1 Korinito 4 - Samoan Contemporary New Testament

O ‘Aposetolo a Keriso

1‘Ia fa‘apea ‘ona ‘outou manatu ‘iā te i matou, o ‘au‘auna a Keriso o ē e tausia mea lilo a le Atua.

2O lenei, e tatau i ‘au‘auna tausi mea ‘ona fa‘aalia lo latou fa‘amaoni.

3A o se mea fa‘atauva‘a ‘iā te a‘u le fa‘amasinoina o a‘u e ‘outou, po o le fa‘amasinoga fa‘aletagata fo‘i; ‘ou te lē fa‘amasinoina fo‘i a‘u lava.

4Auā ‘ou te lē iloa so‘u sesē, peita‘i e lē o ta‘uamiotonuina ai a‘u i lenā mea. A o lē na te fa‘amasinoina a‘u o le Ali‘i lea.

5O le mea lea ‘aua le fa‘amasino i se mea a o le‘i o‘o i lona taimi, se‘ia afio mai le Ali‘i, o lē o le a na fa‘amalamalamaina mea lilo o le pouliuli, ma fa‘aalia filifiliga o loto. ‘Ona ta‘ito‘atasi ai lea o tagata ma maua lona lava ta‘uleleia mai le Atua.

6Uso e, o mea nei ‘ua ‘ou fai atu ai e fa‘atatau ia i mā‘ua ma Apolo ‘ona o ‘outou, ‘ina ‘ia a‘oa‘oina ai ‘outou ‘ona o i mā‘ua i le uiga o le ‘upu, “ ‘Aua tou te manatunatu e sili atu i le mea ‘ua tusia,” ‘ina ‘ia leai so ‘outou e loto fefete, e fiafia i le isi, ‘ae tete‘e atu i le isi.Roma 12.3

7O ai ‘ea ‘ua na iloa se mea e sili ai oe i lo isi? Se ā fo‘i se mea ‘ua ‘iā te oe e le‘i foa‘iina atu? ‘Āfai ‘ua e maua, aiseā la ‘ua e mitamita ai peiseaī e le‘i foa‘ifuaina atu?

8‘Ua mā‘o‘ona nei ‘outou, ‘ua tamao‘āiga nei ‘outou, ‘ua ‘avea ‘outou e ‘outou lava ma tupu e aunoa ma i matou. O lo‘u mana‘o ia ‘avea lava ‘outou ma tupu, ‘ina ‘ia ‘avea fo‘i i matou ma tupu fa‘atasi ma ‘outou.

9Auā ‘ua ‘ou manatu o i matou o ‘aposetolo, ‘ua tu‘u fa‘amulimuli e le Atua e pei o tagata ‘ua fa‘asalaina i le oti, auā ‘ua ‘avea i matou ma mata‘aga i le lalolagi, i agelu ma tagata.

10‘Ua vālea i matou ‘ona o Keriso, a ‘ua atamamai ‘outou ‘iā Keriso; ‘ua vāivāi i matou, a ‘ua malolosi ‘outou; ‘ua mamalu ‘outou, a ‘ua ‘inosia i matou.

11‘Ua o‘o mai i lenei lava itūaso, ‘ua fia ‘a‘ai ma fia inu i matou, ma ‘ua lē lavalavā, ma fa‘aleagaina ma maumausolo;

12o lo‘o matou galulue i o matou lava lima. ‘Ina o ‘upuleagaina i matou, sa matou fa‘amanuia atu; sa matou ‘onosa‘i fo‘i ‘ina o fa‘asauāina.

13‘Ua matou agalelei atu a o ‘upuleagaina i matou. Na ‘avea i matou e pei o otaota o le lalolagi, o le punefu fo‘i o mea uma e o‘o mai i le aso nei.

14‘Ou te lē tusi atu nei mea e fa‘amāina ai ‘outou, peita‘i ‘ou te apoapoa‘i atu ai ‘iā te ‘outou fa‘apei o la‘u fānau pele.

15E ui lava ‘ina i ai ‘iā te ‘outou le afe o ē e leoleo ‘iā te ‘outou ‘iā Keriso, ‘ae lē to‘atele o ‘outou tamā; auā na ‘ou fānaua ‘outou ‘iā Keriso Iesu e ala i le Tala Lelei.

16O lenei, ‘ou te ‘ai‘oi atu ‘iā te ‘outou, ‘ia ‘outou fa‘aa‘oa‘o mai ‘iā te a‘u.

17O le mea lea ‘ua ‘ou ‘auina atu ai Timoteo ‘iā te ‘outou, o lo‘u atali‘i pele ma le fa‘amaoni i le Ali‘i, o lē na te fa‘amanatu ‘iā te ‘outou o‘u ala ‘iā Keriso, e pei ‘ona ‘ou a‘oa‘o i latou i mea uma i ekalesia.

18O nisi o ‘outou ‘ua amio fa‘asausili, ‘ua manatu ‘ou te lē alu atu ‘iā te ‘outou.

19‘Ae lē o mamao ‘ona ‘ou alu atu lea ‘iā te ‘outou, pe ‘āfai e finagalo i ai le Ali‘i; ma ‘ou iloa ai e le o le ‘upu a ē e amio fa‘asausili, a o le malosi.

20Auā o le Mālō o le Atua e lē o ‘upu a o le malosi.

21O le ā ‘ea le mea tou te manana‘o ai? ‘Ou te alu atu ‘ea ‘iā te ‘outou ma le sasa po o le alofa ma le loto agamalū?