamari, ‘atoa ma isi na fa‘atasi ma i lā‘ua.