2 Korinito 8 - Samoan Contemporary New Testament

O le Matamau o Ekalesia i Maketonia

1Le ‘au uso e, matou te fa‘ailoa atu ‘iā te ‘outou le alofa tunoa o le Atua, ‘ua foa‘iina atu i ekalesia i Maketonia,

2na matuā tofotofoina i latou i puapuagā; sa fa‘ateleina fo‘i lo latou ‘oli‘oli i la latou foa‘i atu e matuā tele, e ui lava ‘ina peiseaī ‘ua matitiva ai i latou.

3Auā ‘ou te ta‘u atu ‘iā te ‘outou, na matuā foa‘i atu e i latou e sili i lo mea na latou maua, i lo latou lava loto malie,

4na matuā ‘ai‘oi mai ‘iā te i matou ‘ia matou talia lenei galuega i le ‘au pa‘ia.

5Na faia e i latou e sili atu nai lo le mea na matou fa‘amoemoeina, auā na mua‘i tu‘uina i latou e i latou lava i le Ali‘i, ma i matou fo‘i i le finagalo o le Atua.

6O le mea lea na matou ‘ai‘oi atu ai ia Tito ia fa‘amae‘aina le sauniuniga o meaalofa ‘iā te ‘outou, e pei lava ‘ona amataina e ia.

7‘Ua tamao‘āiga ‘outou i mea uma lava i le fa‘atuatua, i le ‘upu, i le poto, ma le filigā uma, ‘atoa ma lo ‘outou alofa ‘iā te i matou; ‘ua fa‘aalia ai lo ‘outou alofa i le tu‘uina mai fo‘i o lenei meaalofa.

8‘Ou te lē fai atu lenei mea e pei o se fa‘atonuga, ‘ae na ‘ona ‘ou ta‘u atu ‘iā te ‘outou le filigā o isi; o lo‘o ‘ou taumafai ai e fa‘amaonia le moni fo‘i o lo ‘outou alofa.

9Auā ‘ua iloa e ‘outou le alofa tunoa o lo tatou Ali‘i o Iesu Keriso; e ui lava ‘ina sa tamao‘āiga o ia, a ‘ua fa‘amativaina ‘ona o ‘outou, ‘ina ‘ia fa‘atamao‘āigaina ai ‘outou i lona mativa.

10O le mea lea na o se manatu ‘ou te tu‘uina atu ‘iā te ‘outou i lenei mea; o le mea lenei e ao ‘ona fai e ‘outou o ē na mua‘i amataina, e lē gata i mea e fai a o le loto atu i ai i le tausaga ‘ua mavae.

11O lenei, e ao ‘iā te ‘outou ‘ona fa‘auma le galuega na ‘outou amataina, o le mea lea ia ‘avea lo ‘outou loto atu e fai le galuega ma mea tou te mafaia ai ‘ona fa‘auma i mea lava o ‘iā te ‘outou.

12Auā ‘āfai e i ai le loto fiafia, o le a talia lelei lava e tusa ma mea ‘ua ‘iā te ia, ‘ae lē o mea e lē o ‘iā te ia.

13E lē ‘ina ‘ia mapu ai nisi, ‘ae puapuagātia ai ‘outou.

14‘Ae peita‘i ia fai fa‘atatau, ‘ina ‘ia fesoasoani lo ‘outou tamao‘āiga i lo latou mativa i le taimi nei, ‘ina ‘ia fesoasoani fo‘i lo latou tamao‘āiga i lo ‘outou mativa, ‘ina ‘ia taufai tutusa.

15E pei ‘ona tusia, “O lē na fa‘aputu mea e tele, ‘ua leai sana mea o totoe, o lē na fa‘aputu mea itiiti, e leai se mea e mativa ai o ia.”O Tito

16‘Ia fa‘afetaia le Atua, o lē na tu‘uina atu ia Tito le filigā ‘ona o ‘outou.

17Na matou ‘ai‘oi atu ‘iā te ia e alu atu ‘iā te ‘outou, ma sa loto malie o ia i la matou olega, peita‘i sa mana‘o o ia e alu atu ‘iā te ‘outou i lona lava loto malie.

18‘Ua matou ‘auina atu o ia fa‘atasi ma le uso, o lē ‘ua vi‘ia i ekalesia uma ‘ona o lana galuega, o le fa‘asalalauina lea o le Tala Lelei.

19E lē na o lea, a ‘ua tofia fo‘i o ia e ekalesia matou te malaga fa‘atasi, e avatu lenei meaalofa ‘ua faia mo le vi‘iga o le Ali‘i lava ia, ma ‘ia fai fo‘i ma fa‘ailoga o lo matou loto fiafia.

20O lo‘o matou taumafai e tāofia le faitioina e nisi o le matou faia o lenei meaalofa;

21o le sini o lo‘o matou taumafai i ai, o le faia lea o mea lelei, e lē na o le silafaga a le Ali‘i ‘ae fa‘apea fo‘i ma tagata.

22‘Ua matou ‘auina fa‘atasi atu fo‘i ma le isi o tatou uso, o lē ‘ua matou su‘esu‘eina so‘o lona mā‘elegā i mea uma, ma o ia lea ‘ua sili atu lona filigā ‘ona o le tele o lona fa‘atuatua ‘iā te ‘outou.

23A o Tito, o lo‘o fa‘atasi o ia ma a‘u, ma ‘ua ma galulue fa‘atasi fo‘i ma ‘outou; a o matou uso, o sāvali i latou a ekalesia, e vi‘ia ai Keriso.

24O lenei, ia fa‘aalia fo‘i i ekalesia le fa‘ailoga o lo ‘outou alofa, ma lo matou mitamita ‘ona o ‘outou.